Vilinga vya Miluwa 18 - Livulu lya Shukulu Kalunga

Mu Kolinte

¹ Munima ya vyuma evi, Paulu watundile mu Atena waile ku Kolinte.

² Co kuje waliwanene na kaYunda umo lizina lyendi Akwila, wasemukilile ku Pontase, watundile ku Itali na munakazi wendi Pilisila, omwo Nguvulu Kalaundyase washikile ngeci vaYunda voshe vatunde mu Loma. Co Paulu waile nakuvamona,

³ co watumbamene nakupanga amo navo, omwo wakele nakutunga vimbalaka, ngwe muvakele nakulinga vakevo.

⁴ Paulu wakele nakusimutwiya mu masinangonge a Litangwa Lyakuhwima lyoshe mukweseka kukoka vaYunda na vaNgiliki.

⁵ Omo Silasi na Timateo vetele kutunda ku Masendoniya, Paulu simbu yendi yoshe walyanene ku cipangi kwambulula muzimbu nakwana vukaleo kuli vaYunda ngeci Yesu ikeye Wakuvwavesa.

⁶ Omo vamulwisile nakumwendeka vyuma vyavivi, co watotomwene likungu ku vinanga vyendi wendekele kuli vakevo ngwendi, “Nga munazimbala, unapu mulonga weni vavenya! Yange kunjesi na mulonga wai. Kutunda ku litangwa lya lelo nakutwala kulutwe njiya kuli vaje kesi vaYunda.”

⁷ Ngecivene, wavasezele waile nakukakala mu njuvo ya umo kesi kaYunda lizina lyendi Tito Njasitase, uje walemesele Njambi, njuvo yendi yakele kuyehi na sinangonge.

⁸ Co Kilisipase uje wapwile ntwama wa sinangonge wakulaelele kuli Mwene, amolika na naanga yendi, co na vanu vavangi va mu Kolinte vazivile lijwi, vakulaelele, co vavambwitikile.

⁹ Co vutsiki vumo Paulu wamwene cimona, mu cimona cije Mwene wendekele kuli ikeye ngwendi, “Kesi uzive lyova, oloni twalao vene nakwendeka kesi ulikele embwe,

¹⁰ omwo njili amo nove. Co naumo wai asa kukuvulumuna, omwo vanu njili na vavangi mu nganda eyi.”

¹¹ Ngecivene, Paulu wakele kuje mwaka umo na vingonde vitanu na imo, mukulongesa vanu lijwi lya Njambi.

¹² Oloni omo Ngaliyo wapwile nguvulu wa vaLoma mu Akaya, vaYunda valikungulwile amo vakwatele Paulu nakumutwala ku mbanja yakusompela.

¹³ Vendekele ngwavo, “Munalume ou alinakusindiya vanu kulemesa Njambi mu ngila yakulwisa lishiko!”

¹⁴ Oloni omo Paulu washakele kwendeka, Ngaliyo wendekele kuli vaYunda ngwendi, “Nga eyi n̄anda yapwile ya mulonga wakuvulumuna nambe vya vuvi vumo vwanalingi, nga njamitolilila yeni vaYunda.

¹⁵ Oloni omo inapu n̄anda yakulikanangana a majwi na mazina na lishiko lyeni vavenya, munapande kuyishungamesa yeni vavenya. Yange kunjapandele kupwa lyaako wa vyuma evi!”

¹⁶ Co wavashekele mu mbanja.

¹⁷ Co voshe vakokangeyeye Sosetene, uje wapwile ntwama wa sinangonge, vamupupilile ku mesho a mbanja. Oloni Ngaliyo kombileko mbunge ku cuma cije.

Kwiluka ku Antyoke

¹⁸ Paulu wakele mu Kolinte amo na vaka-kukulaela matangwa amangi, asinoni wavasezele nakuya mu vwato ku Silya amo na Pilisila na Akwila. Simbu kanda aciseze Senkilise Paulu watewile ku mutwe wendi omwo cisingo cije walisingile.

¹⁹ Co wetele mu Efeso, kuje Paulu wasezele Pilisila na Akwila. Wakovelele mu sinangonge nakusimutwiya na vaYunda.

²⁰ Omwo vanu vamulombele ngeci atumbame navo simbu yakama, oloni kavatavele.

²¹ Oloni wavalekele omo wavasezele ngwendi, “Nga eci cinapu cizango ca Njambi, co njikeluka lalo kuli yeni.” Co wakovelele mu vwato watundile ku Efeso.

²² Omo wetele ku Sesaliya, waile ku Yelusalema kukameneka cikungulukilo, asinoni waile ku Antyoke.

²³ Munima yakukala navo simbu, watundileko waile mu mutambela wa Ngalatiya na mu Filingiya nakutakamesa vaka-kukulaela voshe.

Apolo mu Efeso na mu Kolinte

²⁴ A simbu ije kaYunda umo lizina lyendi Apolo uje wasemukilile mu Alekizandiliya wezile ku Efeso. Wapwile munu wakwendeka mwamuvwa, co wakele na mana akulumbununa Visoneka.

²⁵ Vamunangwile laja mu ngila ya Mwene, co wakele na ntwima yakwambulula nakulongesa mwamuvwa vyuma vya ali Yesu. Nameme ngoco, wazivukile lika vyakumbwitika kwa Yowano.

²⁶ Washangumukile kwendeka nakusimpa mu sinangonge. Oloni omo Pilisila na Akwila vamuzivile, vamutwalele ku njuvo yavo nakumunangula mwamuvwa ngila ya Njambi.

²⁷ Apolo wayongwele kuya ku Akaya, ngecivene, vaka-kukulaela va mu Efeso vamukwasele mukusonekela vaka-kukulaela va mu Akaya nakuvalomba ngeci vamutambule mwamuvwa. Omo wetele kuje, wapwile muka-kukwasa manene vaje vapwile vaka-kukulaela ngwe ku kutetela kwa Njambi.

²⁸ Omwo a nzili yendi yakulikanangana wahyanene vaYunda mu visimutwiya vya citona-mesho mukumwesa vukaleo vwa mu Visoneka ngeci Yesu ikeye Wakuvwavesa.