VaLevi 7 - Livulu lya Shukulu Kalunga

Milambu ya kuliilwisila

¹ Eli likelyo lishiko lya milambu ya kuliilwisila, inapu yakujela manene.

² Cimuna wa mulambu ou vamutsiile ku kunto ya mutula, kuje vakatsiila vimuna va milambu ya kwenyeka, co maninga endi vakawashamwine ku mitambela yoshe iwana ya mutula.

³ Co mazi endi oshe vakawatundise nakuwalambula a mutula, na mukila wa mazi, na mazi a citata-mila,

⁴ na vinso, na mazi avyo, na mutambela uje wauvwa wa lishuli.

⁵ Co muka-kukombelela akenyekele mazi oshe a mutula kupwa mulambu wa vyakulya wakukombelela kuli Shukulu Kalunga. Ou unapu mulambu wa kuliilwisila.

⁶ Co munalume woshe wa naanga ya vaka-kukombelela asa kuulya, oloni vanapande kuulila mu mutambela wakujela, omwo ukewo unapu wakujela manene.

⁷ Kuli lishiko limo lilinakupanga kwoshe kuvali, ku mulambu wa a vuvi, na ku mulambu wa kuliilwisila, situ inapu ya uje muka-kukombelela uje alinakulambula mulambu wa kwambesa.

⁸ Co cilambu ca uje cimuna vanalambula kupwa mulambu wa kwenyeka cikapwa ca muka-kukombelela uje nalambula mulambu.

⁹ Mulambu woshe wa vimbuto vya vinona uje vanoco, nambe uje vanateleka mu ndeo, nambe a cikango unapu wa muka-kukombelela, uje naukombelela kuli Njambi.

¹⁰ Oloni milambu yoshe ya vimbuto vya vinona vyavivishu, nambe vyakukumbasana na mazi, nambe vya kuma, co vyoshe vinakundama kuli vaka-kukombelela voshe va ka naanga ya Alone, vanapande kulipangelayo kupwisa amo akati kavo.

Milambu ya kulitombola

¹¹ Eli likelyo lishiko lya a milambu ya kulitombola yakukombelela kuli Shukulu Kalunga.

¹² Nga munu akombelela alambula mulambu ou kupwa mulambu wa cikandelela kuli Njambi, ikeye akalambule makende akujeneka musima amolika na cimuna wakukombelela. Eyi inapande kupwa mikasha ya kuhima yakulinga na vunga vwakukumbasana na mazi a olive, nambe tumashama-shama twakukwita na mazi a olive, nambe mashama-shama a kuhima akulinga na vunga vwakukumbasana na mazi a olive.

¹³ Amo na mulambu wendi wa kulitombola wa cikandelela, mulambu wendi akalambule mikasha ya makende akwoca akujeneka musima,

¹⁴ Co akalambule mutambela umo wa makende akujeneka musima na mutambela umo wa makende akujeneka musima kupwa vwana vwavuvwa kuli Shukulu Kalunga, ou unapu wa muka-kukombelela, uje atwala maninga a cimuna nakuwashamwina ku mutula.

¹⁵ Co situ ya uje cimuna wa mulambu wa kulitombola akayilya ikeye vavenya a litangwa lije vene lyaikombelela, naimo yai ikasalao noo alikaki mutondo.

¹⁶ Nga munu atwala mulambu wa kulitombola mukushulisa cisingo nambe kupwa mulambu wa cizango cendi vavenya, co kesi vakaulye a litangwa lije vene vanaukombelela, oloni nga umo unasalao, vasa kuulya alikaki,

¹⁷ oloni situ yoshe ije ikasalao kweta ku litangwa lyamucitatu vanapande kuyenyeka.

¹⁸ Nga imo yasalao vakailya lyamucitatu, co Njambi kakatambula mulambu wa uje munu. Co uje mulambu kuvakaulavela kuli ikeye ngwavo unapu wauvwa embwe, oloni ukapwa mulambu wa vunyengwe, co munu woshe awulya, ngongo yendi.

¹⁹ Nga situ ya mulambu uje ilikumbasana na cuma cimo cakujela, co kuvapandele kuulya, oloni vanapande kuwenyeka. Co munu woshe uje najele asa kuyilya,

²⁰ oloni nga ayilya uje munu kajelele, co ikeye kuvakamulava kupwa lalo umo wa vanu va Njambi embwe.

²¹ Co lalo nga munu akwata ku cuma cakujela, nambe kuli munu, nambe kuli kasitu, nambe ku cuma ca vunyengwe, co alya ku situ ya mulambu wa kulitombola wakundama kuli Shukulu Kalunga, co uje munu kuvakamulava kupwa lalo umo wa vanu va Njambi embwe.

²² Shukulu Kalunga wendekele na Mosesa

²³ aleke vanu va Isalele ngeci kesi valye mazi a vingombe, nambe a vimanga, nambe a vimembe.

²⁴ Mazi a cimuna wakulitsila, nambe wakuliwa ku cikashama kuvapandele kuwalya, oloni vawapangese ku vyuma vyeka.

²⁵ Munu woshe uje alya mazi a cimuna uje valambula kupwa mulambu wa vyakulya kuli Shukulu Kalunga, kuvakamulava lalo kupwa umo wa vanu va Njambi embwe.

²⁶ Mukuyoya kwavo kwoshe, vaIsalele kuvapandele kulya maninga a tuzila, nambe a vimuna mu vyakulya vyavo embwe.

²⁷ Munu woshe akapokola eli lishiko kuvakamulava lalo kupwa umo wa vanu va Njambi embwe.

²⁸ Shukulu Kalunga wendekele kuli Mosesa

²⁹ aleke vanu va Isalele ngeci woshe uje alambula mulambu wa kulitombola napande kunena mutambela wawo kupwa vwana vwavuvwa kuli Shukulu Kalunga.

³⁰ Akaunene ikeye vavenya na mavoko endi kupwa mulambu wa vyakulya. Co ikeye akanene mazi a uje cimuna amo na n̄undo yendi ngeci n̄undo ikapwe vwana vwavuvwa kuli Shukulu Kalunga.

³¹ Co muka-kukombelela akenyekele aje mazi a mutula, oloni ije n̄undo ikapwe ya vaka-kukombelela.

³² Co lindi lya ku cilyo lya uje cimuna vakalyane kupwa mulambu wauvwa

³³ kuli muka-kukombelela, uje akombelela maninga, na mazi a mulambu wa kulitombola.

³⁴ Co n̄undo ya uje cimuna, na lindi lya ku cilyo vinapu vwana vwavuvwa vuje Shukulu Kalunga natambula ku vanu va Isalele nakuvwana kuli vaka-kukombelela. Omu mukemwo vanu va Isalele vanapande kwana kuli vaka-kukombelela ku simbu yoshe ya kulutwe.

³⁵ Ou ukewo mutambela wa milambu ya vyakulya yakukombelela kuli Shukulu Kalunga, uje uvanene kuli Alone, na kuli vana vendi litangwa lije vavakundikile kupwa vaka-kukombelela.

³⁶ A litangwa lije vene vavavwavesele, Shukulu Kalunga washikile vanu va Isalele kwana kuli vaka-kukombelela mutambela wa mulambu ou. Eli linapu lishiko vanapande kwononoka vanu va Isalele ku visemwa vyavo vyoshe vya kulutwe.

³⁷ Awa akewo mashiko a milambu ya kwenyeka, na milambu ya vimbuto vya vinona, na milambu ya a vuvi, na milambu ya kuliilwisila, na milambu yakukundika vaka-kukombelela, na milambu ya kulitombola.

³⁸ Co Shukulu Kalunga waanene Mosesa mashiko oshe awa a Munkinda wa Sinai, muje mu mambo a litangwa walekele vanu va Isalele kulambula milambu yavo.