Vilinga vya Miluwa 14 - Livulu lya Shukulu Kalunga

Mu Ikoniyame

¹ Cuma cimolika calingiwile mu Ikoniyame, Paulu na Mbanambase vaile ku sinangonge vakendekele mu ngila ije yanenesele ngeci ije mbunga yakama ya vaYunda na vaje kesi vaYunda vakulaelele.

² Oloni vaYunda vaje vajenekele kukulaela vashongangeyeye vaje kesi vaYunda nakutengulukila vaka-kukulaela.

³ Ngecivene, miluwa vakele kuje simbu yakama, vendekele nakusimpa vyuma vya Mwene, uje washolwele ngeci muzimbu wavo wa kutetele wapwile wa vushunga mukuvana nzili yakulinga vizivukiso na vikomokeso.

⁴ Oloni vanu va muje mu nganda valyangunukile, vamo vemanenene vaYunda, vakwavo vemanenene miluwa.

⁵ Asinoni vaje kesi vaYunda na vaYunda vamo amo na vantwama vavo, vayongwele kuyandesa miluwa nakuvasha mamanya.

⁶ Omo miluwa vanangukile eci, co vatewelele ku Lisitala na ku Ndembe vinganda vya mu Likaoniya na ku mitambela yakwatako.

⁷ Co kuje vambulwile Vin̄anda Vyavivwa.

Mu Lisitala na Ndembe

⁸ Mu Lisitala mwakele munalume wakele na vulema vwa mendi tunde akusemuka kwendi kasele kwenda.

⁹ Watumbamene kuje mukutolilila ku majwi a Paulu. Paulu wamwene ngeci nakulaela, co asa kukanguka, ngecivene, wakengele shwii ali ikeye,

¹⁰ co wendekele kuli ikeye na lijwi lyakama ngwendi, “Katuka wimane lwii na mendi ove!” Co uje munalume wajombokele, co washangumukile kwenda.

¹¹ Omo vije vimbunga vamwene vije vyalingile Paulu, co vashangumukile kutambeka mu ndaka yavo vavenya ya Likaoniya ngwavo, “Vinjambi vanaija kuli yetu mu cifwa ca vanu!”

¹² Valukile Mbanambase lizina ngwavo Zeyase, co lizina lya Paulu ngwavo Helemese, omwo ikeye wapwile ntwama muka-kwendeka.

¹³ Co muka-kukombelela wa njambi Zeyase, uje njuvo yendi yakulemesela yakele anja ya nganda, wanenele vingombe va nkomba na vishani ku cikolo, omwo ikeye na vije vimbunga vashakele kukombelela n̄ombelo kuli miluwa.

¹⁴ Oloni omo Mbanambase na Paulu vazivile vije vashakele kulinga, vatavozwele vuzalo vwavo nakushatukila mukati ka mbunga nakutambeka ngwavo,

¹⁵ “Omwo vikajo mulinakulinga cuma eci? Netu tunapu tu vanu ngeci mweni! Tulikuno mukwambulula Vin̄anda Vyavivwa, mukumitengulula ku vyuma vyangoco ngeci mwije kuli Njambi wakuyoya, uje watangele lilu na asi na mema a kalunga na vyoshe vilimo.

¹⁶ Ku myaka ya kunima watavele vanu voshe ngeci vaye mu vingila vyavo vavenya.

¹⁷ Oloni visimbu vyoshe waanene vukaleo vwakukala kwendi vavenya a vyuma vyavivwa vije vyakalingi, co akamyana nyonzi yakutunda mwilu na vimbuto a simbu yaivwa, akamyana vyakulya nakushulisa vimbunge vyeni nakuvwaelela.”

¹⁸ Nameme na majwi awa miluwa kuvasele kuvindika mbunga kukombelela n̄ombelo kuli vakevo.

¹⁹ Oloni vaYunda vamo vatundile ku Antyoke mu Pisindiya na ku Ikoniyame vashongangeyeye vimbunga, co vashele mamanya Paulu nakumukokela anja ya nganda, vayongwele ngwavo natsi.

²⁰ Oloni omo vaka-kukulaela vamuzengelekele, wendukile nakwilukila mu nganda. Co alikaki ikeye na Mbanambase vaile ku Ndembe.

Kwiluka ku Antyoke mu Silya

²¹ Omo Paulu na Mbanambase vambulwile Vin̄anda Vyavivwa mu Ndembe, co vapwisile vanu vavangi vaka-kukulaela. Asinoni velukile ku Lisitala na ku Ikoniyame noo vetele ku Antyoke mu Pisindiya.

²² Vakolesele vaka-kukulaela nakuvatakamesa ngeci vapwe vaka-vushunga mukukulaela. Vavalongesele ngwavo, “Tunapande kwita mu tuyando twatungi ngeci tukovele mu Vumwene vwa Njambi.”

²³ Mu cikungulukilo na cikungulukilo vemikilemo vakulunu, co na malombelo nakulikela kulya vavakundikile kuli Mwene uje vakulaelele.

²⁴ Omo vetile mu mutambela wa Pisindiya, co vezile ku Pamefiliya.

²⁵ Kuje vambululwile lijwi ku Pelenga, co vaile ku Atalya,

²⁶ co kutunda kuje vajavukile mu vwato nakwiluka ku Antyoke ku mutambela uje vavakundikile ku kutetela kwa Njambi ku vipangi vije vivamanesele a simbu eyi.

²⁷ Omo vetele mu Antyoke vakungulwile amo vanu vaka-cikungulukilo nakuvaleka vyuma vyoshe vije vyalingile Njambi navo na muje Njambi mwashokolwele ngila kuli vaje kesi vaYunda ngeci vakulaele.

²⁸ Co vatumbamene kuje simbu yakama amo na vaka-kukulaela.