Vilinga vya Miluwa 4 - Livulu lya Shukulu Kalunga

Petulu na Yowano ku mesho a Munga

¹ Co Petulu na Yowano omo vakele nakwendeka na vanu omo vaka-kukombelela vamo, na mukulunu wa vaka-kunyunga Njuvo ya Shukulu Kalunga, na vaSanduki vamo vezile.

² Vaviililile manene omwo miluwa ava vavali vakele nakulongesa vanu ngwavo Yesu nasanguka ku vatsi, eci casholwele ngeci vatsi vakasanguka.

³ Ngecivene, vavakwatele nakuvaka mu kamenga noo alikaki, omwo kwapwile cingwezi.

⁴ Oloni vavangi vaje vazivile lijwi vakulaelele, co vungi vwa vanalume vapwile 5,000.

⁵ Alikaki vantwama va vaYunda, na vakulunu, na valongisi va majwi a Lishiko vakungulukilile mu Yelusalema.

⁶ Valiwanene amo na Anase Muka-kukombelela Wakama na Kayafase na Yowano na Alekizanda na voshe vaje vapwile vaka-naanga ya Muka-kukombelela Wakama.

⁷ Co vemikile miluwa ku mesho avo vavehwile ngwavo, “Vati munalingi eci? Nzili yeyayo mulinayo? Nambe mu lizina lyeyajo munalingi cuma eci?”

⁸ Asinoni Petulu akushula na Munzinzime Wakujela, wavakumbulwile ngwendi, “Yeni vantwama va vanu na vakulunu,

⁹ nga mulinakutwihula lelo a vilinga vyavivwa vinalingiwa kuli munalume ou cilema na vati munu ou nakanguka,

¹⁰ asinoni yeni voshe munapande kuzivuka, na vanu voshe va mu Isalele vanapande kuzivuka ngeci munu ou nemana ku mesho eni nakanguka mwamuvwa mu nzili ya lizina lya Yesu Kilistu wa ku Nazaleta, uje imwashukikile a cilindakano, uje yasangwile Njambi ku vatsi.

¹¹ Yesu ikeye uje visoneka vyendekele ali ikeye ngwavyo, ‘Limanya lije limwayeluwisile yeni vaka-kutunga likelyo linapu lya seo yakama kutuvakana oshe.’

¹² Kutwasa kuwana kwovoka muli weka lalo embwe, omwo kukwesi lizina lyeka muno mu kaye lyanaana Njambi ku vanu litunapande kwovokelamo.”

¹³ Vaka-Munga vakomokele omo vamwene kusimpa kwa Petulu na Yowano nomu vavamwene ngeci vapwile vanu vangoco vakujeneka kulilongesa. Co vavanongonwene ngeci vakevo vakele amo na Yesu.

¹⁴ Oloni akumona uje munu nakanguka nemana amo na Petulu na Yowano, kuvasele kwendeka cuma cimo.

¹⁵ Ngecivene, vavalekele vatuuke mu njuvo ya Munga, co vashangumukile kulyendekesa akati kavo ngwavo,

¹⁶ “Vika tulinga na ava vanalume? Omwo munu woshe mu Yelusalema nazivuka ngeci eci cizivukiso caciha civanalingi, co kutwasa kucivyana.

¹⁷ Oloni kuvindika cuma eci ngeci kesi citsimane lalo akati ka vanu, tunanguleni ava vanalume ngeci kesi vendeke lalo kuli munu mu lizina lya Yesu.”

¹⁸ Ngecivene, vavasanene mukati vavashikile ngeci kesi vendeke nambe kulongesa lalo mu lizina lya Yesu.

¹⁹ Oloni Petulu na Yowano vavakumbulwile ngwavo, “Yeni vavenya waneni cuma muka cacivwa ku mesho a Njambi, kwononoka yeni nambe kwononoka Njambi.

²⁰ Omwo kutwasa kwoloka kwendeka vyuma vije vitwamono nevi vitwazivi.”

²¹ Ngecivene, Munga ije vavanangwile manene, co vavecelele. Vamwene ngeci capwile cacikalu kuvanyanyamesa, omwo vanu voshe vashangazalele Njambi a vije vyalingiwile.

²² Omwo uje munalume ivalingilile cikomokeso cakumukangwisa wakele na myaka makumi awana.

Vaka-kukulaela valomba a kusimpa

²³ Omo Petulu na Yowano vavecelele, velukile kuli vasamba vavo nakuvaleka vije vivendekele vakulunu va vaka-kukombelela na vakulunu.

²⁴ Co omo vaka-kukulaela vazivile vyuma evi, voshe vakungulukile amo nakulombela kuli Njambi ngwavo, “Shukulu na Ishamatanga wa lilu na asi, na mema a kalunga na vyoshe vilimo!

²⁵ Yove wendekele na Munzinzime Wakujela muli kukulwila yetu Ndaviti, ngamba yove, omo ikeye wendekele ngwendi, ‘Omwo vika ava kesi vaYunda valuvalele? Omwo vika vanu vatumba matumbe angoco?

²⁶ Vimyene va ano asi valivwaeselele cimweja vakevo vavenya, na vaka-kushwana valikungulwile amo nakutumba matumbe amavi akulwisa Shukulu Kalunga na Wakuvwavesa.’

²⁷ “Omwo mwa vushunga vene Helonde na Pontiyu Pilato valikungulwile amo mu nganda ino amo na ava kesi vaYunda na vanu va Isalele nakulwisa Yesu, Ngamba yove wakujela uje iwavwavesele.

²⁸ Valikungulwile nakulinga vyoshe vije viwashakele laja na nzili yove na cizango cove ngeci vikalingiwe.

²⁹ Co ololo, Shukulu Kalunga, kenga muvali nakutushungwiya, co twane kusimpa yetu vangamba vove, ngeci twambulule lijwi lyove.

³⁰ Sholola livoko lyove mukukangwisa, co tava ngeci vikomokeso na vizivukiso vavipange mu lizina lya Ngamba yove wakujela Yesu.”

³¹ Co omo vamanesele kulombela, mwela uje vakungulukilile wajajele. Co voshe vashulile na Munzinzime Wakujela, co vambulwile lijwi lya Njambi nakusimpa.

Vaka-kukulaela valipangezela vufuko vwavo

³² Mbunga ya vaka-kukulaela vakele na mbunge imolika na viyongola vimolika, naumo wai watumbwile vyuma vyendi vije vyafukile kupwa vyendi, oloni valipangezelele vyoshe vyavo vije vivakele navyo.

³³ Co na nzili yakama miluwa vambulwile vukaleo vwakusanguka kwa Mwene Yesu, co voshe Njambi wavavezikisile na vivezikiso vyakama.

³⁴ Kukwakele umo akati kavo wajenekele cuma. Omwo vaje vakele na mahya nambe vinjuvo vavilandesele, co vanenele vije vimbongo vivatambwile ku vyuma vije valandesele,

³⁵ co vavyanene kuli miluwa, co vije vimbongo vavipangelele ku munu na munu ngwe kukujeneka kwendi.

³⁶ Co Yosefa, kaLevi uje wasemukilile mu Sepulasi, uje miluwa vamutumbwile ngwavo Mbanambasa (kulumbunuka ngwavo, “Muka-kuzembeleka”),

³⁷ walandesele lihya lyendi, co wanenele vimbongo, wavyanene kuli miluwa.