Vilinga vya Miluwa 13 - Livulu lya Shukulu Kalunga

Mbanambase na Saulu vavaangula nakuvatuma

¹ Mu cikungulukilo ca ku Antyoke kwakele vamo vaka-kwimanena na valongisi, Mbanambase na Simyoni (uje vatumbwile ngwavo Wakuzivala), na Lusiyasi (uje watundile ku Silene) na Manaene, (uje uvalelelele amo na Nguvulu Helonde), na Saulu.

² A simbu ije vapangelele Mwene nakulikela kulya, co Munzinzime Wakujela wendekele kuli vakevo ngwendi, “Njaangunwineniko Mbanambase na Saulu vapange vipangi vije njinavasanena.”

³ Co vakevo valikelele kulya, co valombelele vavakambekele mavoko nakuvatuma.

Mu Sepulasi

⁴ Ngecivene, omo Munzinzime Wakujela wavatumine, Mbanambase na Saulu vaile ku Seleusiya, co vatundile kuje vajavukile nakuya ku lin̄anda lya ku Sepulasi.

⁵ Omo vetele ku Salamisi vambulwile lijwi lya Njambi mu masinangonge a vaYunda. Co Yowano Mako wakele amo navo mukuvakwasa mu vipangi.

⁶ Vendele mu lin̄anda mwoshe nakweta ku Pafose kuje vakawanene umo muka-manseno lizina lyendi Mbala-Yesu, kaYunda uje walitumbwile vavenya kupwa muka-kwimanena.

⁷ Ikeye wapwile musamba wa nguvulu wa muje mu lin̄anda lizina lyendi Selengiyase Pauluse, uje wapwile munalume wa mana. Nguvulu wasanene Mbanambase na Saulu omwo washakele kuziva lijwi lya Njambi.

⁸ Oloni vavavindikile kuli muka-manseno Elyamase (eli likelyo lizina lyendi lya mu ciNgiliki), uje wesekele kutundisa nguvulu kukukulaela.

⁹ Asinoni Saulu, uje vatumbwile lalo Paulu, washulile na Munzinzime Wakujela wakengele shwii uje muka-manseno,

¹⁰ co wendekele ngwendi, “Yove muna Liyavola! Yove unapu citozi ca vyuma vyoshe vyavivwa. Muli yove munashulu miyati yoshe ya linyanyamena, co yove simbu yoshe ulinakweseka kutengulula vushunga vwa Mwene kuvupwisa makuli!

¹¹ Co livoko lya Mwene likashuluka ali yove ololo vene, co ukapwa kapuputwa kuukasa kumona ceke ca litangwa a simbu imo.” Aje vene Elyamase wazivile mbundu yakuzivala ifwika ku mesho endi, co wendanganene noku-noku kweseka kuwana umo ngeci amukwate ku livoko nakumutwamenena.

¹² Omo nguvulu wamwene vije vyalingiwile wakulaelele, omwo walikomokelele manene a vilongesa vya Mwene.

Mu Antyoke mu Pisindiya

¹³ Paulu na vakwavo vajavukile kutunda ku Pafose, co vezile ku Pelenga nganda ya mu Pamefiliya, co Yowano Mako wavasezele welukile ku Yelusalema.

¹⁴ Oloni vatundile ku Pelenga vetele ku Antyoke mu Pisindiya, co a Litangwa Lyakuhwima vaile ku sinangonge, co vatumbamene.

¹⁵ Omo valavele Lishiko lya Mosesa na visoneka vya vaka-kwimanena, co vakulunu va sinangonge vatumine lijwi kuli vakevo ngwavo, “Vandolome, tumishaka ngeci mwendeke kuli vanu nga muli na lijwi lyakuvatakamesa.”

¹⁶ Co Paulu wemanene wavolwesele na livoko lyendi washangumukile kwendeka ngwendi, “Vavushoko vwange vaIsalele neni kesi vaYunda mulikuno vaka-kulemesa Njambi, njitolilileni!

¹⁷ Njambi ya vanu va Isalele waangwile vakukulwila vetu nakuvapwisa muyati wakama a simbu ije vakele vangenzi mu Ingito. Co Njambi wavatundisile mu Ingito na nzili yendi yakama,

¹⁸ co wavanyungile mu mambo myaka makumi awana.

¹⁹ Co wanyongesele miyati itanu na ivali mu lifuti lya Kanana, co wapwisile lifuti lije vushwana vwa vanu vendi.

²⁰ Co vyuma evi vyoshe vyalingiwile a myaka yakupwa 450. “Munima yevi wavanene maako noo a simbu ya Samwele muka-kwimanena.

²¹ Co valombele ngeci vakale na mwene, co Njambi wavanene Saulu muna Kishe wa ku muyati wa Mbenjemani ngeci apwe mwene yavo a myaka makumi awana.

²² Co omo wamutundisile, Njambi wapwisile Ndaviti mwene yavo. Eci cikeco cendekele Njambi ali ikeye ngwendi, ‘Njinawana Ndaviti muna Njesi ikeye munalume injazema, uje akalinga vyoshe vije njishaka ngeci avilinge.’

²³ Ikeye Yesu wa ku naanga ya Ndaviti uje Njambi wamupwisile Muyoyesi wa vanu va Isalele ngwe mwakulaesele laja.

²⁴ Simbu kanda Yesu ashangumuke vipangi vyendi, Yowano wambulwile kuli vanu voshe va Isalele ngeci vatenguluke ku vivi vyavo nakuvambwitika.

²⁵ Co omo Yowano wetele kuyehi nakumanesa vipangi vyendi, wendekele kuli vanu ngwendi, ‘Munjiyongola ngweni yange iya? Yange kesi uje imulinakuvandamena. Oloni tolilileni! Alinakwija munima yange, co yange kunjapandele nameme kutundisa vin̄aku ku myanja yendi.’

²⁶ “Vavushoko vwange vaIsalele, vatekulwila va Avilahama, co neni voshe kesi vaYunda mulikuno vaka-kulemesa Njambi, muzimbu ou wakwovoka vanautumu kuli yetu!

²⁷ Omwo vanu vaje valinakuyoya mu Yelusalema na vantwama vavo omwo kuvazivukile ngeci ikeye napu Muyoyesi, nambe kuzivisisa majwi a vaka-kwimanena aje avakalava a Litangwa na Litangwa lyoshe Lyakuhwima. Nameme ngoco valingisile majwi a vaka-kwimanena kupwa a vushunga omo vawanenene Yesu mulonga.

²⁸ Co nameme kuvawanene vukaleo ngeci vamutwale ku kutsa, oloni valombele Pilato ngeci amutsiye.

²⁹ Co omo vanalingi vyoshe vije ngwe muvyendeka Visoneka ali ikeye, vamutundisile a cilindakando nakumwaka mu mbumbo.

³⁰ Oloni Njambi wamusangwile ku vatsi,

³¹ co a matangwa amangi washolokele kuli vaje wendele navo kutunda ku Ngalileya nakweta ku Yelusalema. Vakevo ololo vanapu vakaleo vendi kuli vanu va Isalele.

³² Yetu tuli kuno mukuminenela Vin̄anda Vyavivwa, vije Njambi wakulaesele vakukulwila vetu kuvilinga,

³³ vikevyo natulingila yetu vatekulwila vavo mukusangwila Yesu ku mwonyo ngwe muvanasoneka mu Mwaso wamucivali ngwavo, ‘Yove unapu u Munange, litangwa lya lelo njinapu nji Isho.’

³⁴ “Co eci cikeco cendekele Njambi akumusangula ku vatsi ngwendi kakavolela mu mbumbo embwe, ‘Njikakwana vivezikiso vyakujela vya vushunga vije njakulaesele Ndaviti.’

³⁵ “Ngwe mwanendeka lalo mu visoneka vyeka ngwendi, ‘Kuukatava ngamba yove wa kulongwa kuvolela mu mbumbo embwe.’

³⁶ “Omwo Ndaviti wapangele cizango ca Njambi a simbu yendi vavenya, co watsile, co vamutsindile na vakukulwila vendi, co muvila wendi wavolelele mu mbumbo.

³⁷ Oloni eci kucalingiwile kuli uje yasangwile Njambi ku vatsi embwe.

³⁸ Yeni voshe vavushoko vwange vaIsalele munapande kuzivuka ngeci mwa vushunga muli Yesu mukemwo valinakwambulula kuli yeni muzimbu wakusambesa kwa vivi.

³⁹ Co munapande kuzivuka ngeci woshe uje akulaela kuli ikeye napatuka ku vivi vyoshe kuje Lishiko lya Mosesa kulyasele kumipatuka.

⁴⁰ Nyanyameni ngeci vije vivendekele vaka-kwimanena kesi vilingiwe kuli yeni.

⁴¹ ‘Kengeni, yeni vaka- kuyeluwisa! Co likomokeleni na kutsa! Omwo cuma cije cinjilinga litangwa lya lelo cinapu cuma cije kumukakulaela, nameme vamilumbunwinaco!’ ”

⁴² Omo Paulu na Mbanambase vatuukile mu sinangonge, co vanu vavashikile lalo kwiluka kuli vakevo a Litangwa Lyakuhwima likwavo nakuvaleka vyuma evi.

⁴³ Omo vanu vatundile kuje ku sinangonge, vaYunda vavangi na vaje kesi vaYunda vavangi vaje vapwile va kulongwa ku futisi ya vaYunda vakavele Paulu na Mbanambase. Vaje miluwa vendekele kuli vakevo nakuvatakamesa kukakateya akuyoyela mu kutetela kwa Njambi.

⁴⁴ Co a Litangwa Lyakuhwima likwavo kwasalele lika vavandondo mu nganda munu woshe wezile mukuziva lijwi lya Mwene.

⁴⁵ Omo vaYunda vamwene vimbunga, co vakele na lifuwa, vavyanene vije vyendekele Paulu nakumushaula.

⁴⁶ Oloni Paulu na Mbanambase vendekele nakusimpa ngwavo, “Cinapande ngeci lijwi lya Njambi valyendeke kuli yeni akulivanga. Oloni omwo mwalivyanene, co munaliyongola yeni vavenya ngweni kumwapandele kutambula mwonyo wa myaka yoshe, co tumiseza nakuya kuli vaje kesi vaYunda.

⁴⁷ Omwo eli likelyo lishiko lyanatwana Mwene ngwendi, ‘Njinamipwisa ceke kuli vaje kesi vaYunda, ngeci vaka-kaye voshe vovoke.’ ”

⁴⁸ Omo vaje kesi vaYunda vazivile eci, vavwaelelele nakushangazala lijwi lya Mwene, co vaje vavaangwililile ku mwonyo wa myaka yoshe vakulaelele.

⁴⁹ Co lijwi lya Mwene lyashandokelele kwoshe-ikwoshe mu mutambela uje.

⁵⁰ Oloni vaYunda vashongangeyeye vaka-kutwamenena va mu nganda na vanakazi vakutsimana vaje kesi vaYunda vaje va kulongwa. Co vashangumukile kupakesa Paulu na Mbanambase nakuvasheka mu mutambela wavo.

⁵¹ Oloni miluwa vatotomwene likungu ku myanja yavo kupwa cihiso ca vanu vamuje mu mutambela, co vaile ku Ikoniyame.

⁵² Co vaka-kukulaela mu Antyoke vashulile nakuvwaelela na mu Munzinzime Wakujela.