VaLevi 27 - Livulu lya Shukulu Kalunga

Mashiko aa vin̄ombelo vya Shukulu Kalunga

¹ Shukulu Kalunga wendekele kuli Mosesa ngwendi,

² “Leka vanu va Isalele ngwove, omo vaana munu kuli Shukulu Kalunga kushulisa cisingo, uje munu nasa kupatuka akumukula na vimbongo,

³ ngwe ku ndando ije ivemika ku Mbalaka Mwakuliwanena. Ndando ya munalume wa myaka makumi avali kweta ku myaka makumi atanu na limo ikapwa mavundungulu makumi atanu a siliva.

⁴ Co nga uje munu ikeye napu wa munakazi, co ndando yendi ikapwa mavundungulu makumi atatu a siliva.

⁵ Nga uje munu ikeye napu mwanike wa munalume uje ali na myaka itanu kweta ku makumi avali, ndando yendi ikapwa makumi avali a mavundungulu a siliva, co nga uje munu ikeye napu mwanike wa munakazi ndando yendi ikapwa likumi lya mavundungulu a siliva.

⁶ Nga uje munu ikeye napu mwanike wa munalume uje ali na ngonde imo kweta ku myaka itanu, ndando yendi ikapwa mavundungulu atanu a siliva, co nga uje munu ikeye napu wa munakazi ndando yendi ikapwa mavundungulu atatu a siliva.

⁷ Co nga uje munu ikeye napu wa munalume ikeye natuvakana myaka makumi atanu na limo, ndando yendi ikapwa mavundungulu likumi na atanu a siliva, co nga uje munu ikeye napu wa munakazi ndando yendi ikapwa mavundungulu likumi a siliva.

⁸ Nga uje munu nalingile cisingo nautwa manene mukufweta ije ndando ivanemika, co uje munu ivanasingisile vakamunena kuli muka-kukombelela. Co muka-kukombelela akakeesako ndando kupwisa ngwe mwakafwetela uje munu.

⁹ “Nga cisingo cinapu ca cimuna uje vakalambula kupwa n̄ombelo kuli Shukulu Kalunga, co cimuna uje ivakana kuli Shukulu Kalunga akapwa wakujela.

¹⁰ Co munalume uje nalisingile cisingo kesi akalandakane uje cimuna na mukwavo nambe kwingisamo wamuvwa na wamuvi, nambe wamuvi na wamuvwa. Nga alingamo, muvuvali vwavo vimuna vaje vakapwa va Shukulu Kalunga.

¹¹ Oloni nga cisingo cinapu ca cimuna wakujeneka kujela, kuvasa kumutambula kupwa n̄ombelo kuli Shukulu Kalunga, co uje munu akatwale cimuna kuli muka-kukombelela.

¹² Co muka-kukombelela ikeye akemika ndando ya cimuna kupwisa ngwe ku vuvwa vwa cimuna nambe ku kuviya kwa cimuna, co ndando ije akemika ikapwa ngacije vene.

¹³ Nga uje munu ashaka kumupatula, co napande kufweta ije ndando nakuwezelelao litambelo lya makumi avali.

¹⁴ “Omo munu akundika njuvo yendi ipwe yakujela kuli Shukulu Kalunga, co muka-kukombelela akemika ndando kupwisa ngwe ku vuvwa vwayo nambe ngwe ku kuviya kwayo, co ndando ije akemika ikapwa ngacije vene.

¹⁵ Nga uje nakundikile ije njuvo ashaka kuyipatula lalo, co napande kufweta ije ndando nakuwezelelao litambelo lya makumi avali.

¹⁶ “Nga munu akundika mutambela umo wa livu lyendi lya vushwana kuli Shukulu Kalunga, co ndando ivakemika inapande kupwa ngwe ku vungi vwa vimbuto vije valimamo, a ndando ya mavundungulu likumi a siliva a makilo makumi avali a mbale ya maumwa.

¹⁷ Nga ikeye akundika lije livu lyendi akuhwa kwa Mwaka Wakuliilwisila, co ipwe ndando yoshe yamutunu.

¹⁸ Oloni nga ikeye alikundika munima ya Mwaka Wakuliilwisila, co muka-kukombelela akesekesa seo ya vimbongo kupwisa ku vungi vwa myaka yasalako noo ku Mwaka wakwija Wakuliilwisila, co akatepulula ku ndando.

¹⁹ Nga uje munu nakundika lije livu ashaka kulipatula, co napande kufweta ndando nakuwezelelao litambelo lya makumi avali.

²⁰ Oloni nga ikeye alandesa lije livu kuli munu weka akulivanga kulilanda kuli Shukulu Kalunga, co kakawana lalo moko yakulipatula lije livu ikeye vavenya embwe.

²¹ Cooni ku Mwaka wakwija Wakuliilwisila, lije livu likapwa vufuko vwa Shukulu Kalunga ku myaka yoshe, co likapwa lya vaka-kukombelela.

²² “Nga munu akundika kuli Shukulu Kalunga livu lije kulyapwile lyendi lya vushwana, oloni walilandele,

²³ co muka-kukombelela akemika ndando yalyo kupwisa ku vungi vwa myaka noo ku Mwaka wakwija Wakuliilwisila, co uje munu akafwete ndando litangwa lije vene. Co vije vimbongo vikapwa vya Shukulu Kalunga.

²⁴ Co a Mwaka Wakuliilwisila, lije livu likeluka kuli vavenyalyo nambe ku vatekulwila vendi.

²⁵ “Co vindando vyoshe vikapwe amo na ndando ivemika ku Mbalaka Mwakuliwanena.

²⁶ “Oloni cimuna woshe wa ntwatwa wapwa wa Shukulu Kalunga, co naumo wai akamukundika kupwa mulambu wa cizango. Muna ngombe, nambe muna manga, nambe muna membe vanapu va Shukulu Kalunga.

²⁷ Oloni uje cimuna wa ntwatwa nga wakujeneka kujela vasa kumupatula na ndando ije akemika muka-kukombelela nakuwezelelao litambelo lya makumi avali. Nga ikeye kuvamupatwile, vakamulandese kuli munu weka na ndando ije vakemika kuli muka-kukombelela.

²⁸ “Naumo wai akalandesa nambe kupatula vije vanakundikilila kuli Shukulu Kalunga, nambe munu, nambe kasitu, nambe livu. Evi vyapwa vya Shukulu Kalunga ku myaka yoshe.

²⁹ Kukwesi munu ivanakundikilila kuli Shukulu Kalunga, co vakamupatule lalo embwe, oloni vanapande kumutsiya vene.

³⁰ “Camulikumi coshe ca vimbuto cili mu mahya eni, nambe vinona, nambe vushuka, vinapu vya Shukulu Kalunga.

³¹ Nga munu ashaka kupatulako cimo camulikumi, ikeye napande kuwezelelao litambelo lya makumi avali.

³² A vimuna vakufuka likumi, umo ikeye wa Shukulu Kalunga. Co omo valava vimuna umo na umo, co umo wamulikumi akapwa wa Shukulu Kalunga.

³³ Oloni vavenya vimuna kesi akaangwile Shukulu Kalunga cimuna wamuvi, nambe wamuvwa, nambe kumulandakana. Nga alingamo, co muvuvali vwavo vaje vimuna vakapwa vakujela, co kesi vakavapatule embwe.”

³⁴ Awa akewo mashiko aje Shukulu Kalunga waashikile Mosesa a Munkinda wa Sinai ali vanu va Isalele.