VaLevi 22 - Livulu lya Shukulu Kalunga

Kujela kwa milambu

¹ Shukulu Kalunga wendekele kuli Mosesa ngwendi,

² “Leka Alone na vana vendi va vanalume ngwove, kumwapandele kushawisa lizina lyange lyakujela, ngecivene, pangeseni na kasingimiko vin̄ombelo vyakujela evi valinakukundika vanu va Isalele kuli yange. Yange njapwa Kalunga.

³ Valeke ngwove, nga mutekulwila wove umo kajelele, co aija kuyehi na vin̄ombelo vyakujela vije vivanakundika vanu vaIsalele kuli yange, co kesi akapangele ku mutula. Eci cinapande kulingiwa ku visemwa vyeni vyoshe vya kulutwe. Yange njapwa Kalunga.

⁴ “Kukwesi wa ku vatekulwila va Alone, uje ali na mushongo wa a cikonde wakulitambwisa, nambe wa kususula alya ku vin̄ombelo vyakujela noo najele. Muka-kukombelela woshe nga akwata a cuma cimo cije kucajelele, co nendi lalo kajelele, nambe a civimbi, nambe nga ikeye netila mbuto yendi asi,

⁵ nambe nga nakwata a kasitu wakujeneka kujela, nambe munu wakujeneka kujela. Co nendi akapwa wakujeneka kujela.

⁶ Muka-kukombelela woshe uje akwata a cuma cangacije akapwa wakujeneka kujela vene noo ku cingwezi, co nameme ngoco, kakali vin̄ombelo vyakujela noo najwele a muvila wendi.

⁷ Co omo litangwa linatoko, akapwa wakujela. Asinoni akasa kulya ku vin̄ombelo vyakujela, omwo vikevyo vinapu vyakulya vyendi.

⁸ Kesi akalye situ ya kasitu wakulitsila, nambe uje naliwa ku vikashama, eci cikamujwalesa. Yange njapwa Kalunga.

⁹ “Vaka-kukombelela voshe vakanyunge mashiko ange anjinavana, kutewa vakakala na mulonga, co vakatsa, omwo kuvononokele mashiko akujela. Yange njapwa Kalunga, muka-kuvajelesa.

¹⁰ “Munu wa ku naanga ya vuka-kukombelela ikeye akalya ku vin̄ombelo vyakujela. Kukwesi weka lalo akavilya, nambe mungenzi uje alinakukala kuli muka-kukombelela, nambe uje wakukumuna.

¹¹ Oloni vindungo va muka-kukombelela vaje valandele na vimbongo vyendi, nambe vakusemukila ku njuvo yendi, vanasa kulya ku vyakulya vije vyali nakutambula muka-kukombelela.

¹² Nga muna muka-kukombelela wa munakazi ashomboka ku munu uje kesi muka-kukombelela kapandele kulya ku vin̄ombelo vyakujela.

¹³ Oloni nga muna muka-kukombelela wa munakazi napu fwile, nambe uje ivanakondola, ikeye kesi na vana, oloni neluka nakukala ku njuvo ya ishe ngwe mwakeleko laja a vwanike vwendi, nasa kulya ku vyakulya vije vyatambula ishe akupwa muka-kukombelela. Kuvanga lika munu wa ku naanga ya muka-kukombelela ikeye asa kuvilya.

¹⁴ “Nga munu woshe-iwoshe uje kesi wa ku naanga ya vuka-kukombelela akalila ku nzimba vin̄ombelo vyakujela, ikeye napande kwingisilamo muka-kukombelela ndando yayo yoshe kuwezelelako litambelo lyamucitanu.

¹⁵ Co vaka-kukombelela kesi vashawise vin̄ombelo vyakujela, vije vivalinakukombelela vanu va Isalele kuli Shukulu Kalunga.

¹⁶ Akwecelela woshe munu kuvatavesele ngeci avilye, eci cikanena mulonga nambe kunyanyamesa ali munu wa cifwa cangacije. Yange njapwa Kalunga, muka-kujelesa vin̄ombelo.”

¹⁷ Shukulu Kalunga wendekele kuli Mosesa ngwendi,

¹⁸ “Leka Alone na vana vendi va vanalume na vanu voshe va Isalele ngwove, omo kaIsalele nambe muka-kwija woshe uje ali mu Isalele nga akombelela n̄ombelo ya kwenyeka, nambe kushulisa cisingo, nambe mulambu wa cizango, co uje cimuna kapandele kukala na kapenga.

¹⁹ Mukumutambula, napande kupwa ngombe wa nkomba wakujeneka kapenga, nambe lijamba lya manga, nambe lijamba lya membe wakujeneka kapenga.

²⁰ Nga akakombelela cimuna uje ali na kapenga, co Shukulu Kalunga kakamutambula.

²¹ Woshe anena mulambu wa kulitombola kuli Shukulu Kalunga, nambe wakushulisa cisingo, nambe mulambu wa cizango, uje cimuna kapandele kukala na kapenga, ngeci vamutambule.

²² Kesi mukalambule kuli Shukulu Kalunga cimuna kesi na mesho, nambe wakutenguka, nambe wakupokoka, nambe uje ali na mbandu yakwita masina, nambe wa likwaku. Kesi mukalambule vimuna va cifwa cangacije a mutula kupwa mulambu wa vyakulya.

²³ Ngombe wa nkomba, nambe muna manga uje nasemuka na vulema vwendi, mwasa kumulambula kupwa mulambu wa cizango, oloni kesi muvalambule kupwa mulambu wakushulisa cisingo embwe.

²⁴ Kesi mukakombelele kuli Shukulu Kalunga cimuna wakutuva, nambe wa citunyu, nambe wakutsena, nambe wakutavuka, nambe wakuvatuka. Eci kuvacitavesele mu lifuti lyeni.

²⁵ “Kesi mukalambule vimuna vaje munatambula kuli vaka-kwija kupwa mulambu wa vyakulya, omwo vimuna vangacije kuvakavatambula embwe.”

²⁶ Shukulu Kalunga wendekele kuli Mosesa ngwendi,

²⁷ “Omo muna ngombe wa nkomba, nambe lijamba lya muna manga, nambe lijamba lya muna membe nasemuka, akakala matangwa atanu na avali amo na vaina. Oloni kutunda a litangwa lyamucitanu na atatu munasa kumukombelela kupwa mulambu wa vyakulya.

²⁸ Kesi mukakombelele ngombe wa lwavo amo na munendi, nambe manga amo na munendi, nambe membe amo na munendi a litangwa limolika embwe.

²⁹ Omo mukombelela mulambu wa cikandelela kuli Shukulu Kalunga, kavangeyeni mashiko ngeci vakamitambule.

³⁰ Co ilyeni vene a litangwa lije, kesi musezeo imo noo alikaki mutondo embwe. Yange njapwa Kalunga.”

³¹ Shukulu Kalunga wendekele ngwendi, “Ononokeni kushika kwange. Yange njapwa Kalunga.

³² Kesi mukashawise lizina lyange lyakujela. Vanu voshe vaIsalele vanapande kuzivuka ngeci yange njapwa wakujela. Yange njapwa Kalunga, yange muka-kumijelesa.

³³ Yange njamitundisile mu Ingito ngeci njipwe Njambi yeni. Yange njapwa Kalunga.”