Visimo 1 - Livulu lya Shukulu Kalunga

Seo ya visimo

¹ Evi vikevyo visimo vya Solomoni mwene wa Isalele muna Ndaviti.

² Visimo evi vilongesa vanu kunangula, ngeci vazivuke mana na vilongesa, ngeci vanu vazivuke majwi akulova.

³ Visimo vyasa kukulongesa kukala na mana akulinga vyuma vyavivwa mu ngila ya vushunga amo na vuvwa.

⁴ Vyasa kunyanyamesa vaka- kulilongesa, nakwana mukwenje mana akuyongola mwamuvwa.

⁵ Visimo evi vyasa kuwezelela ku mana a vaje valinawo, vyasa kutwamenena lalo vaka-kulilongesa,

⁶ ngeci vase kuzivuka mwamuvwa mwanalumbunukila majwi a visimo, na majwi aje avendeka vaka-mana na tusau twavo.

Kunangula vakwenje

⁷ Kukomoka Shukulu Kalunga, kukekwo vushangumukilo vwa mana. Oloni vilema vakevo vayeluwisa mana nakuyeluwisa lalo vilongesa.

⁸ Ove munange, tolilila vilongesa vya isho, co lalo kesi wivale vilongesa vya vanyoko.

⁹ Omwo vilongesa vyavo vikapwa ngwe kalupusa kakavwa ku mutwe wove nambe ngwe sungu mu mukoshi wove.

¹⁰ Munange, nga vaka-vuvi vakukokweya, kesi uvatave.

¹¹ Nambe nga vendeka ngwavo, “Ija kuno tuvandamene munu ngeci tumutsiye, tuvandamene vanu vakujeneka mulonga ngeci tuvatsiye!

¹² Tuvaleuleni voshe oku vayoya, ngwe vaje vashelumuka ku vukalo vwa vatsi, tuvatsindeni voshe ngwe vaje vavatsinda mu mbulu!

¹³ Tukambata vufuko vwavo vwoshe vwakuliseza-seza, nakushulisa vinjuvo vyetu na vyuma vyakupukula!

¹⁴ Ija ulipandakane netu, co tuvavoshe tukalipangela vije tukawana.”

¹⁵ Munange, kesi wende na vanu vakufwa ngacije, nambe kulinga vije vivalinga vakevo.

¹⁶ Simbu yoshe vanu ava vakalingi cuma cacivi. Vakevo vakalyanganya ngeci vatsiye.

¹⁷ Kukwesi munu ata linimbwa oku kazila nakengelela valinakulita.

¹⁸ Oloni vanu vakufwa ngacije valinakulitela mweto vakevo vavenya, mweto muje muvakatsa vakevo vavenya.

¹⁹ Vufuko vuje uwana mu ngila ya muuka vukakutwala ku kutsa, eci cikeco cilingiwa ku munu uje ayoya mu ngila ya muuka.

Mana alinakusana

²⁰ Tolilila, mana alinakusana mu vitapalo na ku mitambela ya vulandeselo,

²¹ mana alinakutambeka ku vikolo vya mu nganda, na kuje kwoshe kuvalikungulwila amo vanu ngwawo,

²² “Visimbu vingaijo eni vilema mukatwalao kulinga vulema? Visimbu vingaijo mukalikela kutomba nakujola mana? Kuma kumulilongesa ndi? Njimyana kunangula kwakuvwa nakumyana mana ange.

²³ Tolilileni omo njimyendekela, njimyana kunangula kwakuvwa.

²⁴ Njinakala nakumisana, nakumilanya ngeci mwije, oloni yeni kumwombileko mbunge. Kumwatolililile kuli yange.

²⁵ Munombwanesa kunangula kwange kwoshe, co kumwakele na cizango cakunjitava omo njamyendekelele.

²⁶ Ngecivene, njikamijola omo mukavindama, co njikamishendumuna lalo omo vyakujujwisa vikaija ali yeni,

²⁷ omo vyakujujwisa vikaija ali yeni ngwe lihunzi lyakama, mukuminenela vukalu na tuyando.

²⁸ Asinoni mukasana mana, oloni kunjikamikumbulula, mukanjishakezeka noku-noku, oloni kumukanjiwana.

²⁹ Omwo yeni mwazinda mana, co kumwakomokele Shukulu Kalunga.

³⁰ Yeni kumwashakele kunangula kwange nambe kumbako mbunge omo njamyendekelele.

³¹ Ngecivene, mukawana vije vimwashakele, co mukakuta na vilinga vyeni.

³² Vaka-kujeneka kuzivuka, vakatsi omwo vakavyana mana.

³³ Oloni woshe uje atolilila kuli yange, akakala mu kwoloka. Ikeye akakala mwamuvwa, nacimo cai cikamuzivisa lyova.”