VaLevi 24 - Livulu lya Shukulu Kalunga

Mwakunyungila vindeya

¹ Shukulu Kalunga wendekele kuli Mosesa ngwendi,

² “Shika vanu va Isalele vanene mazi amavwa a olive a mu vindeya vya mu Mbalaka, ngecivene, vindeya vishukume simbu yoshe kesi vizime.

³ Anja ya livamba, lije lili kulutwe lwa Cikasa ca Cikumiiyo, cije cili mu Mwela Wakujela Manene, Alone akashwameke vindeya ku cingwezi na cingwezi, ngeci vishukume ku mesho a Shukulu Kalunga simbu yoshe noo mutondo. Lishiko eli mukalinyunge ku visemwa vyeni vyoshe vya kulutwe.

⁴ Alone akanyunge vindeya a citumbikilo cavyo ca ngolinde yakujela, co ikeye napande kumona ngeci vindeya vilinakushukuma ku mesho a Shukulu Kalunga simbu yoshe.”

Makende akulambula kuli Njambi

⁵ “Ukambata vunga vwakuseneta makilo likumi na avali, co ukoca mikasha ya makende likumi na ivali.

⁶ Co ukaka mikasha mu mikana ivali, mukana umo na umo mukakale itanu na umo, a mesa yakusata na ngolinde yakujela, ije ili ku mesho a Shukulu Kalunga.

⁷ Co a mukana umo na umo, ukakao insense kupwa canukiso ca mulambu wa vyakulya kuli Shukulu Kalunga, ngeci iinge mu mwela wa makende kupwa n̄ombelo ya vyakulya kuli Shukulu Kalunga.

⁸ A Litangwa Lyakuhwima lyoshe, Alone akaake makende ku mesho a Shukulu Kalunga. Akacilingile vanu va Isalele kupwa cikumiiyo ca ku myaka yoshe.

⁹ Makende awa akapwa a Alone na vatekulwila vendi ku myaka yoshe, co vakevo vakaalile mu mwela wakujela, omwo ou wapwa mutambela wakujela manene wa vyakulya vyakukombelela kuli Shukulu Kalunga.”

Kunyanyamesa uje ashaula lizina lya Njambi

¹⁰ Kwakele munalume umo, ishe wapwile kaIngito, vaina vapwile kaIsalele, lizina lyendi Shelomiti muna Ndivile, wa ku muyati wa Ndani. Munalume ou walijokotele na kaIsalele muje mu cilombo.

¹¹ Co omo vakele nakulijokota, ikeye washawile nakusinga lizina lya Njambi. Co vamutwalele kuli Mosesa,

¹² vamwanene ku mavoko a vaka-kunyunga, co vavandamenene Shukulu Kalunga avaleke vika vakalinga na uje munu.

¹³ Co Shukulu Kalunga wendekele kuli Mosesa ngwendi,

¹⁴ “Tuwiseni anja ya cilombo uje munalume nashawile lizina lyange. Munu na munu uje nazivile omo nashawile akakambeke mavoko endi a mutwe wa uje munalume mukushulisa vukaleo ngwendi ali na mulonga. Asinoni mbunga yoshe vakamwashe mamanya.

¹⁵ Leka vanu va Isalele ngwove woshe uje ashaula Njambi yendi, napande kutsa.

¹⁶ KaIsalele woshe, nambe muka-kwija woshe uje ali mu Isalele, nga ashaula lizina lya Shukulu Kalunga, co mbunga yoshe vakamwashe mamanya.

¹⁷ “Woshe atsiya mukwavo nendi lalo vakamutsiye.

¹⁸ Co lalo woshe uje atsiya cimuna wa mukwavo napande kumwingisilamo weka. Lishiko linapu ngeci mwonyo na mwonyo.

¹⁹ Nga munu avulumuna mukwavo, vyoshe vije vyanalingi kuli mukwavo navyo lalo vakavilinga kuli ikeye.

²⁰ Nga ikeye apokola citsiya ca mukwavo, nendi lalo vakapokole citsiya cendi. Nga nativi lisho lya mukwavo, nendi lalo vakative lisho lyendi. Nga napukula liyo lya mukwavo, nendi lalo vakapukule liyo lyendi. Nga avulumuna mukwavo, nendi lalo vakamwilwisilekwo.

²¹ Woshe uje atsiya cimuna wa mukwavo akengisemo weka lalo, oloni woshe uje atsiya munu na ikeye vakamutsiye.

²² Lishiko eli linapu lyeni muvavoshe, vaIsalele, na vaka-kwija vaje valinakukala akati keni, omwo yange njapwa Kalunga Njambi yeni.”

²³ Omo Mosesa nendeka evi kuli vanu vaIsalele, co vatuwisile anja ya cilombo uje munalume washawile lizina lya Njambi, co vamwashele mamanya. Mu ngila eyi vanu vaIsalele valingile vije Shukulu Kalunga washikile Mosesa.