VaLevi 19 - Livulu lya Shukulu Kalunga

Mashiko akujela na kwoloka

¹ Co Shukulu Kalunga wendekele kuli Mosesa ngwendi,

² “Leka mbunga yoshe ya vanu va Isalele ngwove, ‘Pweni vakujela, omwo yange Kalunga Njambi yeni, njapwa wakujela.’

³ Munu na munu napande kusingimika vaina na ishe, co napande kunyunga Litangwa Lyakuhwima, ngwe muje njamishikile. Yange njapwa Kalunga Njambi yeni.

⁴ “Kesi munjiseze nakulemesa tumponya, cipwe kesi mulipangele vinjambi va vikuvo nakuvalemesa. Yange njapwa Kalunga Njambi yeni.

⁵ “Omo mutsiya cimuna wa mulambu wa kulitombola, nyungeni mashiko aje njamyanene, co njikatambula uje mulambu.

⁶ Co situ munapande kuyilya a litangwa lije vene limunatsii uje cimuna nambe alikaki. Co nga kusala imo na ku litangwa lyamucitatu, co vakayenyeke,

⁷ omwo kuyajelele. Nga munu ayilya, co kunjikatambula uje mulambu.

⁸ Munu woshe-iwoshe uje akayilya akakala na mulonga wakupangesa ngoco vije vanakundikile kuli yange, co kuvakamulava lalo kupwa munu wange embwe.

⁹ “Omo mukateja mahya eni, kesi mukateje vimbuto vya kumukulo wa mahya, co kesi mukelukile lalo munima na kuteja mitwe ya vimbuto ije yasala munima.

¹⁰ Kesi mukelukile lalo munima ya lihya lyeni lya vinyu mukuungulula vushuka vuje vumunasezele nambe kunona vushuka vuje vwalundumukila asi. Vusezeleni vaka-kuutwa, nambe vaka-kwija. Yange njapwa Kalunga Njambi yeni.

¹¹ “Kesi mukayive, nambe kwendeka makuli nambe kukwisa.

¹² Kesi mukalisinge vya makuli nakushawisa lizina lya Njambi yeni. Yange njapwa Kalunga Njambi yeni.

¹³ “Kesi mukayandese vakweni nambe kuvevila. Co kesi mukeshwale kufweta munu uje imunapangesa noo alikaki.

¹⁴ Kesi mukasinge kasinda-matwi nambe kwaka citanukiso kulutwe lwa kapuputwa. Oloni mukazivila Njambi yeni lyova. Yange njapwa Kalunga Njambi yeni.

¹⁵ “Kesi mukasompele vulemu omo muvatula milonga. Kesi mukatetele kautu omwo vuutu vwendi, nambe kutewa muka-kufuka omwo kufuka kwendi embwe. Oloni mukasompe vakweni mu vushunga.

¹⁶ Kesi mukashandole n̄anda ya makuli ali munu woshe-iwoshe. Co nga munu vanamusompela kutsa, endeka mwamuvwa, amo vukaleo vwove vwasa kumukwasa ikeye. Yange Kalunga.

¹⁷ “Kesi ukazinde ndolome yove mu mbunge yove. Linanguleni na mukweni ngeci kesi mulinge vuvi omwo ikeye.

¹⁸ Kesi ukalinge shambandinga vuvi ku vuvi, nambe likiti-kiti lya kumuzinda, oloni zema mukweni ngwe muwalizema yove vavenya. Yange Kalunga.

¹⁹ “Mukononoka kushika kwange. Kesi mukatave vimuna veni kusema na miyati yeka embwe. Kesi mukakune vimbuto vya miyati ivali mu lihya limo embwe. Kesi mukazale vuzalo vwakutonga na miyati ivali ya vinanga embwe.

²⁰ Munalume woshe uje alala na ndungo wa munakazi ikeye lishano lya mbanja lya munalume weka, oloni kanda vamukule nambe kumwecela ku vundungo, co muvuvali vwavo vakavanyanyamese lika. Kesi vakavatsiye embwe omwo uje munakazi wapwile ndungo, kesi muna kacisemi.

²¹ Oloni uje munalume akanene lijamba lya manga ku cikolo ca Mbalaka ku mesho ange, kupwa mulambu wa kuliilwisila.

²² Co muka-kukombelela akajelesa uje munalume ku mesho a Shukulu Kalunga a vuvi vuje vwalingile. Co Njambi akamusambesavwo.

²³ “Omo mukakovela mu lifuti lya Kanana, mukakuna miti yoshe ya vushuka, co anukeni ngeci vushuka vuje vwa myaka itatu yakulivanga, kuvwajelele kesi muvulye.

²⁴ Co mu mwaka wamuciwana vushuka vwoshe mukavukundika kuli yange kupwa mulambu mukumwesa cikandelela ceni kuli yange, Kalunga.

²⁵ Oloni mu mwaka wamucitanu mukasa kulya ku vushuka ovu. Nga mulinga vyoshe evi, co miti yeni ikema vushuka vwavungi. Yange Kalunga njapwa Njambi yeni.

²⁶ “Kesi mukalye situ na maninga ayo. Kesi mukaye ku vaka-kutaa nambe vaka-manseno.

²⁷ Kesi mukaliteule vin̄ambu vya kumikulo ya mitwe yeni, nambe kuviisa minjezi yeni omo muli mu vusiwa.

²⁸ Kesi mukalicate vinyato a mivila yeni, nambe kulilengozola mwamuvi a mivila yeni omo mulinakulila vatsi. Yange njapwa Kalunga.

²⁹ “Kesi mukashawise vana veni va vanakazi akuvapwisa vikwizi va mu vinjuvo vya vinjambi va makuli, nga mulingamo, co mukatengulukila ku vinjambi veka, co lifuti likashula na vuvi.

³⁰ Mukanyunga Litangwa Lyakuhwima, co mukasingimika mwela uje vakanjilemesela. Yange njapwa Kalunga.

³¹ “Kesi mukaye kuli vanu vaje valinakwendeka na minzinzime ya vatsi. Nga mulingamo, co mukalijwalesa yeni vavenya. Yange njapwa Kalunga Njambi yeni.

³² “Mukamwese kasingimiko kuli tukulukazi nakuvalemesa. Co mukanjononoka nakunjisingimika. Yange njapwa Kalunga.

³³ “Kesi mukayandese vaka-kwija vaje valinakukala mu lifuti lyeni.

³⁴ Kaleni navo mwamuvwa ngwe mumuli nakukala na vakweni vaIsalele, vazemeni ngwe mumwalizema yeni vavenya. Anukeni ngweni neni lalo mwapwile vaka-kwija mu lifuti lya Ingito. Yange njapwa Kalunga Njambi yeni.

³⁵ “Kesi mukakwise munu umo akupangesa seteko ya makuli, nambe akupeselesa vulemu, nambe akupeselesa a vulaja, nambe kutuma kwa vyuma.

³⁶ Pangeseni vipeseleso vinapandemo vyavivwa na vulemu vwavyo vwavuvwa, pangeseni seteko ya vinganja na malonga ije inapandemo. Yange njapwa Kalunga Njambi yeni, uje wamitundisile mu lifuti lya Ingito.

³⁷ Mukononoka kushika kwange kwoshe oku njinamishiki. Yange njapwa Kalunga.”