Visimo 26 - Livulu lya Shukulu Kalunga

¹ Kushangazala cilema kunapu ngwe mema akukonda a nyangao, nambe ngwe nyonzi ya a simbu ya kuteja.

² Visingo kuvyasa kuvulumuna munu wakujeneka mulonga. Vinapu ngwe tuzila vaje vapulula lika a mukambwila, kujeneka kutongama.

³ Kavalu na cimulu vanapande kuvapupa, nakuvaka cikuvo mu kanwa, mukemwo vene vanapande kulinga na cilema.

⁴ Kesi ukumbulule cilema ngwe ku vulema vwendi, kutewa nove lalo ufwa ngwe ikeye.

⁵ Kumbulula cilema ngwe ku vulema vwendi, ngeci kesi alimone kunyanyama.

⁶ Uje atuma cilema napu ngwe munu nalivatozola mendi endi, nambe ngwe munu uje nanu mwaze.

⁷ Ngwe mendi a munu wakutenguka, mukemwo mwanafu na majwi a mana atunda mu kanwa ka cilema.

⁸ Kusingimika cilema kunapu ngwe uje akutiiya limanya a lekeni.

⁹ Cisimo cakutunda mu kanwa ka cilema, cinapu ngwe muka-kupenda uje eseka kutundisa limbimbo mu livoko lyendi.

¹⁰ Muka-kwana ngoco vipangi ku vilema nambe kuli vaje valiitila mu ngila, napu ngwe munu ali na vuta vwa lusipa uje asha-asha mikili ngoco.

¹¹ Cilema uje alinga lalo vya vulema vwendi, napu ngwe katali uje elukila lalo vije vyanashanjele.

¹² Cilema natuvakana munu uje aliyongola ikeye vavenya ngeci napu muka-mana kuma kesi nao.

¹³ Muka-vulwa atumbama mu njuvo nakwendeka ngwendi, “Anja ali ndumba.”

¹⁴ Lipito likatenguluka-tenguluka a vikete vyalyo, oloni mulwa ikeye akatenguluka-tenguluka a vulili vwendi.

¹⁵ Vanu vamo vapwa vaka-vulwa mukujundula livoko ngeci vaake vyakulya mu kanwa.

¹⁶ Mulwa akayongola ngwendi napu wakunyanyama kutuvakana vanalume vatanu na vavali, vaje vasa kuyongola viyongola vyavivwa.

¹⁷ Kukokangeya katali ku matwi kunapu ngwe kukovela mu vin̄anda vije kuvyakupandamene.

¹⁸ Munu uje akwisa mukwavo, co endeka ngwendi, “Njinakele nakulinga lika sanda,”

¹⁹ napu ngwe munu wakuzaluka uje asha mikili yakuvambuka.

²⁰ Nga vitale vyai tuhya tuzima, co nga lufwe lwai, kulijokota kulikela.

²¹ Manungu akwenyuka amo na vitale vikashangumuna tuhya, na muka-lwozi lalo akashangumuka vimata.

²² Majwi a muka-kufweya anapu ngwe vyakulya vyakutovala, akakovela mwimo.

²³ Majwi a civembulu, na mbunge ya vuvi, vinapu ngwe siliva ya kujelesa ije vanafwiki a ndeo ya vuma ya seo.

²⁴ Muka-civembulu akashweke cizindo cendi na majwi akuseveleka.

²⁵ Majwi endi asa kupwa amavwa, oloni kesi uwakulaele, omwo mbunge yendi inashulu manene na cizindo.

²⁶ Munu wa cifwa eci asa kushweka cizindo cendi, oloni vanu voshe vasa kumona vyuma vyavivi vije vyalinga.

²⁷ Vanu vaje vatela vakwavo myeto vatsamo vakevo vavenya. Co vanu vaje vashangumuna limanya ngeci lyandumuke, limanya lije likavandumukila vakevo vavenya.

²⁸ Nyanyama na munu uje endeka makuli na majwi akuseveleka, majwi a cifwa eci, anena lika luvinda.