Visimo 14 - Livulu lya Shukulu Kalunga

¹ Munakazi wa mana, anyunga njuvo yendi, oloni munakazi wa cilema, aviisa njuvo yendi.

² Woshe uje ayoya kuyoya kwakuvwa, amwesa ngeci alinakwononoka Shukulu Kalunga, oloni woshe uje ayoya kuyoya kwa kupenga-penga, amwesa ngeci alinakuyengula Shukulu Kalunga.

³ Cilema wa kulyalesa vamuhisa akwendeka vya vulema, oloni majwi a muka-mana amunyunga ikeye vavenya.

⁴ Kujeneka vingombe vakulima, mu cishete mukala mwamupulungwa, oloni nga ukala navo, co cishete cove cikashula na vimbuto.

⁵ Mukaleo wa kulongwa simbu yoshe akendeka vushunga, oloni mukaleo uje wakujeneka kulongwa, kesi kwendeka vya vushunga oloni makuli lika.

⁶ Vanu vaka-kulyalesa kuvasa kupwa vaka-mana, oloni cacasi kuli vihwanga kulilongesa.

⁷ Tunda ku vilema, omwo kuvesi na cuma ca mana civakakulongesa.

⁸ Omwo vikajo munu wakunyanyama ali na mana? Omwo azivuka vije vyanapande kulinga. Omwo vikajo cilema wapwa cilema? Omwo akayongola ngeci azivuka vyuma.

⁹ Vilema kuvesi na mulonga nga vavulumuna, oloni vanu vavavwa vakashaka kuvasambesa.

¹⁰ Mbunge na mbunge izivuka vukalu vwayo, co naumo wai asa kuvwaelela nayo.

¹¹ Njuvo ya muka-vuvi ikanyonga, oloni mbalaka ya muka-vushunga ikakola mbe.

¹² Kuli ngila ije amona munu ngeci inapu ngila ya vushunga, oloni mamaneselelo ayo inapu ngila ya kutsa.

¹³ Kujolela casa kufwika kuviilila, co lalo kuvwaelela casa kwimuka kuviilila.

¹⁴ Vanu vavavi, vakawana vije vinavapande, vanu vavavwa, vakatambula cikandelela a vilinga vyavo vyavivwa.

¹⁵ Cilema akatava cuma coshe-icoshe cije aziva, vaka-mana vakevo vazivuka kuje kuvaya.

¹⁶ Vaka-mana vakalinyungu ku vukalu, oloni vilema vapwa valishamena, co vakalingi vyuma kuviyongola.

¹⁷ Vanu vaka-kuluvala, vakalingi vyuma vya vulema, oloni vaka-mana vakakala mu kwoloka.

¹⁸ Vilema vakawana vya vulema vwavo, oloni vaka-kunyanyama, vakatambula cikandelela ca mana.

¹⁹ Vaka-vuvi vakatsikama, nakulamba kuli vaka-vushunga na kulikeesa, mukulomba kutetela kwavo.

²⁰ Nga u kautu, kuukala na vasamba, oloni nga u muka-kufuka, ukala na vasamba vavangi.

²¹ Nga ushaka vivezikiso, kala na ngozi kuli muka-kuutwa, capwa vuvi kuyeluwisa vakweni.

²² Vakweni vakakukulaela nakukusingimika nga upanga mwamuvwa, oloni nga upanga mwamuvi, co ulinakulinga mulonga.

²³ Kuundangana manene uwanao vimo, oloni kwendeka ngoco lika na kanwa, kutwala lika ku vuutu.

²⁴ Vaka-mana vakatambula cikandelela ca vufuko, oloni vilema vakavazivukila a vulema vwavo.

²⁵ Mukaleo wa vushunga akamena myonyo ya vanu, oloni mukaleo wa makuli, kuvamukulaela embwe.

²⁶ Kukomoka Shukulu Kalunga mwakala kukulaela, nakukolesa kuli munu na naanga yendi.

²⁷ Kukomoka Shukulu Kalunga kunapu kavwelu-vwelu ka mwonyo, ngeci munu atunde mu vinganjo vya kutsa.

²⁸ Vukama vwa mwene, vuli a vungi vwa vanu vaje vashwana, nga kesi na vanu vavangi, vumwene vwendi vuzeya.

²⁹ Uje kesi kuluvala vwasi, ali na mana akama, oloni muka-mbunge ya vwasi-vwasi, akamwesa lika vulema vwendi.

³⁰ Mbunge ya kwoloka inena vukangule mu muvila, oloni cipululu capwa ngwe mbandu ya mukongo.

³¹ Nga uyandesa vanu vakuutwa, co ulinakushaula Njambi uje wavatangele, oloni nga uzivila ngozi tuutu, ulinakumusingimika.

³² Vaka-vuvi vakaliwisa vakevo vavenya a vilinga vyavo vya vuvi, oloni vaka-vushunga vali noku kwakutewela a kutsa kwavo.

³³ Kunyanyama kwakala ku munu uje ali na mana, oloni vilema kuvazivuka vya mana.

³⁴ Vushunga vukatsimanesa lifuti, oloni vuvi vunena shwamwa ku lifuti lyoshe.

³⁵ Vimyene vakavwaelela na vamyata va kulongwa, oloni vakahisa vamyata vaje valinga mwamuvi.