Visimo 23 - Livulu lya Shukulu Kalunga

Visimo vya Solomoni -6-

¹ Omo utumbama kukulya na munu wa vulemu, yongola ngwove ou injilinakulya nendi iya.

² Nga walakama, simpa mbunge.

³ Kesi ulakamene vyakulya vyavivwa vije vyakunenela, amo alinakukukwisa lika.

-7-

⁴ Pangesa mana ove vavenya kesi ulipese ngoco kushakezeka vufuko.

⁵ Vimbongo vyove vyasa kuhwa vwasi-vwasi, vyasa kupulula ngwe mwakapulula ngonga.

-8-

⁶ Kesi ulye vyakulya vya muka-litsita, nameme vyakulya vyendi vyavivwa manene.

⁷ Nambe akuleka ngwendi, “Lya vyakulya vyavingi.” Oloni kesi mukemwo mwalinakuyongola mu mbunge yendi.

⁸ Ukashanja vyoshe vije viwunali, co visimutwiya vyove vyavivwa, vyoshe vikaviya.

-9-

⁹ Kesi wendeke na cilema, omwo kasa kuvwaelela na majwi a mana.

-10-

¹⁰ Kesi ushwenyese cimweso ca nginga yalaja, nambe kunyeka visiwa mahya avo.

¹¹ Shukulu Kalunga ikeye muka-kuvalwila wavo wa nzili, akavasompelako milonga yavo yakuvalwisa.

-11-

¹² Aka mbunge yove ku vilongesa, na matwi ove ku majwi a mana.

-12-

¹³ Kesi ulikele kunyanyamesa munove, nga umupupa na civanzi, kakatsi embwe.

¹⁴ Nga umupupa na civanzi, ulinakwamena mwonyo wendi ku kutsa.

-13-

¹⁵ Munange, nga ukala na mana, co mbunge yange ikavwaelela.

¹⁶ Mbunge yange ikajolela omo njikakuziva wendeka majwi a mana.

-14-

¹⁷ Kesi uliveyele vaka-vuvi, oloni simbu yoshe singimika Shukulu Kalunga.

¹⁸ Co mwa vushunga vene ukakala na cinyangavili ku matangwa a kulutwe.

-15-

¹⁹ Munange, tolilila, pwa wakunyanyama nakukala na mana, mukukava ngila ya vushunga.

²⁰ Kesi ulikumbasane amo na vaka-kunwa vinyu, nambe vaka-kutsa akulya.

²¹ Vaka-kupenda na vaka-kutsa akulya, vakapwa tuutu. Nga ulya nakulala lika tulo, co ukazala visanyu-visanyu.

-16-

²² Tolilila kuli isho, uje wakukitile, co kesi uyengule vanyoko omo vanakuluvala.

²³ Landa vushunga, na mana, na vilongesa, nakuzivisisa, co kesi ulyangunuke navyo.

²⁴ Ishe ya mwana wa vushunga akajolela manene. Uje akita mwana wa mana, avwaelela.

²⁵ Vaisho na vanyoko vavwaelele ali yove, vunene vanyoko vanapande kuvwaelela ali yove.

-17-

²⁶ Munange tolilila mwamuvwa, kuyoya kwange kupwe cimweso kuli yove.

²⁷ Vikwizi na vanakazi vakulyendela ngoco, vanapu ngwe mbulu yakulova.

²⁸ Valinakuvandamena ngwe mapwepwe, co vanalume vavangi vanajeneka kulongwa omwo yavo.

-18-

²⁹ Iyajo ali mu tuyando? Iyajo ali mu vusiwa? Iyajo muka-lwozi? Iyajo alinakulinyenga? Iyajo ali na vimbandu vya mulonga? Iyajo ali na mesho akuvenga?

³⁰ Vyuma evi vili ku vanu vaje vazema kunwa vinyu, vanu vaje vazema kunwa vinyu vyakukumbasana.

³¹ Kesi ukenge ku vinyu omo vivenga, nambe omo vivyazima mu nganja, nambe omo viita mwamuvwa a milivu.

³² Oloni mamaneselelo avyo, vishuma ngwe linyoka wa vushungu vwavuvi.

³³ Mesho ove akamona vyuma vyakukomokesa, na mbunge yove ikayongola vyuma nambe vya kupenga-penga.

³⁴ Yove ukaliziva ngwe uli mu nzinga ya mema a kalunga, nambe ukaliziva ngwe munu uje nalala akamwa ya citi ca akati ka vwato.

³⁵ Muvila wove ukakala na mikiki, oloni kuukazivuka vika vyalingiwile. Co ukendeka ngwove, “Vananjipupu, oloni kunjazivile kuvavala. Cili vene vananjipupu, oloni kunjazivukile, simbu ikajo njikenduka? Njishaka kunwako lalo vinyu vyeka.”