Vilinga vya Miluwa 25 - Livulu lya Shukulu Kalunga

Paulu atwala n̄anda yendi kuli Nguvulu Wakama

¹ Omo kwetile matangwa atatu Fesitase wetele mu lifuti lije, watundile ku Sesaliya waile ku Yelusalema,

² co kuje vakulunu va vaka-kukombelela na vantwama va vaYunda vatwalele vin̄anda vyavo vyakwana mulonga Paulu. Co valombele Fesitase

³ ngeci avakwaseko atume Paulu ku Yelusalema, omwo vatumbile vutumbe vwakumutsiila a ngila.

⁴ Fesitase wakumbulwile ngwendi, “Paulu valinakumunyungila mu Sesaliya, co yange vene ololo njilinakwilukako lalo.

⁵ Ngecivene, vantwama veni vanapande kuya amo nange vakaane mulonga ou munalume nga nalingi cuma cimo cacivi.”

⁶ Omo Fesitase wakele matangwa eka lalo akupwa atanu na atatu nambe likumi amo navo asinoni waile ku Sesaliya. Co litangwa likwavo watumbamene mu mbanja yakusompela, co washikile ngeci vanene Paulu.

⁷ Omo Paulu wetele, vaYunda vaje vatundile ku Yelusalema vemanene nakumuzengeleka vashangumukile kumwana mulonga a vyuma vyavingi, vije kuvasele kuwana vukaleo.

⁸ Oloni Paulu walyamenene ikeye vavenya ngwendi, “Kunjalingile cuma cimo cacivi cakulwisa Lishiko lya vaYunda nambe kulwisa Njuvo ya Shukulu Kalunga nambe kulwisa Nguvulu wa vaLoma.”

⁹ Oloni Fesitase washakele kuvwaelelesa vaYunda, ngecivene, wehwile Paulu ngwendi, “Ushaka kuya ku Yelusalema nakukusompelako a vin̄anda evi ku mesho ange ndi?”

¹⁰ Paulu wendekele ngwendi, “Njinemana mu mbanja ya vavenya Nguvulu yakusompela, muje vanapande kunjisompa. Nacimo cacivi cinjinalingi kuli vaYunda cai, ngwe muuzivukila yove vavenya.

¹¹ Nga njinapokola lishiko nakulinga cuma cimo cije njinapande kutsila, kunjilombo ngwange munjovole ku kutsa embwe. Oloni nga kumwesi vushunga mu vyuma evi vashaka kunjiwanena mulonga, naumo wai asa kunjana ku mavoko avo. Njitwala n̄anda yange kuli Nguvulu.”

¹² Asinoni Fesitase, omo nalizivasana na vaka-kumunangula wakumbulwile ngwendi, “Unatwala n̄anda yove kuli Nguvulu, ngecivene, kuli Nguvulu kukekwo uya.”

Paulu ku mesho a Angilipa na Mbenisi

¹³ Omo kwetile matangwa amo, Mwene Angilipa na Mbenisi vezile ku Sesaliya nakwindwisa Fesitase.

¹⁴ Co omo vakele kuje matangwa amo, Fesitase walekele mwene n̄anda ya Paulu ngwendi, “Kuli munalume umo yasezele Felikisi mu kamenga,

¹⁵ co omo njaile ku Yelusalema, vakulunu va vaka-kukombelela na vakulunu vanjilekele mulonga wendi, co vanjilombele ngwavo njimuhise.

¹⁶ Oloni njavalekele ngwange kucitava yetu vaLoma kuhisa munu uje ivanavangela mulonga simbu kanda alimone mesho na mesho na vaje vanamuvangela, nakumwana simbu yakulyamena ku mulonga wendi.

¹⁷ Omo vezile kuno, co kunjeshwalele, oloni alikaki njatumbamene mu mbanja yakusompela nakushika ngeci vanene uje munalume.

¹⁸ Omo vaka-kumulwisa vemanene, oloni kuvamuwanenene mulonga a cuma cimo cacivi ngwe muje munjayongwele.

¹⁹ Oloni vakele lika na vimata nendi a futisi yavo na a munalume umo lizina lyendi Yesu, uje watsile, oloni Paulu amwambulula ngwendi alinakuyoya.

²⁰ Yange njakele na citanga vatijo njasa kuwana vukaleo a vyuma evi, co njehwile Paulu nga ashaka kuya ku Yelusalema ngeci vakasompele mulonga wendi kuje.

²¹ Oloni Paulu walombele ngeci vamunyunge nakuvandamena Nguvulu kukenga a n̄anda yendi. Ngecivene, njashikile ngwange vamunyunge noo njikamutuma kuli Nguvulu.”

²² Co Angilipa wendekele kuli Fesitase ngwendi “Nange lalo njishaka kumutolilila ou munalume.” Fesitase wakumbulwile ngwendi, “Ukamutolilila imene.”

²³ Ngecivene, alikaki Angilipa na Mbenisi vezile voshe mu vulemu vwavo vwakama, co vakovelele mu njuvo yakama mwakuliwanena vanu vavangi na vamyata va mashwalale na vanalume va vulemu vamuje mu nganda. Asinoni akushika kwa Fesitase, co vanenele Paulu.

²⁴ Co Fesitase wendekele ngwendi, “Mwene Angilipa neni voshe muli netu muno. Munamono ou munalume uje vaYunda voshe vaje vali kuno na vaje vali mu Yelusalema, vali na vin̄anda ali ikeye vije vananena kuli yange. Valinakutambeka ngwavo kapandele lalo ayoye.

²⁵ Oloni kunjawanene cuma cimo canalingi cije canapande kutsila. Omo vavenya walombele kutwala n̄anda yendi kuli Nguvulu, co njayongwele kumutuma.

²⁶ Oloni kunjesi na cuma cimo ali ikeye cakusonekela Nguvulu. Ngecivene, njinamunena kuno ku mesho eni, vunene vene ku mesho ove Mwene Angilipa, ngeci omo unakenge a n̄anda yendi, amo njikawana vimo vyakusoneka.

²⁷ Omwo kucisholola mwamuvwa kuli yange kutuma cinzinda kujeneka kumwesa mwamuvwa mulonga wanalingi.”