Visimo 2 - Livulu lya Shukulu Kalunga

Cikandelela cakukala na mana

¹ Munange, lilongese vije vinjikuleka, nyunga mashiko age.

² Jendekela litwi lyove ku majwi a mana, aake mu mbunge nakuwazivisisa.

³ Eyo, lomba mana, co lambelela kuzivuka vyuma.

⁴ Shakezeka mana ngwe siliva, ashakezeke ngwe muukashakezeka vufuko vwakushweka.

⁵ Ukazivuka mucinalumbunukila kukomoka Shukulu Kalunga, ukawana lalo mana akuzivuka Njambi.

⁶ Shukulu Kalunga akana mana, kuli ikeye kutunda mana nakuzivisisa.

⁷ Shukulu Kalunga natulikila mana vaka-vushunga nakunyunga vaka-kulongwa, amena vaka-kujeneka mulonga.

⁸ Akanyungu vingila vya vaka-vushunga, nakunyunga vaje vanakundama kuli ikeye.

⁹ Nga unjitolilila, co ukazivuka vyuma vyavivwa mu ngila yaivwa yakushungama. Ukazivuka vije unapande kulinga.

¹⁰ Mana akaija mu mbunge yove, akavwaelelesa mwonyo wove.

¹¹ Kuzivuka kwove nakuzivisisa kwove vikakunyunga,

¹² mana akakwovola ku ngila ya vuvi, kuli vaje vaka-kwendeka vyavivi,

¹³ vaje vanaseza ngila yakushungama, ngeci vende mu vingila vya lisusulungu.

¹⁴ Vaje vavwaelela mukulinga vuvi, vajolela mukulinga vyuma vya vunyengwe.

¹⁵ Vingila vya vanu va cifwa eci vyapwa vya kupenga-penga, vatanguka mu vingila vyavo.

¹⁶ Mana akakwohyela ku munakazi wa cikwizi woshe, kukukukokweya na majwi endi akuseveleka,

¹⁷ munakazi wakujeneka kulongwa kuli munalume wendi, nevala cisingo cakujela cije calisingile.

¹⁸ Njuvo yendi inapu ngwe mbulu, ngila yendi itwamenena ku vukalo vwa vatsi.

¹⁹ Naumo wai waya nakumusikamesa akeluka. Kakeluka lalo na mwonyo.

²⁰ Ngecivene, ukakava ngila ya vanu vavavwa, ukakava ngila ya vaka-vushunga.

²¹ Vaka-vushunga, vakevo vakujeneka mulonga vakakala muno mu lifuti.

²² Oloni Njambi akasheka vaka-vuvi mu lifuti, vakapwa ngwe cimena civatukula mu livu.