Visimo 13 - Livulu lya Shukulu Kalunga

¹ Mwana wa mana atolilila omo ishe amunangula, oloni mwana wa likamba kesi kutolilila ku vije vamunangula.

² Vanu vavavwa vakavana cikandelela a vije vyavivwa vendeka, oloni vanu vaka-makuli vakasinganyeka lika vyuma vya lwozi.

³ Nyanyama ku vyuma vije wendeka, co ukanyunga mwonyo wove, nga wendeka lishamena ukanyonga.

⁴ Mulwa nameme ashaka vati cuma oloni kakaciwana, oloni muka-kuundangana manene akawana vyuma vyoshe vije vyashaka.

⁵ Vaka-vushunga vazinda makuli, oloni majwi a vaka-vuvi apwa a shwamwa nakuviililisa.

⁶ Vushunga vunyunga uje kesi na mulonga, oloni vuvi vuwisa vaka-vuvi.

⁷ Vanu vamo vakalipwisa ngwe vaka-kufuka, oloni kuvesi na vufuko, co vamo vakalipwisa ngwe vaka-kuutwa, oloni vali na vufuko vwavungi.

⁸ Muka-kufuka akapangesa vimbongo vyendi mukwamena mwonyo wendi, oloni naumo wai akashungwiya muka-kuutwa.

⁹ Vaka-vushunga vanapu ngwe ceke cakutwa manene, oloni vaka-vuvi vanapu ngwe ndeya yakuzima.

¹⁰ Kulyalesa kunena vukalu, oloni mana ali muli vaje vatolilila kukuvanangula.

¹¹ Vufuko vwakuwana mu ngila yaivi vukahu vwasi-vwasi, oloni uje avuwana nakuundangana kwendi vavenya akakala navwo vwavungi.

¹² Omo cinyangavili cinahu, co na mbunge inoloka, oloni vije ushaka nga unaviwana, co ujolela.

¹³ Nga uvyana vilongesa vya Njambi, co ulinenela tuyando, oloni uje ononoka mashiko endi vakamwana cikandelela.

¹⁴ Vilongesa vya muka-mana vyapwa lisima lya mwonyo, ngeci munu atenguluke kutunda ku vinganjo vya kutsa.

¹⁵ Mana awanesa kasingimiko, oloni vaje vaka-kujeneka kukulaela vali mu ngila yakuya kukunyonga.

¹⁶ Vaka-mana simbu yoshe vakalivanga kuyongola simbu kanda vapange, oloni vilema vambulula vya vulema vwavo.

¹⁷ Miluwa va kulongwa vakanene tuyando, oloni vaje vaka-kukulaela vakanene kwoloka.

¹⁸ Uje avyana kumunangula akapwa muka-kuutwa nakuziva shwamwa, oloni woshe uje atolilila kukumunangula vakamusingimika.

¹⁹ Cinapu cacivwa manene kuwana vije viwushaka, oloni vilema vakavyana kutenguluka kutunda ku vuvi.

²⁰ Uje enda na vaka-mana apwa muka-mana lalo, oloni uje enda na vilema akanyonga.

²¹ Tuyando tukavangeya vaka-vuvi kwoshe-ikwoshe kuvaya, oloni vaka-vushunga vakavana cikandelela ca vyuma vyavivwa.

²² Munu wamuvwa asezela vatekulyendi vushwana, oloni vufuko vwa vaka-vuvi vakavwambata kuli vaka-vushunga.

²³ Mahya a tuutu mwasa kwija vimbuto vyavingi, oloni vaka-muuka vavitundisamo.

²⁴ Nga kuunyanyamesa munove kuwesi nakumuzema, oloni nga wamuzema umunangula.

²⁵ Vaka-vushunga vali na vyakulya vyavingi, oloni vaka-vuvi simbu yoshe vali na njala.