Visimo 11 - Livulu lya Shukulu Kalunga

¹ Shukulu Kalunga wazinda vanu vaje vapangesa vipeseleso vya makuli, oloni avwaelela na vipeseleso vyavivwa.

² Vaka-kulyalesa vakaziva shwamwa, oloni vaka-kulikeesa vakakala na mana.

³ Nga unapu u muka-vushunga, kulongwa kukakutwamenena, oloni nga u munu wakuyoya kwa kupenga-penga, kupenga-penga kwove kukakunyongesa.

⁴ Vufuko vukapwa vwangoco a litangwa lyove lya kutsa, oloni kulongwa kwasa kwamena mwonyo wove.

⁵ Kulongwa kulingisa muka-vushunga kuyoya mwamuvwa, oloni muka-vuvi akawa a vuvi vwendi vavenya.

⁶ Vushunga vwa muka-kulongwa vukamupatula, oloni munu uje kuvasa kumukulaela, atsa ku muuka wendi.

⁷ Omo muka-vuvi atsa, cinyangavili cendi citsa amo nendi. Kukulaela vufuko kukwesi na seo.

⁸ Shukulu Kalunga akanyunga vaka-vushunga ku tuyando, co tuyando otu twija ku vaka-vuvi.

⁹ Visimutwiya vya vaka-kujeneka kukulaela, vyasa kukuviisa, oloni mana a vaka-vushunga asa kukwamena.

¹⁰ Vivezikiso vya vaka-kulongwa, vikanenela nganda kuvwaelela, omo vaka-vuvi vatsa, co kukakala kujolela.

¹¹ Nganda ipwa yakama omo Shukulu Kalunga avezikisa vaka-vushunga, oloni majwi a vaka-vuvi, asa kuviisa nganda.

¹² Cinapu cuma ca vulema kushendumuna vakweni. Nga uli na mana, co lyolokele lika kuluu.

¹³ Muka-lufwe wai wamukulaela kushweka vyuma, oloni wasa kukulaela munu wa vushunga.

¹⁴ Lifuti liwa nga kulyesi na vaka-kutwamenena va mana, oloni nga kuli vaka-kunangula vavangi, co kukala kwoloka.

¹⁵ Uje ana kapopo ku mulonga wa mungenzi akamona vukalu, oloni uje kalingi cuma eci akakala mwamuvwa.

¹⁶ Munakazi muka-mema ku mbunge vakamusingimika. Oloni vanalume va lwozi vawana lika vufuko.

¹⁷ Muka-ngozi anyunga mwamuvwa mwonyo wendi, oloni munu wakukaluka aliyandesa lika ikeye vavenya.

¹⁸ Vanu vavavi kuvasa kuwana cuma cimo, oloni nga ulinga mwa vushunga co ukawana cikandelela.

¹⁹ Munu woshe-iwoshe uje alinga mwa vushunga akayoya, oloni woshe uje akakateya kulinga vyavivi akatsa.

²⁰ Shukulu Kalunga wazinda vanu vaka-vimbunge vyavivi, oloni azema vaje vaka-kulinga vya vushunga.

²¹ Zivukeni ngeci vaka-vuvi vakavahisa, oloni vaka-vushunga vakovoka.

²² Vuvwa vwa munakazi wa mana, vunalifu na kanzeya ka ngolinde kali ku lijulu lya ngulu.

²³ Vaka-vushunga vakashungwiya vyuma vyavivwa, oloni vaka-vuvi vakakushungwiya lika vije vyavikalu.

²⁴ Vanu vamo vakapangesa vimbongo vyavo mwoshe muvashakela, oloni anga vacili na vufuko. Co veka vali na vun̄ondi, oloni anga vanapu lika vaka-kuutwa.

²⁵ Pwa muka-kwana co ukavezika. Kwasa vakweni, co nove vakakukwasa.

²⁶ Vanu vakasingi munu uje omina vimbuto, oloni vashangazala uje avilandesa na ndando yaindondo.

²⁷ Eseka na nzili kulinga mwamuvwa, co uwana vasamba, ya nakushakezeka vukalu, co ukavuwana.

²⁸ Vaje vakulaela a vufuko vwavo, vakatotomoka ngwe maputa a nyangao, oloni vaka-vushunga vakakola mbe, ngwe maputa a ndombo.

²⁹ Munu uje anenela tuyando naanga yendi, kakawana cuma cimo ku mamaneselelo endi. Vilema vya vanu simbu yoshe vapwa vangamba va vaka-kunyanyama.

³⁰ Yoya mu vushunga, co uwana mwonyo, oloni lwozi lutwala lika ku kutsa.

³¹ Vaka-vushunga vakawana cikandelela ano asi. Oloni mwa vushunga vaka-kupenga-penga, na vaka-vuvi, Njambi akavahisa.