VaLevi 6 - Livulu lya Shukulu Kalunga

¹ Shukulu Kalunga wendekele kuli Mosesa ngwendi,

² “Nga munu alinga vuvi kuli Shukulu Kalunga avyana kwilwisila mukwavo kaIsalele cishimbikiya nasezele kuli ikeye, akwiva cuma ca mukwavo, nambe kumukwisa,

³ nambe kwendeka makuli a cuma cimo cije cazimbala nakulisinga ngwendi kacimwene,

⁴ omo munu nalingi vuvi mu ngila imo, co akelwise cije catambwile mu ngila ya vwizi.

⁵ A litangwa lije vamuwanene na mulonga, napandele kwilwisila vavenya vyoshe nakwakelako litambelo lya makumi avali, a litangwa lije lyakulambula mulambu wa a vuvi vwendi.

⁶ Co akatwale kuli muka-kukombelela lijamba lya manga nambe membe wakujeneka kapenga kupwa mulambu wa kuliilwisila kuli Shukulu Kalunga. Co ndando ya uje cimuna inapande kupwa ndando ije vemika ya mulambu wa kuliilwisila.

⁷ Muka-kukombelela akaambesa uje munu ku mesho a Shukulu Kalunga, co vakamusambesa.”

Milambu ya kwenyeka yoshe yamutunu

⁸ Shukulu Kalunga wendekele kuli Mosesa ngwendi,

⁹ “Leka Alone na vana vendi mashiko awa a milambu ya kwenyeka. Mulambu wa kwenyeka unapande kusala a mutula vutsiki vwoshe, co na tuhya kesi tuzime.

¹⁰ Asinoni muka-kukombelela akazale cikoveyo cendi cacilaja ca linyu, na tuputula twa linyu, akatundise lito lya mazi lije linasala a mutula nakulyaka kumukulo wa mutula.

¹¹ Asinoni ikeye akazale vuzalo vwendi vweka nakutwala lije lito anja ya cilombo ku mutambela uje wakujela.

¹² Co tuhya twa a mutula tunapande kushukuma simbu yoshe kesi tuzime embwe. Ngeci a mutondo a mutondo muka-kukombelela napande kushambeyao na vitale, akalameo mulambu wa kwenyeka nakwenyekelao mazi a mulambu wa kulitombola.

¹³ Co tuhya tunapande kushukuma simbu yoshe a mutula, kutwapandele kuzima.

Milambu ya vimbuto vya vinona

¹⁴ “Awa mashiko anapu a milambu ya vimbuto vya vinona. Muka-kukombelela wa ku naanga ya Alone akanene mulambu wa vimbuto vya vinona kuli Shukulu Kalunga kulutwe lwa mutula.

¹⁵ Co akajomoneo livoko lyakushula lya vunga vwavuvwa vwakuseneta na mazi, amo na insense, co akavyenyekele a mutula kupwa cimweso ngeci vyoshe vanavikombelela kuli Shukulu Kalunga. Co vweko vwa mulambu ou vukavwaelelesa Shukulu Kalunga.

¹⁶ Alone na vana vendi vakalya vyoshe vije vikasalao mu mutambela wakujela mu cipango ca Mbalaka Mwakuliwanena, oloni makende kuvakawatiki na musima embwe.

¹⁷ Shukulu Kalunga navanavyo kupwa mutambela wavo wa milambu ya vyakulya. Unapu wakujela manene, ngwe milambu ya a vuvi, na milambu ya kuliilwisila.

¹⁸ Co vatekulwila va Alone va vanalume vakailye ku visemwa vyavo vyoshe vya kulutwe omwo unapu mutambela wavo wa milambu ya vyakulya wakukombelela kuli Shukulu Kalunga. Munu nkala uje akakwata ku mulambu wa vyakulya ou akavulumuka a nzili yakujela kwawo.”

¹⁹ Co Shukulu Kalunga wendekele kuli Mosesa ngwendi,

²⁰ “Ou ukewo mulambu wa Alone na vana vendi va vanalume uvakakombelela kuli Shukulu Kalunga a litangwa lije vakamuvwavesa. Vanapande kutwala kilo imo ya vunga vwavuvwa vwakuseneta (seteko imo ngwe ya mulambu wa vimbuto vya vinona wa matangwa oshe), vakalambule litambelo limo mutondo, na litambelo likwavo cingwezi.

²¹ Vunga vanapande kuvushinga na mazi, nakuvwoca a cikango, asinoni vavupazule nakuvukombelela kupwa mulambu wa vimbuto vya vinona, co vweko vwa mulambu ou vukavwaelelesa Shukulu Kalunga.

²² Co simbu yoshe ya kulutwe, mulambu ou ukalingiwe kuli mutekulwila woshe wa Alone uje akamwinga kupwa Muka-kukombelela Wakama. Ou ukapwa mulambu wa kwenyeka woshe wamutunu kuli Shukulu Kalunga.

²³ Milambu yoshe ya vimbuto ya vaka-kukombelela vakayenyeke yamutunu. Kesi vakailye embwe.”

Milambu ya a vuvi

²⁴ Co Shukulu Kalunga wendekele kuli Mosesa ngwendi,

²⁵ “Leka Alone na vana vendi ngwove, eli likelyo lishiko lya milambu ya a vuvi. Cimuna wa a mulambu wa a vuvi vakamutsiile ku kunto ya mutula, kuje vakatsiila vimuna va milambu ya kwenyeka. Ou ukewo mulambu wakujela manene.

²⁶ Co muka-kukombelela uje akakombelela cimuna, ikeye akamulile ku mwela wakujela, mu cipango ca Mbalaka Mwakuliwanena.

²⁷ Munu woshe nambe cuma coshe-icoshe cikakwata ku situ ya cimuna uje, akavulumuka a nzili yakujela kwayo. Nga ku vuzalo kunashamukila limbase lya maninga a uje cimuna, vanapande kuvukushila mu mutambela uje vene wakujela.

²⁸ Ndeo yoshe ya vuma muje vanateleka ije situ vanapande kwitsiya, co nga vanapangesa ndeo ya cikuvo vanapande kwipala nakuyikushungula na mema.

²⁹ Co vanalume voshe va naanga ya vaka-kukombelela vasa kulya mulambu ou, unapu wakujela manene.

³⁰ Oloni nga vanatwala maninga amo a mulambu wa a vuvi mu Mbalaka Mwakuliwanena mukwambesa vuvi, co uje cimuna kuvapandele kumulya, vanapande kumwenyeka.”