Vilinga vya Miluwa 8 - Livulu lya Shukulu Kalunga

¹ Co Saulu watavele kutsa kwa Setefano. A litangwa lije vene cikungulukilo ca mu Yelusalema cashangumukile kuyanda na mapakeso. Vaka-kukulaela voshe, kuvanga lika miluwa, vashandokelele mu mafuti a Yundeya na Samaliya.

Saulu apakesa cikungulukilo

² Vamo vanalume va kulongwa vatsindile Setefano, vamulilile manene.

³ Oloni Saulu wesekele kunyongesa cikungulukilo, waile ku njuvo na njuvo, wakokangeyeye vaka-kukulaela, vanalume na vanakazi, co wavaakele mu kamenga.

Vin̄anda Vyavivwa vavyambulula mu Samaliya

⁴ Vaka-kukulaela vaje vashandokele vaile kwoshe-ikwoshe nakwambulula lijwi.

⁵ Filipu waile ku nganda ya Samaliya nakwambulula lijwi lya Wakuvwavesa kuli vanu vaje vakele kuje.

⁶ Co mbunga ya vanu vatolililile vije vyendekele Filipu, co vamwene vizivukiso vije vyalingile.

⁷ Omwo minzinzime yakujwala yatundile muli vanu vavangi yatambekele na lijwi lyakama, vavangi vaka-tulepa na vilema vakangukile.

⁸ Ngecivene, mu nganda ya Samaliya mwakele kujolela kwakama.

⁹ Oloni mu nganda ije mwakele munalume umo lizina lyendi Simoni, uje a simbu yakama wakomokesele vaka-Samaliya na manseno endi. Walimwesele ikeye vavenya kupwa umo wakama,

¹⁰ co vanu voshe muje mu nganda, vanu va vulemu na vaje kesi va vulemu, vatolililile kuli ikeye, vendekele ngwavo, “Ou ikeye vene nzili ya Njambi uje ivatumbula ngwavo, ‘Nzili Yakama.’ ”

¹¹ Co vakele nakumutolilila omwo a simbu yakama wavakomokesele na manseno endi.

¹² Oloni omo vakulaelele lijwi lyendekele Filipu kuli vakevo lya vin̄anda vyavivwa vya Vumwene vwa Njambi na vya Yesu Kilistu, co vavambwitikile, voshe vanalume na vanakazi.

¹³ Nameme Simoni vene nendi lalo wakulaelele, co omo vanamumbwitika, wakele amo na Filipu, co walikomokelele manene omo wamwene vikomokeso na vizivukiso vije vyakele nakulinga.

¹⁴ Miluwa vaje vakele mu Yelusalema omo vazivile ngwavo vanu va mu Samaliya vanatambula lijwi lya Njambi, ngecivene, vavatuminine Petulu na Yowano.

¹⁵ Omo vetele kuje, valombelelele vaje vaka-kukulaela ngeci vatambule Munzinzime Wakujela.

¹⁶ Omwo Munzinzime Wakujela te kanda ashulukile ali vakevo, oloni vavambwitikile lika mu lizina lya Mwene Yesu.

¹⁷ Asinoni Petulu na Yowano vavakambekele mavoko, co vatambwile Munzinzime Wakujela.

¹⁸ Simoni wamwene ngeci Munzinzime vanawana kuli vaka-kukulaela omo miluwa vakambekele mavoko avo ali vakevo. Ngecivene, waanene vimbongo kuli Petulu na Yowano,

¹⁹ co wendekele ngwendi, “Nange lalo njaneniko nzili eyi, ngeci woshe injikakambeka mavoko ange akatambula Munzinzime Wakujela.”

²⁰ Oloni Petulu wamukumbulwile ngwendi, “Nove vene na vimbongo vyove munyonge amo, omwo yove uyongola ngwove amo wasa kulanda vwana vwa Njambi na vimbongo!

²¹ Yove kuwesi na mutambela nambe mwela mu vipangi vyetu, omwo mbunge yove kuyesi mwamuvwa ku mesho a Njambi.

²² Ngecivene, tenguluka utunde ku viyongola vyove vyavivi, co lomba kuli Mwene ngeci akusambese ku viyongola vyove ngwe evi.

²³ Omwo njinamono ngwange yove unashulu na cipululu cacivi, co unapu u cinzinda ca vuvi.”

²⁴ Co Simoni wendekele kuli Petulu na Yowano ngwendi, “Njilombeleleniko kuli Mwene ngeci vyuma evi vimunendeka kesi vilingiwe kuli yange.”

²⁵ Omo vamanesele kwana vukaleo vwavo nakwambulula muzimbu wa Mwene, Petulu na Yowano velukile ku Yelusalema. Mu ngila yavo vambulwile Vin̄anda Vyavivwa mu membo amangi a mu Samaliya.

Filipu na mukulunu wa ku Isopya

²⁶ Oloni kangelo ka Shukulu Kalunga wendekele kuli Filipu ngwendi, “Katuka uye ku mbwela ku ngila ije itunda ku Yelusalema iya ku Ngaza.” (Ngila eyi yapwa ya mambo kuvesi kuyipangesa matangwa ano.)

²⁷ Ngecivene, Filipu wakatukile waile waliwanene na kayunuke umo kaIsopya, wapwile mukulunu wa vulemu muka-kunyunga vufuko vwa vamwene wa ku Isopya. Co waile ku Yelusalema nakulemesa Njambi.

²⁸ Co omo welukile watumbamene mu litemba lyendi wakele nakulava livulu lya Isaya muka-kwimanena.

²⁹ Co Munzinzime Wakujela wendekele kuli Filipu ngwendi “Shwenya kuyehi na litemba lije.”

³⁰ Ngecivene, Filipu washatukilileko wamuzivile alinakulava mu livulu lya Isaya muka-kwimanena. Co wamwihwile ngwendi, “Ulinakuzivisisa ovyo ulinakulava ndi?”

³¹ Uje mukulunu wamukumbulwile ngwendi, “Vati njasa kuzivisisa kuvanga umo anjilumbunwinevyo?” Co walombele Filipu alonde atumbame amo nendi mu litemba.

³² Co majwi a mu visoneka alavele akewo awa, “ Wafwile ngwe manga uje vatwala nakumutsiya, ngwe muna manga uje oloka kuluu kuli vaka-kumuteula, oloni wolokele kuluu.

³³ Vamuzivisile shwamwa, co kuvamusompelele vushunga. Naumo wai asa kwambulula naanga yendi, omwo kuyoya kwendi ano asi kwetele na ku shongo.”

³⁴ Co uje mukulunu wehwile Filipu ngwendi, “Njileke, muka-kwimanena natumbula iya omo nendeka ngeci? Walyendekele ikeye vavenya nambe mukwavo weka?”

³⁵ Asinoni Filipu washangumukile kwendeka, washangumukile na visoneka evi, wamulekele Vin̄anda Vyavivwa vya Yesu.

³⁶ Co omo vakele nakushelumuka mu ngila, co vetele ku mutambela umo kuje kwakele mema, co uje mukulunu wendekele ngwendi, “Kenga, mema awa. Vika lalo vyasa kunjivindika kunjimbwitika?”

³⁷ Filipu wamukumbulwile ngwendi, “Citava kukumbwitika nga unakulaela na mbunge yove yoshe.” Ikeye wamukumbulwile ngwendi, “Mwa vushunga vene njinakulaela, njinakulaela ngeci Yesu Kilistu ikeye Muna Njambi.”

³⁸ Co uje mukulunu washikile ngeci vemike litemba, co voshe vavali, Filipu na uje mukulunu vashelumukile mu mema, co Filipu wamumbwitikile.

³⁹ Omo vajavulukile mu mema, Munzinzime wa Shukulu Kalunga watwalele Filipu kweka. Co uje mukulunu kamumwene lalo, oloni waile vungenzi vwendi nakuvwaelela manene.

⁴⁰ Oloni Filipu waliwanene ikeye vavenya ali ku Azotase, co waile ku Sesaliya, mu ngila mwoshe waile nakwambulula Vin̄anda Vyavivwa mu vinganda vyoshe.