VaLevi 18 - Livulu lya Shukulu Kalunga

Kuvindika vilinga vya vupangala

¹ Shukulu Kalunga wendekele kuli Mosesa ngwendi,

² “Leka vanu va Isalele ngwove, yange njapwa Kalunga Njambi yeni.

³ Kesi mukavangeye vilinga vya vanu va mu Ingito, kuje kumwakele, nambe vilinga vya vanu va mu lifuti lya Kanana, kuje njilinakumitwala.

⁴ Ononokeni mashiko ange nakulinga evi vinjamishiki. Yange njapwa Kalunga Njambi yeni.

⁵ Kavangeyeni vingila na mashiko awa njilinakumyana, nga mulinga ngacije, co mukayoya. Yange njapwa Kalunga.

⁶ “Kesi ukalale na munu woshe uje napu kavushoko kove.

⁷ Kesi ukazivise isho shwamwa akulala na vanyoko. Co kuwapandele kuzivisa vanyoko shwamwa.

⁸ Kesi ukazivise isho shwamwa akulala na umo wa vanakazi vendi.

⁹ Kesi ukalale na ndokazi yove, nambe ndokazi yove wa kuli ishweni umolika, nambe uje wakukitila mu njuvo, nambe wakukitila kweka.

¹⁰ Kesi ukalale na mutekulyove wa munakazi. Eci cikapwa cuma ca shwamwa manene kuli yove.

¹¹ Kesi ukalale na ndokazi yove uje wa ku vuyisho nambe, wa ku vunyoko omwo ikeye napu ndokazi yove vene.

¹² Kesi ukalale na ndokazi ya isho omwo ikeye wapwa kavushoko kendi wa a mbunge.

¹³ Kesi ukalale na shongo ya vanyoko, omwo ikeye wapwa kavushoko kendi wa a mbunge.

¹⁴ Kesi ukalale na munakazi wa nyokono omwo ikeye lalo napu vaten̄azi yove.

¹⁵ Kesi ukalale na vanyokomweno omwo ikeye wapwa munakazi wa munove.

¹⁶ Kesi ukalale na nyali yove omwo ikeye wapwa munakazi wa ndolome yove.

¹⁷ Kesi ukalale na mwana, nambe na mutekulu wa munakazi uje walingile nendi vupangala laja, omwo vapwa vavushoko vwove va a mbunge. Co eci cinapu kuvikila.

¹⁸ Kesi walekele munakazi wove na ndokazi yendi kupwa muka-lifuwa lyendi omo ikeye acili nakuyoya.

¹⁹ Kesi ukalale na munakazi nga kakwata ku liko, omwo ikeye kajelele.

²⁰ Kesi ukalale na munakazi wa mukweni omwo eci cikamijwalesa.

²¹ Kesi ukatavese umo wa vana veni kumupangesa mukulemesa njambi Moleki, omwo ngila eyi ikashawisa lizina lya Njambi yeni, yange njapwa Kalunga.

²² Munalume kapandele kulala na mukwavo munalume, capwa cizila. Njambi azinda eci.

²³ Kukwesi munalume nambe munakazi akalala na kasitu. Vuvi vwangeci vukanena vunyengwe.

²⁴ “Kesi mulijwalese yeni vavenya na vilinga evi, omwo mu ngila eyi vaka-kujeneka kukulaela vanalijwalesa nayo, vaje vakele mu lifuti lije akulivanga. Ngeci omwo akulijwalesa kwavo, Shukulu Kalunga alinakuvashekamo, ngeci yeni mukayemo.

²⁵ Vilinga vyavo vinaviisa lifuti, ngecivene, Shukulu Kalunga alinakunyanyamesa lije lifuti. Co lifuti linavyana vaje vanu valimo.

²⁶ Vilinga vyavo vya vunyengwe, vikevyo vinaviisa lifuti. Oloni yeni kumwapandele kuvilinga,

²⁷ nameme vaIsalele, nambe vaka-kwija vaje valinakukala akati keni. Munapande kunyunga mashiko a Shukulu Kalunga na kushika kwendi.

²⁸ Asinoni lifuti kulikasa kumivyana ngwe muje linavyana vaka-kujeneka kukulaela, vaje vanakalamo simbu kanda mwijemo.

²⁹ Mwazivuka ngeci munu woshe uje alinga vyuma evi vya vunyengwe kuvakamulava lalo kupwa munu wa Njambi embwe.”

³⁰ Co Shukulu Kalunga lalo wendekele ngwendi, “Ononokeni kushika kwange, co kesi mukavangeye vilinga vya vanu vaje vanakala mu lifuti lije akulivanga, simbu kanda muyemo. Co kesi mulijwalese yeni vavenya akulinga vyuma evi embwe. Yange njapwa Kalunga Njambi yeni.”