VaLevi 15 - Livulu lya Shukulu Kalunga

Kususula kwa a mivila

¹ Shukulu Kalunga wendekele kuli Mosesa na Alone ngwendi,

² “Endekeni kuli vanu va Isalele ngweni, omo munalume asusula a muvila wendi, co kususula kwendi kukwajelele,

³ nambe kususula oku kutwalao kundweka nameme kuzika.

⁴ Co a vulili vwoshe aje anatumbama nambe analala uje munu alinakususula kuvwajelele.

⁵ Munu woshe uje akwata a vulili vwendi

⁶ nambe kutumbama a cuma cimo cije natumbama uje munalume, napande kukusha vuzalo vwendi, co akajwele a muvila wendi, co ikeye akapwa wakujeneka kujela noo ku cingwezi.

⁷ Munu woshe uje akwata a muvila wa uje munalume alinakususula, napande kukusha vuzalo vwendi, co akajwele a muvila, co akapwa wakujeneka kujela noo ku cingwezi.

⁸ Nga uje munalume alinakususula ajekwila mate ali munu woshe-iwoshe najele, co uje munu napande kukusha vuzalo vwendi, akajwele a muvila wendi, co akapwa wakujeneka kujela noo ku cingwezi.

⁹ Co a nyangwa yoshe-iyoshe aje atumbama uje munalume alinakususula kwajelele.

¹⁰ Munu woshe uje akwata a cuma cimo aje anatumbama uje munalume akapwa wakujeneka kujela noo ku cingwezi. Munu woshe akambata cuma cimo aje anatumbama uje munalume napande kukusha vuzalo vwendi, co akajwele a muvila wendi, co ikeye akapwa wakujeneka kujela noo ku cingwezi.

¹¹ Nga munalume uje alinakususula akwata a munu umo kujeneka akulivanga kujwela ku mavoko endi, uje munu napande kukusha vuzalo vwendi, co akajwele a muvila wendi, co akapwa wakujeneka kujela noo ku cingwezi.

¹² Ndeo ya vuma yoshe yakwata uje munalume alinakususula vanapande kuyitsiya, co na lipanda lije lyakwata vanapande kulikusha.

¹³ Uje munu omo nakanguka kukususula kwendi, napande kuvandamena matangwa atanu na avali, asinoni akusha vuzalo vwendi, co ajwele mu mema amavwa a mu lisima lya kavwelu-vwelu, co ikeye akapwa wakujela.

¹⁴ Co a litangwa lyamucitanu na atatu akatwale tutela vavali nambe mayembe vavali ku cikolo ca Mbalaka Mwakuliwanena nakuvana kuli muka-kukombelela.

¹⁵ Co muka-kukombelela akakombelelao kazila umo kupwa n̄ombelo ya a vuvi, na kazila mukwavo kupwa n̄ombelo ya kwenyeka. Mu ngila eyi muka-kukombelela akajelesa uje munu ku mesho a Shukulu Kalunga.

¹⁶ “Omo munalume mbuto yendi ilituukila ngoco, napande kujwela a muvila wendi woshe, co nendi akapwa wakujeneka kujela noo ku cingwezi.

¹⁷ Co cuma coshe cakutunga na nanga nambe na cilambu aje anawila ije mbuto vanapande kucikusha, co cikapwa cakujeneka kujela noo ku cingwezi.

¹⁸ Nga munalume akala amo na munakazi, oku mbuto yendi ilitikila ngoco, voshe vavali vanapande vakajwele a mivila yavo, co vakevo vakapwa vakujeneka kujela noo ku cingwezi.

¹⁹ “Omo munakazi kakwata ku liko, co ikeye akapwa wakujeneka kujela matangwa atanu na avali, co woshe uje amukwata akapwa wakujeneka kujela noo ku cingwezi.

²⁰ Oshe aje atumbama, nameme alala, oku kakwata ku liko kwajelele.

²¹ Co woshe uje akwata ku vulili vwendi nambe a cuma cimo canatumbamene,

²² napande kukusha vuzalo vwendi, ajwele a muvila wendi,

²³ co akapwa wakujeneka kujela noo ku cingwezi.

²⁴ Nga munalume akala amo na munakazi omo ikeye kakwata ku liko, co akapwa wakujeneka kujela matangwa atanu na avali, na vulili vwoshe vuje vwanalalele navukevwo kuvwajelele.

²⁵ “Nga munakazi alinakwita maninga a matangwa amo oloni kesi simbu yakajeneka kukwata ku liko, nambe ikeye natuvakanesa a simbu yendi ije kakwata ku liko ngwe simbu yoshe, co akapwa wakujeneka kujela omwo alinakwitisa maninga angacije, co akapwa wakujeneka kujela ngwe omo kakwata ku liko.

²⁶ “Vulili vwoshe vuje vwalinakulala, nambe a cuma cimo cije cali nakutumbama a simbu ije kucajelele.

²⁷ Woshe avikwata nendi kajelele, napande kukusha vuzalo vwendi, ajwele a muvila wendi, co akapwa wakujeneka kujela noo ku cingwezi.

²⁸ Oloni nga uje munakazi akwata ku liko akakale matangwa atanu na avali, asinoni akapwa wakujela.

²⁹ A litangwa lyamucitanu na atatu akatwale tutela vavali nambe mayembe vavali kuli muka-kukombelela ku cikolo ca Mbalaka Mwakuliwanena.

³⁰ Co muka-kukombelela akakombelelao kazila umo kupwa n̄ombelo ya a vuvi, co kazila mukwavo kupwa n̄ombelo ya kwenyeka, co mu ngila eyi muka-kukombelela akajelesa uje munakazi ku mesho a Shukulu Kalunga.”

³¹ Co Shukulu Kalunga walekele Mosesa kunangula vanu va Isalele akujeneka kujela kwavo, ngeci kesi vajwalese Mbalaka Mwakuliwanena nendi, ije ili akati kavo. Nga vakacilinga, co vakatsa.

³² Awa akewo mashiko aali munalume uje alinakususula, na ali munalume uje mbuto yendi ilinakwitikila mwangoco,

³³ co lalo na ali munakazi uje kakwata ku liko, nambe ali munalume uje nakala amo na munakazi uje wakujeneka kujela.