Vilinga vya Miluwa 19 - Livulu lya Shukulu Kalunga

Paulu mu Efeso

¹ Omo Apolo wakele mu Kolinte, Paulu wendele mu mutambela wa lifuti lije, co wetele mu Efeso. Kuje wawaneneko vandongisi vamo,

² co wavehwile ngwendi, “Mwatambwile Munzinzime Wakujela omo mwakulaelele ndi?” Co vamukumbulwile ngwavo, “Yetu kanda tucizive ngwavo kwakala Munzinzime Wakujela.”

³ Co Paulu wavehwile ngwendi, “Kumbwitika kwa muyati ukajo vamimbwitikile?” Vamukumbulwile ngwavo, “Kumbwitika kwa Yowano.”

⁴ Co Paulu wendekele ngwendi, “Kumbwitika kwa Yowano kwapwile kwa vaje vatengulukile ku vivi vyavo, co walekele vanu va Isalele ngeci vakulaele kuli umo uje akaija munima yendi, ikeye Yesu.”

⁵ Omo vazivile eci, vavambwitikile mu lizina lya Mwene Yesu.

⁶ Paulu wakambekele mavoko endi ali vakevo, co Munzinzime Wakujela wezile ali vakevo, vendekele mu vindaka vyeka, co lalo vambulwile muzimbu wa Njambi.

⁷ Voshe vapwile vanalume likumi na vavali.

⁸ Co Paulu waile mu sinangonge, co a vingonde vitatu wambulwile nakusimpa kuli vanu nakusimutwiya navo nakweseka manene kuvalambelela a Vumwene vwa Njambi.

⁹ Oloni vamo vavo vapwile vakukaluwa kuvasele kukulaela, co vendekele vyuma vyavivi a Ngila ya Mwene ku mesho a mbunga yoshe. Ngecivene, Paulu wavasezele nakuya amo na vaka-kukulaela, co a litangwa na litangwa wasimutwiiye navo mu njuvo yakulilongesela ya Tilanase.

¹⁰ Eci calingiwile a myaka ivali, ngecivene, vanu voshe vaje vakele mu lifuti lya Asiya, voshe vaYunda na vaje kesi vaYunda vazivile lijwi lya Mwene.

Vana va Sikeva

¹¹ Co Njambi walingile vizivukiso vyeka na vyeka muli Paulu.

¹² Ngecivene, nameme tuvinanga twatundondo twa ku livoko lyendi na tuvuzalo tuje twapangesele Paulu vavyakele ali vaka-kuvinja, co vakangukile ku mishongo yavo, na minzinzime yakujwala yakele muli vakevo yavatundile.

¹³ Asinoni vaYunda vamo vakele nakwendangana nakutundisa minzizime yakujwala navo lalo vesekele kupangesa lizina lya Mwene Yesu mukulinga cuma eci. Co vendekele ku minzinzime yakujwala ngwavo, “Njikushika mu lizina lya Yesu uje yalinakwambulula Paulu.”

¹⁴ Vandolome vatanu na vavali, vana va kaYunda lizina lyendi Sikeva Muka-kukombelela Wakama, vakele nakulinga cuma eci.

¹⁵ Oloni munzinzime wakujwala wendekele kuli vakevo ngwawo, “Yesu njimuzivuka, co Paulu lalo njimuzivuka, oloni yeni yeni veyajo?”

¹⁶ Co uje munalume wakele na munzinzime wakujwala wavajombokelele nakuvalwisa, co wavahyanene. Ngecivene, voshe vatewele nakutunda ku njuvo yendi mutotototo na vimbandu.

¹⁷ Co vaYunda voshe na vaje kesi vaYunda vaje vakele mu Efeso vazivile cuma eci, co vakele na lyova, co lizina lya Mwene Yesu valisingimikile manene.

¹⁸ Co vaka-kukulaela vavangi vezile, valitavelele ku mesho a vanu, co vambulwile vije vivalingile.

¹⁹ Co vavangi vaje vakele nakulinga manseno vanenele mavulu avo amo nakuwenyeka ku mesho a vanu voshe, co valavele ndando ya malivulu aje, co ndando yapwile vimbongo vya siliva yakupwa 50,000.

²⁰ Ngecivene, lijwi lya Mwene lyashandokele nakukola na nzili.

Mpindangano mu Efeso

²¹ Munima ya vyuma evi, Paulu watengulwile viyongola vyendi ngeci aye kutuvakana mu Masendoniya na Akaya nakuya ku Yelusalema. Wendekele ngwendi, “Omo njinai laja kuje, njinapande kumona lalo na kuLoma.”

²² Ngecivene, watumine ku Masendoniya Timateo na Elasitase vaka-kumukwasa vendi vavali, omo ikeye wacikele simbu yakama mu lifuti lya Asiya.

²³ Akeo a simbu eyi vene kwakele mpindangano yakama yakukomokesa mu Efeso a Ngila ya Mwene.

²⁴ Omwo kwakele munu umo muka-kufula vyuma vya siliva lizina lyendi Ndemetelyase, wakele nakufula vifwa vya njuvo ya Atemise njambi wa munakazi, co vipangi vyendi evi vyanenele nganyo yakama manene ku vaka-vipangi.

²⁵ Ngecivene, wasanene voshe amolika na vakwavo veka vaje vakele na vipangi ngwe vyavo, co wendekele kuli vakevo ngwendi, “Eni vanalume, mwazivuka ngweni vufuko vwetu vukatundu ku vipangi evi.

²⁶ Co ololo munamono nakulizivila yeni vavenya evi vyalinakulinga ou mukwetu Paulu. Alinakwendeka ngwendi vinjambi vakupanga ku vanu kesi vinjambi embwe, co nahyana mukukokweya vanu vavangi, kesi munolika mu Efeso embwe oloni na mu lifuti lyoshe lya Asiya.

²⁷ Co kuli vushonde vwakama manene, ngeci vipangi vyetu evi vikashauka. Kesi evi lika, oloni kuli lalo vushonde ngeci njuvo ya Atemise njambi wakama wa munakazi ikapwa yangoco, co lalo vukama vwendi vukahwa, vukama vwa njambi wa munakazi uje ivakalemesa kuli munu woshe muno mu Asiya na mu kaye koshe!”

²⁸ Omo ije mbunga vazivile majwi awa, vaviililile manene vashangumukile kutambeka ngwavo, “Wakama Atemise wa mu Efeso!”

²⁹ Ngecivene, muyoyo ou washandokelele mu nganda mwoshe. Co ije mbunga vakwatele Ngayase na Alisitakase, vaka-Masendoniya vavali vaje vendele amo na Paulu, co vashatukile amo navo kuya ku njuvo yakweela.

³⁰ Paulu vavenya washakele kuya amo na mbunga, oloni vaka-kukulaela kuvamutavesele.

³¹ Vamo vaka-kushwana va mu lifuti lije, vaje vapwile vasamba vwendi, vatumine lalo lijwi kuli ikeye nakumulomba ngeci kesi alisholole mu njuvo yakweela.

³² A simbu ije vene cikungulukilo coshe valingile muyoyo. Vamo vanu vakele nakutambeka cuma cimo, vakwavo vakele nakutambeka cuma cikwavo, omwo vamo vavo kuvazivukile cuma muka vakungulukilile amo.

³³ Vamo vanu vakutile ngeci Alekizanda ikeye wakele na mulonga, omwo vaYunda vamwimikile kulutwe. Co Alekizanda wajundwile livoko lyendi ngeci vanu voloke kuluu, co wesekele kwendeka ngeci alyamene.

³⁴ Oloni omo vanangukile ngeci ikeye wapwile kaYunda, a maola avali voshe vatambekele amo cuma cimolika ngwavo, “Wakama Atemise wa mu Efeso!”

³⁵ Co akukotoka muka-kusoneka wa mu nganda ije wolwesele mbunga. Co wendekele ngwendi, “Vavushoko vwange vaka-Efeso! Munu woshe nazivuka ngeci nganda ya Efeso inapu kanyungi wa njuvo ya njambi wakama Atemise na limanya lyakujela lije lyawile mwilu.

³⁶ Naumo wai asa kuvyana cuma eci. Ngecivene, munapande kwoloka kuluu kesi mulinge cuma cimo ca muuka embwe.

³⁷ Nga munanene ava vanalume kuno nameme vene kuvapukwile njuvo yakulemesela njambi yetu nambe kwendeka vyuma vyavivi ali njambi yetu wa munakazi.

³⁸ Nga Ndemetelyase na vaka-vipangi vendi vali na n̄anda na munu umo, tuli na vaka-kushwana na matangwa vemika akusompa vin̄anda, vaka-kusompa milonga kuje vene.

³⁹ Oloni nga kuli cuma cikwavo cimushaka manene, munapande kucimanesela mu cikungulukilo ca lishiko ca vandambo va mu lifuti.

⁴⁰ Omwo munima yevi vinalingiwa litangwa lya lelo, kuli vushonde vwakama vwakutuvangela ngeci tunalingi mpindangano. Kukwesi kusambesa a muyoyo woshe ou, co kutwasa kwana vukaleo vwavuvwa a cuma eci.”

⁴¹ Co omo wamanesele wendekele majwi awa, washandwele ije mbunga.