Vilinga vya Miluwa 7 - Livulu lya Shukulu Kalunga

Majwi a Setefano

¹ Co Muka-kukombelela Wakama wehwile Setefano ngwendi, “Vyuma evi vinapu vya vushunga ndi?”

² Co Setefano wamukumbulwile ngwendi, “Vandolome na vatate njitolilileni! Simbu kanda kukulwila yetu Avilahama waile nakukakala mu Halane, Njambi wa vumpau walisholwele kuli ikeye mu Mesopotamya,

³ co wendekele kuli ikeye ngwendi, ‘Seza naanga yove na lifuti lyove ya ku lifuti lije linjikakumwesa.’

⁴ Asinoni wasezele lifuti lyendi waile nakukala mu lifuti lya Halane. Omo ishe ya Avilahama natsi laja, co Njambi wamutundisile mu lifuti lije wamunenele mu lifuti lino omu mumuli nakukala ololo.

⁵ Oloni Njambi te kanda aane Avilahama mutambela umo wa lifuti ngeci lipwe lyendi embwe, nambe kamutambela kakandondo ka livu, oloni Njambi wamukulaesele kumwanalyo ngeci lipwe lyendi na vatekulwila vendi. A simbu ije Njambi walikumiiye cikumiiyo eci, nameme Avilahama te kanda akale na vana.

⁶ Co evi vikevyo wendekele Njambi kuli ikeye ngwendi, ‘Vatekulwila vove vakakala mu lifuti lya vungenzi, co vakapwa vindungo, co vakavayandesa manene myaka yakupwa 400.

⁷ Oloni njikahisa vanu vaje vavakapangela, co munima ya vyuma evi vatekulwila vove vakatunda mu lifuti lije, co vakanjilemesa mu mutambela uno vene.’

⁸ Asinoni Njambi waanene Avilahama cilika cakutuuka kupwa cimweso ca cikumiiyo. Ngecivene, Avilahama watuwile Isake omo kuneti matangwa atanu na atatu kutunda akusemuka kwendi, co Isake watuwile munendi Yakomba, co Yakomba watuwile vana vendi likumi na vavali, vakukulwila vakutsimana va muyati wetu.

⁹ “Co vana va Yakomba vazivilile cipululu shongo yavo Yosefa, vamulandesele ku vundungo ku Ingito. Oloni Njambi wakele amo nendi,

¹⁰ nakumunyunga mwamuvwa mu tuyando twendi twoshe. Omo Yosefa washolokele ku mesho a mwene wa Ingito, Njambi wamwanene cifwa cakuvwaelelesa na mana, co mwene wa Ingito wapwisile Yosefa nguvulu wakushwana lifuti lyendi lyoshe amo na lipela lyendi.

¹¹ Asinoni kwakele njala ya lyangengela mu lifuti lyoshe lya Ingito na mu Kanana, co njala ije yanenele tuyando twakama. Co vakukulwila vetu kuvasele kuwana vyakulya,

¹² oloni omo Yakomba wazivile ngwavo ku Ingito kuli vyakulya, watumineko vana vendi, vakukulwila vetu, a vungenzi vwavo vwakulivanga.

¹³ Co a vungenzi vwavo vwamucivali Yosefa walisholwele kuli vandolome vendi, co mwene wa Ingito wazivukile naanga ya Yosefa.

¹⁴ Ngecivene, Yosefa watumine lijwi kuli ishe Yakomba ngeci vakamuleke na naanga yendi yoshe, vapwile makumi atanu na avali na vatanu vaije ku Ingito.

¹⁵ Asinoni Yakomba waile ku Ingito, co ikeye na vana vendi vatsililile kuje.

¹⁶ Co mivila yavo vaitwalele ku Shekeme kuje vavatsindile mu mbumbo ya Avilahama ije yalandele na vimbongo kuli vana va Hamole.

¹⁷ “Oloni omo simbu ya cikumiiyo cije calikumiiye Njambi na Avilahama yakele muyehi, co vanu vetu vatumine manene mu Ingito.

¹⁸ Akukotoka kwashwanene mwene weka mu Ingito uje kazivukile Yosefa.

¹⁹ Ikeye wanyanyamenene vakukulwila vetu nakuvapangesa na muuka, kuvasindiya ngeci vombile kuti vana vavo ngeci vatse.

²⁰ A simbu eyi vene Mosesa wasemukile, wapwile mwanike wamuvwa manene. Co vamulelele mu njuvo vingonde vitatu,

²¹ co omo vamutuwisile mu njuvo yavo, muna mwene wamwambatele nakumulela mwamuvwa ngwe munendi.

²² Co vamulongesele mana oshe a vaka-Ingito, co wapwile munalume wakama mukwendeka kwendi na mu vilinga.

²³ “Omo Mosesa wakele na myaka makumi awana, wayongwele kuya nakukamona vati vavushoko vwendi vaIsalele vakele nakuvapangeselamo.

²⁴ Co wamwene kaIngito alinakuyandesa umo wa ku vavushoko vwendi, ngecivene, washwenyeleko watsiile uje kaIngito.

²⁵ (Wayongwele ngwendi amo vavushoko vwendi vakazivuka ngeci Njambi akamupangesa ngeci akavapatule, oloni kuvazivukile.)

²⁶ Co alikaki wamwene vaIsalele vavali valinakulwa, co wavakandele wendekele kuli vakevo ngwendi, ‘Eni vanalume tolilileni, yeni muvushoko vweni, omwo vika mulinakulilwisila?’

²⁷ Oloni uje munalume wakele nakulwisa mukwavo wanakwile Mosesa, co wendekele kuli ikeye ngwendi, ‘Iya nakupwisa muka-kushwana nambe lyaako akati ketu?

²⁸ Kuma yove ushaka kunjitsiya ngwe muunatsiile uje kaIngito izau ndi?’

²⁹ Omo Mosesa wazivile majwi awa, co watewele kutunda ku Ingito waile nakukakala mu lifuti lya Mindyani. Kuje wakakitilileko vana vavali va vanalume.

³⁰ “Omo kwetile myaka makumi awana, kangelo washolokele kuli Mosesa mu mulangi wa tuhya twakele nakushukuma mu liputa mu mambo kuyehi na Munkinda wa Sinai.

³¹ Omo wamwene evi Mosesa walikomokelele a cuma cije camwene, co washwenyele kuyehi na liputa kukakengesesa mwamuvwa. Oloni wazivile lijwi lya Shukulu Kalunga ngwalyo,

³² ‘Yange Njambi ya vakukulwila vove, Njambi ya Avilahama na Isake na Yakomba.’ Co Mosesa wajajele nakuziva lyova, co kakengeleko lalo.

³³ Co Shukulu Kalunga wendekele kuli ikeye ngwendi, ‘Tundisa vin̄aku ku mendi ove, omwo a mutambela awunemana anapu a livu lyakujela.

³⁴ Njinamono kayando kakama ka vanu vange mu Ingito. Co njinazivi kukemanga kwavo, co njinaija nakuvamena. Co ija ololo, njikakutume ku Ingito.’

³⁵ “Ou ikeye Mosesa uje ivavyanene vanu va Isalele vamwihwile ngwavo, ‘Iya nakupwisa muka-kushwana nambe lyaako akati ketu?’ Ikeye vene uje yatumine Njambi kupwa muka-kushwana vanu nakuvapatula akukwasa kwa kangelo uje wamusholokelele mu liputa lije lyakele nakwenya.

³⁶ Ikeye watundisile vanu mu Ingito, co walingile vizivukiso na vikomokeso mu Ingito na ku Lishali Lyakuvenga na mu mambo lalo a myaka makumi awana.

³⁷ Ou ikeye Mosesa uje walekele vanu va Isalele ngwendi, ‘Njambi akamitumina muka-kwimanena ngwe mwatumine yange, co akatunda akati keni vavenya.’

³⁸ Ikeye wakele amo na vanu va Isalele omo vakungulukilile mu mambo, wakele amo na vakukulwila vetu na kangelo uje wendekele kuli ikeye a Munkinda wa Sinai, co watambwile vin̄anda vyakuyoya vya Njambi nakutwanavyo.

³⁹ “Oloni vakukulwila vetu vavyanene kumwononoka, oloni vamunakwilile kumukulo vashakele ngeci veluke lalo ku Ingito.

⁴⁰ Ngecivene, vendekele kuli Alone ngwavo, ‘Tumungile vinjambi vatutwamenene. Kutuzivuka cuma muka cinalingiwa kuli Mosesa uje watutundisile ku Ingito.’

⁴¹ Co ikeyo vene simbu ije ivamungile kamponya mu cifwa ca ngombe wa nkomba nakukombelelako n̄ombelo nakulinga ciwano cakusingimika cuma cije civalingile.

⁴² Oloni Njambi wavakengesele nima, co wavecelele ngeci valemese vingongonosi vya mwilu, ngwe muvanasoneka mu livulu lya vaka-kwimanena ngwavo, ‘Vanu va Isalele! Kesi kuli yange mwatsiilile nakukombelela tusitu a myaka makumi awana mu mambo, embwe.

⁴³ Co yapwile mbalaka ya njambi Moleki ije mwambatele, na cifwa ca Lefane, njambi yeni wa vingongonosi, ava vakevo tumponya tweni mwapangele ngeci muvalemese. Co njikamituma ku vunzinda musambwa ya Mbambilone.’

⁴⁴ “Vakukulwila vetu vakele na Mbalaka Mwakuliwanena mu mambo. Vaipangele ngwe Njambi mwashikile Mosesa ngeci vaipangemo, ngwe mu cifwa cije vene civamwesele Mosesa.

⁴⁵ Munima yevi, vakukulwila vetu vaje vatambwile mbalaka kuli vaishavo vayambatele omo vaile na Yoshwa nakutambula lifuti ku miyati ije yashekelemo Njambi omo vakele nakuya kulutwe. Ngecivene, cakele kuje noo a simbu ya Ndaviti.

⁴⁶ Ikeye Ndaviti wawanene kutetela ku mesho a Njambi, co walombele Njambi amutave ngeci atungile Njambi ya Yakomba njuvo.

⁴⁷ Oloni Solomoni ikeye wamutungilile njuvo.

⁴⁸ “Oloni Njambi wa Akamwa ya Vyoshe kesi kukala mu vinjuvo vyakutunga vanu, ngwe muje alinakwendeka muka-kwimanena ngwendi,

⁴⁹ ‘Shukulu Kalunga alinakwendeka ngwendi, lilu lyapwa litanda lyange, co ano asi apwa vulyatelo vwange. Njuvo ya muyati ukajo mwasa kunjitungila? Mutambela wa muyati ukajo munjikala yange?

⁵⁰ Kesi yange vene njatangele vyuma vyoshe evi ndi?’

⁵¹ “Setefano wendekele kuli vakevo ngwendi, ‘Yeni vanu vakukaluwa! Yeni vanu va vimbunge vyakujeneka kukulaela, matwi eni anashoko ku lijwi lya Njambi! Yeni lalo mulinakuvyana Munzinzime Wakujela ngwe muvalingile vakukulwila veni.

⁵² Muka-kwimanena mukajo ivajenekele kuyandesa vakukulwila veni? Vakukulwila veni vatsiile miluwa va Njambi vaje ku san̄ulu vambulwile kwija kwa Ngamba yendi wa vushunga. Co ololo yeni munamwende vungungu nakumutsiya.

⁵³ Yeni mwatambwile lishiko lya Njambi, lije livamyanene tungelo, oloni kumwalyononokele!’ ”

Setefano vamwasha mamanya

⁵⁴ Omo vaje vaka-Munga vatolililile kuli Setefano, co valuvalele manene nakulishumanga ku mayo avo mukuviilila.

⁵⁵ Oloni Setefano washulile na Munzinzime Wakujela wakengele mwilu, co wamwene vumpau vwa Njambi na Yesu nemana ku livoko lya cilyo lya Njambi.

⁵⁶ Wendekele ngwendi, “Kengeni! Njinamono lilu linashokoloka na Muna Munu nemana ku livoko lya cilyo lya Njambi!”

⁵⁷ Oloni vaje vaka-Munga vatambekele na lijwi lyakama manene vazikile mu matwi avo. Co voshe vaile vwasi kuli ikeye a simbu imolika,

⁵⁸ asinoni vamukokelele anja ya nganda, co vamwashele mamanya. Vakaleo vasezele vikoveyo vyavo nakuvinyunga kuli mukwenje umo lizina lyendi Saulu.

⁵⁹ Co vakele nakwasha mamanya Setefano omo wakele nakulombela ngwendi, “Mwene Yesu tambula munzinzime wange!”

⁶⁰ Co watsikamene a mavuli watambekele na lijwi lyakama ngwendi, “Mwene! Kesi wanuke vuvi vwavo ovu vuvanalingi!” Co omo wendekele majwi awa, watsile.