VaLevi 26 - Livulu lya Shukulu Kalunga

Vivezikiso vya kwononoka mashiko

¹ Shukulu Kalunga wendekele ngwendi, “Kesi mukalishongele tumponya nambe kesi mukemike cifwa cimo cakushonga, nambe vimanda vya mamanya, nambe kulemesa mamanya akutaleka. Yange njapwa Kalunga Njambi yeni.

² Mukanyunga Litangwa Lyakuhwima, co mukasingimika mwela uje vakanjilemesela. Yange njapwa Kalunga.

³ “Nga mukavangeya mashiko ange nakwononoka kushika kwange,

⁴ co njikanyokesa nyonzi a simbu yayo yaivwa, co livu likamenesa vimbuto, na miti lalo ikaima vushuka vwavungi.

⁵ Ngecivene, vimbuto vyeni vikatuma manene, mukalya simbu yoshe nakukuta, noo a simbu yakuvuya vushuka, co mukavuya vushuka noo a simbu yakulima vimbuto, co mukakala mwamuvwa mu lifuti lyeni.

⁶ “Mukakala mu kwoloka kuluu mu lifuti lyeni, co kumukazivi lyova. Njikatundisa vushonde vwa tusitu vavavi mu lifuti lyeni, kumukakala lalo nzita muje.

⁷ Co mukafungulula vitozi veni.

⁸ Vanu vatanu akati keni vakafungulula ciita, co vanu ciita vakafungulula makulukazi likumi. Vitozi veni vakafunguluka mu nzita.

⁹ Njikamivezikisa nakumyana vana vavangi, co njikanyunga cikumiiyo cije njalikumiiye neni,

¹⁰ mukateja vimbuto vyavingi manene, vikamanesa mwaka, nameme ngoco kumukakala noku kwakuvitulikila. Co mukombila kuti vije vyalaja ngeci muwane mwela wakutulikila vije vyaviha.

¹¹ Njikakala akati keni mu mbalaka yange yakujela, co kunjikamikengesa nima.

¹² Yange njikakala neni, njikapwa Njambi yeni, co neni lalo mukapwa vanu vange.

¹³ Yange njapwa Kalunga Njambi yeni, njamitundisile mu Ingito ngeci kesi mupwe vindungo vavo. Co njamanesele nzili ije yamikutile, co njamyecele ngeci mwende nakundikangela.”

Cihiso cakujeneka kwononoka mashiko

¹⁴ Shukulu Kalunga wendekele ngwendi, “Oloni nga kumwononoka mashiko ange, co njikaminyanyamesa.

¹⁵ Nga muvyana kwononoka vizilika vyange, nakulimbulula vilongesa vyange, kunyunga mashiko ange, nakupokola cikumiiyo cange cije njalikumiiye neni,

¹⁶ co njikalinga evi, njikamitumina mishongo yaikalu ya lulanga na lisika-sika, ikamipwisa vupuputwa nakuminyongesa, co mukalima vimbuto vyeni, oloni kuvikamikwasa, omwo vitozi veni vakamifungulula, co vakalya vije vimwalimine.

¹⁷ Co njikamikengesa nima, co vitozi veni vakamifungulula nakumishwana. Co mukakala na cova-ova, mukatewa ngwe kuli umo ali na kumisheka, kumani naumo wai amisheka.

¹⁸ “Oloni nga anga sheni kunjononoka, co njikamihisa visimbu vitanu na vivali a vuvi vweni,

¹⁹ co njikamanesa likamba lyeni, na kulyalesa kweni kwakuvi. Kukukakala nyonzi yai, lifuti likominina cau ngwe mulyakola limanya.

²⁰ Co vipangi vyeni vyoshe vya nzili kuvikamikwasa, omwo livu lyeni kulikamenesa vimbuto, co na miti lalo kuyikemi vushuka vwai.

²¹ “Nga munjitengulukila nakuvyana kunjononoka, co njicikawezelelako lalo cihiso visimbu vitanu na vivali a vuvi vweni.

²² Co njikatuma tusitu vavavi akati keni, co vakevo vakatsiya vana veni, nakunyongesa vimuna veni, vakaseza lika vavandondo, na vingila vyeni vikapunda.

²³ “Oloni nga sheni kunjitolilila, mucitwalao kujeneka kunjononoka,

²⁴ co njikamitengulukila nakumihisa visimbu vitanu na vivali a vuvi vweni kutuvakana akulivanga.

²⁵ Njikanena nzita ali yeni ya kumihisa omwo munapokola cikumiiyo cange, nga mukalikungulwila mu vinganda vyeni nakuvandamo, co njikatuma mushongo wa lulanga akati keni, njikamikundika kuli vitozi veni ngeci vakamishwane.

²⁶ Njikatepulula ku vyakulya vyeni. Ngeci vanakazi likumi voshe vakocela makende avo a liko limolika, co vakamipangezelawo, oloni omo munamanesa kuwalya oshe, anga mucikaziva njala.

²⁷ “Oloni nga anga sheni kunjitolilila, mucitwalao kujeneka kunjononoka,

²⁸ co mukuluvala kwange njikamitengulukila nakumihisa lalo visimbu vitanu na vivali a vuvi vweni kutuvakana a simbu yakulivanga.

²⁹ Njala ikaama manene, co mukalya vana veni.

³⁰ Njikanyongesa myela yeni yakulemesela a malundu, nakusiwula mitula yeni ya insense, co njikombangela vivimbi vyeni a tumponya tweni twakuwa twa mwonyo. Co mukapwa va vunyengwe ku mesho ange.

³¹ Njikapwisa membo eni vingundu, co njikanyongesa myela yeni yakulemesela, co kunjikavwaelela na vwisi vwa lwengo lwaluvwa lwa vin̄ombelo vyeni.

³² Co njikanyongesa lifuti lyeni lyoshe njwa, ngeci vitozi vaje vakakalamo vakalisimoke akuviya kwangacije.

³³ Co nzita ikaija akati keni yakumishandwela ku mafuti eka. Mu lifuti lyeni mukapwa mwangoco, na membo akapwa vingundu.

³⁴ Asinoni livu likajolela a myaka yalyo yakuhwima simbu yoshe omo likasala ngundu oku yeni muli mu lifuti lya vitozi veni, co livu likahwima nakujolela.

³⁵ Simbu yoshe livu likelila ngoco, likahwima kuhwima kuje kukwakeleko a matangwa aje akuhwima, omo yeni mwakelemo.

³⁶ “Co njikalingisa cova-ova kuli vaje vanasalamo. Eli likapwa lyova lyakama manene, co vakatewa nameme cililimo ca liputa lije lilinakulipekumukila ngoco na lihunzi. Vakatewa ngwe vanu vatewa nzita, co vakaliwila-wila ngoco, nambe vitozi vavo kuvavashwenyele.

³⁷ Vakalitanozoka umo na mukwavo ngwe kuli munu umo alinakuvasheka, co kuvakakala na nzili yakulwa na vitozi vavo.

³⁸ Co mukatsila mu vundungo, mukavolela mu lifuti lya vitozi veni.

³⁹ Vamo veni vaje vanasala mu lifuti lya vitozi veni, vakongwa omwo vuvi vweni na a vuvi vwa vakukulwila veni.

⁴⁰ “Oloni nga vatekulwila veni vakalitavela vuvi vwavo, na vuvi vwa vakukulwila vavo, vaje vanjivyanene nakunjitengulukila,

⁴¹ ngeci njaluvalele nakuvatengulukila nakuvashekela ku vundungo mu lifuti lya vitozi vavo. Cooni nga vatekulwila veni valitavela mulonga wa vuvi vwavo, co vashangumuka kukala mwamuvwa,

⁴² co njikanuka cikumiiyo cange cije njalikumiiye na vakukulwila vavo, Avilahama, na Isake, na Yakomba, co njikavezikisa livu lyeni.

⁴³ Nameme ngoco, akulivanga vanu vaIsalele vanapande kuseza livu, ngeci livu lihwime omo naumo wai alinakulimamo, co vakevo vanapande kufweta mulonga wakuvyana mashiko ange, na vilongesa vyange.

⁴⁴ Oloni nameme ngoco, omo vacili mu lifuti lya vitozi vavo, kunjikavombila kuti embwe, nambe kuvanyongeselela. Kunjikapokola cikumiiyo cange navo, omwo yange njapwa Kalunga Njambi yavo.

⁴⁵ Co njikanuka cikumiiyo cije njalikumiiye na vakukulwila vavo omo njasholwele nzili yange ku miyati yoshe akutundisa vanu vange mu Ingito, ngeci njipwe Njambi yavo. Yange Njapwa Kalunga.”

⁴⁶ Evi vikevyo vizilika, na vilongesa, na mashiko aje aanene Shukulu Kalunga kuli Mosesa a Munkinda wa Sinai ali vanu vaIsalele.