Vilinga vya Miluwa 26 - Livulu lya Shukulu Kalunga

Paulu alyamena ku mesho a Angilipa

¹ Angilipa wendekele kuli Paulu ngwendi, “Ololo uli na simbu yakulyamena yove vavenya.” Co Paulu wolwele livoko lyendi nakulyamena ngwendi,

² “Mwene Angilipa! Njamono ngwange njavezika akulyamena yange vavenya ku litangwa lya lelo ku mesho ove a vyuma vyoshe valinakunjivangela vaYunda,

³ omwo unazivuka mwamuvwa futisi na vyendeka vya vaYunda. Ngecivene, njilinakukulomba ngwange unjitolilile nakusimpa.

⁴ “VaYunda voshe vazivuka vati njinayoyo tunde ku vukwenje vwange. Vazivuka kuyoya kwange kwoshe, akulivanga mu lifuti lyange vavenya na mu Yelusalema.

⁵ Simbu yoshe vanazivuka, nga vali na cizango cakutava vukaleo ovu, tunde akulivanga njayoyele ngwe umo wa vaka-munga yetu yakulemesa, munga ya vaFaliseo.

⁶ Co ololo njinemana kuno ngeci vanjisompe omwo a cinyangavili njilinaco mu cikulaeso ca Njambi cije calingile kuli vakukulwila vetu,

⁷ cuma cije vene miyati likumi na ivali ya vanu vetu vakengelelele ngeci vacitambule omo valemesa Njambi mutanya na vutsiki. Omwo a cinyangavili eci vene, Yove Shukulu, akeo vaYunda valinakunjivangela!

⁸ Omwo vikajo yeni mulikuno munawana kukaluwa akukulaela ngeci Njambi akasangula vatsi?

⁹ “Nange vene njayongwele ngwange njasa kulinga vyuma vyavingi vyakulwisa lizina lya Yesu wa ku Nazaleta.

¹⁰ Evi vikevyo njalingile mu Yelusalema. Njatambwile moko yakutunda kuli vakulunu va vaka-kukombelela nakwaka mu kamenga vanu va Njambi vavangi, co omo vavasompelele kutsa, nange lalo njatavele kutsa kwavo.

¹¹ Co visimbu vyavingi njavanyanyamesele mu masinangonge nakweseka kuvasindiya ngeci vavyane kukulaela kwavo. Co njaluvalele manene navo ngeci njaile ku vinganda vyeka nakuvayandesa.

Paulu avaleka kutenguluka kwendi

¹² “ Mukemwo a vutumbe ovu vene njakatukile nakuya ku Ndamasiku na moko na lishiko lyakutunda kuli vakulunu va vaka-kukombelela.

¹³ A ngila omo simbu yapwile akati ka mutwe, Yove Mwene, njamwene ceke cakuvyazima manene kutuvakana litangwa catundile mwilu canjizengelekele na vanu vaje njendele navo.

¹⁴ Co tuvavoshe twawililile asi, co njazive lijwi lyendekele kuli yange mu ciHevelu ngwalyo, ‘Saulu, Saulu! Vika ulinakunjiyandesela? Ulinakulivulumuna yove vavenya omwo ulinakulyamena, ngwe ngombe wakulimisa alyatangela ku citi ca shukulu yendi.’

¹⁵ Co njehwile ngwange, ‘Yove iyajo, Mwene?’ Co Mwene wakumbulwile ngwendi, ‘Yange Yesu, uje iwulinakuyandesa.

¹⁶ Oloni katuka. Njinasholoka kuli yove mukukwimika ngeci upwe u ngamba yange. Unapande kuleka vakweni vije viwunamono ali yange ku litangwa lya lelo na vije vinjikakumwesa kulutwe.

¹⁷ Njikakwamena kuli vanu va Isalele na kuli vaje kesi vaYunda kuje kunjikakutuma.

¹⁸ Ukatonesa mesho avo nakuvatundisa ku lisusulungu nakuvatwala ku ceke nakuvatundisa ku nzili ya Satana nakuvatwala kuli Njambi, ngeci akukulaela kwavo kuli yange vakavasambese ku vivi vyavo nakutambula mwela wavo akati ka vanu vaje vanaangula Njambi.’

Paulu avaleka vipangi vyendi

¹⁹ “Ngecivene, Mwene Angilipa, njononokele cimona cije njamwene catundile mwilu.

²⁰ Oloni akulivanga njambulwile mu Ndamasiku, co mu Yelusalema, asinoni na mu lifuti lyoshe lya Isalele na akati ka vaje kesi vaYunda, njambulwile ngeci vanapande kutenguluka ku vivi vyavo nakwiluka kuli Njambi nakulinga vyuma vije vimwesa ngeci vanatenguluka.

²¹ Omwo a cuma eci akeo vanjikwatelele vaYunda mu Njuvo ya Shukulu Kalunga, co vashakele kunjitsiya.

²² Oloni na ku litangwa lya lelo Njambi nanjikwasa, ngecivene, njinemana kuno mukwana vukaleo vwange kuli yeni voshe, vakulunu na vanike. Vije vinjendeka vinapu vimo vije vendekele vaka-kwimanena na Mosesa ngeci vikalingiwa,

²³ ngwavo Wakuvwavesa napande kuyanda nakupwa umo wakulivanga kusanguka ku vatsi nakwambulula ceke cakwovoka kuli vaYunda na kuli vaje kesi vaYunda.”

²⁴ Co omo Paulu wakele nakulyamena mu ngila eyi, Fesitase watambekele kuli ikeye ngwendi, “Ove Paulu unazaluka! Kulilongesa kwove kwakama kulinakukuzalwisa!”

²⁵ Oloni Paulu wakumbulwile ngwendi, “Kunjazalukile, Yove Mwene Fesitase! Njilinakwendeka majwi amavwa a vushunga.

²⁶ Omwo Mwene uzivukz vyuma vyoshe evi, co njendeka kuli yove nakusimpa. Njazivuka mwa vushunga ngwange unatambula vyuma evi cimo na cimo, omwo vyuma evi kuvyalingiwilile mu vushweke embwe.

²⁷ Mwene Angilipa, unakulaela vaka-kwimanena ndi? Njazivuka ngwange unakulaela!”

²⁸ Co Angilipa wendekele kuli Paulu ngwendi, “Mu simbu eyi yaindondo lika uyongola ngwove wasa kunjipwisa Muka-Yesu ndi?”

²⁹ Co Paulu wakumbulwile ngwendi, “Nambe mu simbu yaindondo nambe mu simbu yakama, lilombelo lyange kuli Njambi linapu ngeci yove neni voshe mulinakunjitolilila litangwa lya lelo mupwe ngwe yange, oloni kesi na malyenge awa embwe!”

³⁰ Asinoni mwene, amo na nguvulu na Mbenisi na voshe vaje vakele navo vakatukile,

³¹ co omo vakatukile valyendekesele ngwavo, “Ou munalume kalingile cuma cimo cije canapande kutsila nambe kumwaka mu kamenga.”

³² Co Angilipa wendekele kuli Fesitase ngwendi, “Nga ou munalume katwalele n̄anda yendi kuli Nguvulu nga tunamwecela.”