Vilinga vya Miluwa 15 - Livulu lya Shukulu Kalunga

Kulikungulula kwa ku Yelusalema

¹ Oloni vanalume vamo vatundile ku Yundeya vaile ku Antyoke vashangumukile kulongesa vaka-kukulaela ngwavo, “Kumwasa kwovoka kuvanga mutuuke ngwe ku Lishiko lya Mosesa.”

² Co Paulu na Mbanambase valikananganene manene navo a cuma eci, ngecivene, vayongwele ngeci Paulu na Mbanambase na vamo veka vanu va mu Antyoke vaye ku Yelusalema nakulimona na miluwa na vakulunu a n̄anda eyi.

³ Ngecivene, cikungulukilo cavatumine, co omo vetile mu Fonisiya na mu Samaliya, co vambulwile vati vaje kesi vaYunda vatengulukilile kuli Njambi, co muzimbu ou wanenele kuvwaelela kwakama kuli vaka-kukulaela voshe.

⁴ Omo vetele mu Yelusalema, cikungulukilo na miluwa na vakulunu vavatambwile, co vambulwile vyoshe vije vyalingile Njambi ali vakevo.

⁵ Oloni vaka-kukulaela vamo vaje vakundamene ku munga ya vaFaliseo vakatukile, co vendekele ngwavo, “Vaje kesi vaYunda vanapande kutuuka nakuvaleka ngeci vononoke Lishiko lya Mosesa.”

⁶ Miluwa amo na vakulunu vakungulukile amo nakuyongola cihula eci.

⁷ Co omo vasimutwiiye simbu yakama Petulu wakatukile nakwendeka ngwendi, “Vakwetu, mwazivuka ngeci simbu yalaja Njambi waangwile yange akati keni nakwambulula Vin̄anda Vyavivwa kuli vaje kesi vaYunda, ngeci vazive nakukulaela.

⁸ Co Njambi, uje azivuka viyongola vya munu woshe, washolwele vukaleo vwendi vwa vaje kesi vaYunda akuvana Munzinzime Wakujela, ngwe mwatwanene yetu.

⁹ Co kamwesele kaangu akati ketu na vakevo, oloni wavasambesele ku vivi vyavo omwo vakulaelele.

¹⁰ Ngecivene, omwo vikajo ololo mushaka kweseka Njambi nakutwika citele a myongo ya vaka-kukulaela cije nameme vakukulwila vetu nameme yetu kutwasa kucambata?

¹¹ Embwe! Tukulaela, co twovoka a kutetela kwa Mwene Yesu, ngwe vakevo lalo.”

¹² Mbunga yoshe volokele kuluu omo vazivile Mbanambase na Paulu vaana vukaleo vwoshe vwa vizivukiso na vikomokeso vije vyalingile Njambi muli vakevo ali vaje kesi vaYunda.

¹³ Omo vamanesele kwendeka, co Yakomba wendekele ngwendi, “Njitolilileni vakwetu!

¹⁴ Simoni ololo natulumbunwina vati Njambi akulivanga wezile nakusholola cizemo cendi kuli vaje kesi vaYunda mukwangulao vamo akati kavo ngeci vapwe vanu vendi.

¹⁵ Majwi a vaka-kwimanena analitombola mwamuvwa na vyuma evi. Ngwe muje muvyendeka visoneka ngwavyo,

¹⁶ ‘Shukulu Kalunga alinakwendeka ngwendi, munima ya vyuma evi njikeluka nakwilwisa lalo vumwene vwa Ndaviti. Njikavutungulula nakuvukolesa lalo.

¹⁷ Ngecivene, vanu voshe vakaija kuli yange, voshe vaje kesi vaYunda vaje vanjinasana kupwa vange.

¹⁸ Mukemwo mwalinakwendeka Shukulu Kalunga, uje washolwele vyuma evi ku san̄ulu.’ ”

¹⁹ Yakomba wendekele ngwendi, “Mu viyongola vyange ngwange, kutwapandele kupesa vaje kesi vaYunda vaje valinakutengulukila kuli Njambi.

²⁰ Oloni tunapande kuvasonekela mukanda wakuvaleka ngwetu kesi valye vyakulya vyakujeneka kujela omwo vanavikombelela ku tumponya nakulitenga ku vupangala, co lalo kesi valye kasitu wakutikinya nameme kulya maninga.

²¹ Omwo Lishiko lya Mosesa vanalilava simbu yakama mu masinangonge a Litangwa na Litangwa Lyakuhwima lyoshe, co majwi endi valinakuwambulula mu vinganda vyoshe.”

Mukanda kuli vaka-kukulaela vaje kesi vaYunda

²² Asinoni miluwa na vakulunu, amo na cikungulukilo coshe vayongwele kwangula vamo vanalume mu munga yavo ngeci vavatume ku Antyoke amo na Paulu na Mbanambase. Vaangwile vanalume vavali vaje vavasingimikile manene vaka-kukulaela, Yundasa ivasanene Mbalasambasa na Silasi,

²³ co vavatumine amo na mukanda wakuya kuli vakevo ngwavo, “Vakwetu, yetu miluwa na vakulunu, tunatumu viindu vyetu kuli yeni voshe vakwetu kesi vaYunda ku cisemwa mulinakukala mu Antyoke na mu Silya na mu Silisha.

²⁴ Tunazivi ngwavo vamo vanalume va ku mbunga yetu vanaija nakumipesa nakumitanganesa na vije vanendeka, vakevo kuvatambwile vilongesa vyakutunda kuli yetu embwe.

²⁵ Co twalikungulwile nakulizivasana tuvavoshe kwangula vamo tunganda nakuvatuma kuli yeni. Vaija na vasamba vetu vatwazema manene Mbanambase na Paulu,

²⁶ vaje vaanene myonyo yavo mukupangela Mwene yetu Yesu Kilistu.

²⁷ Tunatumu Yundasa na Silasi vaje vakumileka vyuma vimolika vije vitulinakusoneka.

²⁸ Omwo Munzinzime Wakujela amolika netu tunalizivasana ngeci kutwapandele kumitwika citele ceka lalo kuvanga lika mashiko awa ngwetu,

²⁹ kesi mulye vyakulya vije vyakukombelela ku tumponya, kesi mulye maninga, kesi mulye kasitu wakutikinya, co litengeni ku vupangala. Mukakala mwamuvwa nga mulinyunga nakujeneka kulinga vyuma evi. Viindu vyeni.”

³⁰ Ngecivene, vaje tunganda vavatumine vaile ku Antyoke kuje vakakungulwile mbunga yoshe ya vaka-kukulaela nakuvana uje mukanda.

³¹ Co omo vanu valavele uje mukanda, vavwaelelele manene a muzimbu wakuvatakamesa.

³² Co Yundasa na Silasi vaje vapwile vaka-kwimanena, vendekele simbu yakama navo mu kuvasimpisa nakuvatakamesa.

³³ Co omo vakele kuje simbu imo, vaka-kukulaela vavatumine mu kwoloka, co velukile kuli vaje vavatumine.

³⁴ Oloni Silasi wayongwele kukala kuje vene.

³⁵ Oloni Paulu na Mbanambase vasalele ku Antyoke, co amolika na vakwavo veka vavangi valongesele nakwambulula lijwi lya Mwene.

Paulu na Mbanambase valyangunuka

³⁶ Co a simbu imo Paulu wendekele kuli Mbanambase ngwendi, “Twiluke tukendwise vakwetu mu vinganda vyoshe muje mutwambulwile lijwi lya Mwene tukamone vati muvali nakuyoyela.”

³⁷ Mbanambase washakele ngeci vaye amo na Yowano Mako,

³⁸ oloni Paulu wayongwele ngeci kuvapandele kuya amo nendi omwo Yowano Mako kakele amo navo na ku shongo ya vungenzi vwavo oloni welukile wavasezele mu Pamefiliya.

³⁹ Co valingile vimata vyakama akati kavo, ngecivene, valyangunukile, Mbanambase wambatele Mako vakovelele mu vwato, co vajavukile vaile ku Sepulasi,

⁴⁰ Oloni Paulu waangwile Silasi, co waile nendi, vaka-kukulaela vavakundikile kukunyunga kwa kutetela kwa Njambi.

⁴¹ Wetile mu Silya na mu Silisha nakutakamesa vikungulukilo.