Vilinga vya Miluwa 3 - Livulu lya Shukulu Kalunga

Munalume wa cilema akanguka

¹ A litangwa limo Petulu na Yowano vaile ku Njuvo ya Shukulu Kalunga a simbu yakulombela, yapwile simbu ya maola atatu ku cingwezi.

² Co kuje ku cikolo civatumbwile ngwavo Cikolo Cacivwa ca Njuvo ya Shukulu Kalunga, kwakele munalume umo wapwile cilema tunde kukusemuka kwendi. Vakele nakumutwala-twala ku cikolo a litangwa na litangwa ngeci alombe vwana kuli vanu vaje vakovelele mu Njuvo ya Shukulu Kalunga.

³ Omo wamwene Petulu na Yowano valinakukovela, wavalombele vwana.

⁴ Petulu na Yowano vamukengele shwii, co Petulu wendekele kuli ikeye ngwendi, “Tukenge!”

⁵ Ngecivene, wavakengele shwii, wayongwele ngwendi amo atambula cuma kuli vakevo.

⁶ Oloni Petulu wendekele kuli ikeye ngwendi, “Kunjesi na vimbongo, oloni eci njilinaco cikeco cinjikwana, mu lizina lya Yesu Kilistu wa ku Nazaleta njikushika ngwange katuka wende!”

⁷ Asinoni wamukwatele ku livoko lyendi lya cilyo wamukatwile. Aje vene vitsiya vya ku vilyato vyendi na vya mu tusendengele twendi vyakele na nzili,

⁸ co watumbukile, wemanene, co washangumukile kwenda. Asinoni wakovelele amo navo mu Njuvo ya Shukulu Kalunga, wendele nakutumbozoka nakushangala Njambi.

⁹ Co vanu voshe kuje vamumwene alinakwenda nakushangala Njambi,

¹⁰ co omo vamuzivukile ngeci ikeye uje watumbamene ku cikolo cije civatumbwile ngwavo Cikolo Cacivwa ca Njuvo ya Shukulu Kalunga nakulomba vwana, co voshe valikomokelele a cuma cije calingiwile kuli ikeye.

Muzimbu wa Petulu mu Njuvo ya Shukulu Kalunga

¹¹ Omo uje munalume wakakateyeye Petulu na Yowano mu Mbalanda ya Solomoni, vanu voshe valikomokelele, co vashatukilile kuli vakevo.

¹² Omo Petulu wamwene vaje vanu, wendekele kuli vakevo ngwendi, “Yeni vakwetu vaIsalele, vikajo munalikomokela a cuma eci? Nambe vikajo mutukengela shwii? Mwayongola ngweni eci cinalingiwa mu nzili yetu nambe mu vushunga vwetu mukemwo tunakangwisa ou munu ndi?

¹³ Njambi ya Avilahama na Isake na Yakomba, Njambi ya vakukulwila vetu, ikeye naana vumpau kuli Ngamba yendi Yesu. Oloni yeni mwamwanene kuli vaka-kushwana, co mwamuvyanene ku mesho a Pilato nameme Pilato te nayongola kumwecela.

¹⁴ Oloni wapwile wakujela, wa vushunga, oloni mwamuvyanene, mwalombele Pilato amyecelele uje lipwepwe.

¹⁵ Co mwatsiile uje ikeye vavenya mwonyo, oloni Njambi wamusangwile ku vatsi, co yetu tunapu tu vakaleo va cuma eci.

¹⁶ Co yapwile nzili ya lizina lyendi ikeyo inakangwisa munu ou. Evi vimunamono nevi vimunazivuka vinalingiwa akukulaela mu lizina lyendi, kukulaela kuli Yesu kukekwo kunamukangwisa, ngwe mumunamono yeni voshe.

¹⁷ “Co ololo vakwetu, njinazivuka ngeci vije mwalingile kuli Yesu yeni na vantwama veni vyapwile nzimba.

¹⁸ Njambi wavisholwele laja kuli vaka-kwimanena voshe ngwendi Wakuvwavesa wendi akayanda, co capwile ca vushunga mu ngila eyi.

¹⁹ Tengulukeni, asinoni ilukeni kuli Njambi, ngeci amisambese ku vivi vyeni. Nga mulingamo,

²⁰ simbu ya nzili ya munzinzime ikaija kutunda kuli Shukulu Kalunga, co akatuma Yesu, ikeye Wakuvwavesa uje yanamyangwila laja.

²¹ Napande kukala mwilu noo simbu ikaija omo vyuma vyoshe vikapwa vyaviha, ngwe mwendekele Njambi ali vaka-kwimanena vendi vakujela vakeleko laja.

²² Omwo Mosesa wendekele ngwendi, ‘Shukulu Kalunga Njambi yeni akamitumina muka-kwimanena, ngwe muje mwatumine yange, akapwa umo wakutunda akati ka vanu veni. Mukononoka vyuma vyoshe vije vyakamileka kulinga.

²³ Co woshe kakononoka uje muka-kwimanena vakamwangununa kuli vanu va Njambi, co vakamunyongesa.’

²⁴ Co vaka-kwimanena voshe vaje vakele na muzimbu, kutunda kuli Samwele na vaje vezile munima yendi, navo lalo vambulwile vije vinalingiwa matangwa ano.

²⁵ Vikulaeso vya Njambi ali vaka-kwimanena vinapu vyeni, co muli na mutambela mu lizivasano lije lyalingile Njambi na vakukulwila veni. Ngwe mwendekele kuli Avilahama ngwendi, ‘Ku mbuto yove miyati yoshe ya ano asi vakavezika.’

²⁶ Co Njambi waangwile Ngamba yendi, co wamutumine kuli yeni akulivanga, mukumivezikisa ngeci munu woshe atunde ku vingila vyendi vya kupenga-penga.”