VaLevi 13 - Livulu lya Shukulu Kalunga

Mashiko a mishongo ya a cikonde yakulitambwisa

¹ Co Shukulu Kalunga wendekele kuli Mosesa na Alone ngwendi,

² “Nga munu woshe-iwoshe ali na mbandu a cikonde cendi, nambe lizimbo, nambe vimbulu, evi vyasa kwimuka mushongo wa cikonde wakulitambwisa, co ikeye vakamunene kuli muka-kukombelela wa ku naanga ya Alone, nambe kuli munendi umo wa munalume.

³ Co muka-kukombelela akelula ije mbandu, nga maka aho anatenguluka akutoka, na mbandu inalovo kutuvakana cikonde cije ca kumukulo, co ukewo unapu mushongo wa a cikonde wakulitambwisa, co muka-kukombelela akamutumbula ngwendi ou munu kajelele.

⁴ Oloni nga mbandu inapu yakutoka, co kuyalovele kutuvakana cikonde cije ca kumukulo, co aje maka kuwatengulukile kupwa akutoka, co muka-kukombelela akamushondolwese matangwa atanu na avali.

⁵ Co uje muka-kukombelela akamwilula lalo a litangwa lyamucitanu na avali, mu viyongola vyendi ije mbandu nga anga muyafwa kuyesi nakutotoloka, co ikeye akamushondolwese a matangwa akwavo atanu na avali.

⁶ Co uje muka-kukombelela acikamwilula lalo a litangwa lyamucitanu na avali, nga ije mbandu inolo, kuyatotolokele, ikeye akamutumbule kupwa wakujela, co inapu mbandu lika. Co uje munu akakushe vuzalo vwendi nakupwa wakujela.

⁷ Oloni nga ije mbandu itotoloka omo muka-kukombelela namwilula laja, nakumutumbula ngeci najele, co ikeye napande kusholoka ku mesho a muka-kukombelela lalo.

⁸ Co muka-kukombelela akamwilule lalo, nga mbandu inatotoloka, co akatumbule ngwendi kajelele, kuma unapu mushongo wa a cikonde wakulitambwisa.

⁹ “Nga munu woshe-iwoshe ali na mushongo wa a cikonde wakulitambwisa, vamunene kuli muka-kukombelela,

¹⁰ uje akamwilula. Co nga ali na mbandu yakutoka a cikonde cendi ije inatengulula maka endi kupwa akutoka, co ili na masina amangi,

¹¹ inapu mbandu ya mukongo ya a cikonde. Co muka-kukombelela akamutumbule ngwendi kajelele, kukwesi lalo vyakumushondolwesela, omwo ikeye nasholoka laja kupwa wakujeneka kujela.

¹² Nga uje mushongo wa a cikonde wakulitambwisa wajauka laja kuli uje munu kutunda ku mutwe nakweta ku mendi,

¹³ co muka-kukombelela akamwilula lalo. Nga ikeye akawana ngeci cili najauka laja muvila woshe, co akamutumbule ngwendi najele, omwo cikonde cendi coshe cinapu cakutoka, co napu wakujela.

¹⁴ Oloni a simbu ije vene mbandu itotoloka, co ikeye kajelele.

¹⁵ Co muka-kukombelela akamwilule lalo, nga akamona mbandu inatotoloka, co akamutumbule ngwendi kajelele. Co ije mbandu yakutotoloka inapu mushongo wa a cikonde wakulitambwisa, co uje munu anga kajelele.

¹⁶ Oloni omo mbandu inolo, co cikonde cipwa lalo cakutoka, co uje munu akaye kuli muka-kukombelela,

¹⁷ co ikeye akamwilula lalo. Co nga ije mbandu inapu lalo yakutoka, co akapwe wakujela, co muka-kukombelela akamutumbule ngwendi najele.

¹⁸ “Nga munu woshe-iwoshe ali na lizimbo lije linakanguka,

¹⁹ oloni munima yeli, aje anakele lizimbo asholoka cipenga cakutoka, nambe cakuvenga nakutokoloka, co akaye kuli muka-kukombelela.

²⁰ Co muka-kukombelela akamwilule, nga ije mbandu inalovo kutuvakana cikonde ca kumukulo, co na maka ayo aje ali kumukulo anapu akutoka, co uje muka-kukombelela akamutumbule ngwendi kajelele. Co unapu mushongo wa a cikonde wakulitambwisa, uje unashangumukila a lizimbo.

²¹ Oloni nga muka-kukombelela akailula, co awana ngeci maka aho kuwemukile akutoka, co mbandu kuyalovele katuvakana cikonde ca kumukulo, oloni cifwa cayo cisholoka ngwe kutokoloka ngoco, co muka-kukombelela akamushondolwese matangwa atanu na avali.

²² Nga cije cipesa cili na kutotoloka, co muka-kukombelela akamutumbule ngwendi kajelele, acili na mushongo.

²³ Oloni nga cije cipesa cikala ngacije vene, kucatotolokele, cinapu civeve lika ca lizimbo, co muka-kukombelela akamutumbule ngwendi najele.

²⁴ “Co ali munu uje wakwenya ku tuhya, nga situ ya a cikonde imuka yakutoka nambe kuvenguluka nakutokoloka,

²⁵ co muka-kukombelela akamwilule. Nga maka a aje a civeve anapu akutoka, co lalo mbandu inalovo kutuvakana cikonde ca kumukulo wa mbandu, co unapu mushongo wa a cikonde wakulitambwisa uje unashangumukila aje a mbandu ya tuhya. Co muka-kukombelela akamutumbule ngwendi kajelele.

²⁶ Oloni nga maka a aje a mbandu kuwapwile akutoka, co lalo mbandu kuyalovele kutuvakana cikonde ca kumukulo wa mbandu, oloni cinatokoloka lika, co muka-kukombelela akamushondolwese matangwa atanu na avali.

²⁷ Co muka-kukombelela akamwilule lalo a litangwa lyamucitanu na avali, nga ije mbandu ilinakutotoloka simbu yoshe, co unapu mushongo wa a cikonde wakulitambwisa, co muka-kukombelela akamutumbule ngwendi kajelele.

²⁸ Oloni nga cije civeve kucatengulukile mweka lalo, co cikeco kucatotolokele manene, co cinapu ngwe kutoka lika, kesi mushongo wa a cikonde wakulitambwisa, co muka-kukombelela akamutumbule ngwendi najele omwo eci cinapu civeve lika ca tuhya.

²⁹ “Omo munalume nambe munakazi ali na mbandu mu mutwe nameme ku mupundu,

³⁰ co muka-kukombelela akailule. Nga ikeyo inalovo kutuvakana cikonde ca kumukulo wa mbandu, na maka aje aliho avushungwa nakukeha, co unapu mushongo wa a cikonde wakulitambwisa, cooni akamutumbule ngwendi kajelele.

³¹ Nga muka-kukombelela akamwilula, co awana ngeci mbandu kuyalovele kutuvakana cikonde ca kumukulo wa mbandu, oloni kuhesi maka amavwa, co muka-kukombelela akamushondolwese matangwa atanu na avali.

³² Co muka-kukombelela akelule lalo a mbandu yendi a litangwa lyamucitanu na avali, nga kuyatotolokele, co kuhesi maka avushungwa, co ikeyo kuyalovele kutuvakana cikonde ca kumukulo wa mbandu,

³³ asinoni uje munu akateule ku mutwe wendi, oloni kesi akateule ku mutambela wa kumukulo wa mbandu. Asinoni muka-kukombelela akamushondolwese lalo matangwa atanu na avali.

³⁴ Co a litangwa lyamucitanu na avali, muka-kukombelela akelule lalo a mbandu, nga ikeyo kuyatotolokele, co ikeyo kuyalovele kutuvakana cikonde ca kumukulo wa mbandu, co muka-kukombelela akamutumbula ngwendi najele. Co uje munu akakushe vuzalo vwendi, co akajela.

³⁵ Oloni nga mbandu itotoloka omo namutumbula laja ngwendi najele,

³⁶ co muka-kukombelela akamwilule lalo. Co nga ije mbandu inatotoloka, co ikeye kakakenge lalo ku maka avushungwa, co cili vene uje munu kajelele.

³⁷ Oloni nga mu viyongola vya muka-kukombelela awana ngeci ije mbandu kuyatotolokele, alinakumena maka amavwa a ikeyo, co ije mbandu inolo, co muka-kukombelela akamutumbule ngwendi najele.

³⁸ “Omo munalume nambe munakazi nga ali na vipesa vyakutoka a muvila,

³⁹ co muka-kukombelela akelule uje munu. Nga vije vipesa vili a muvila kesi vyakutoka manene, vinapu vipesa vyangoco vyakulizila a cikonde, co uje munu najele.

⁴⁰ “Nga munalume najena vin̄ambu ku likosi nambe ku luholo lwendi,

⁴¹ eci kucimwesa ngeci kajelele embwe.

⁴² Oloni nga kuli nakusholoka mbandu ya cipupa cakuvenguluka nakutokoloka muje mu lyandya, cinapu vushangumukilo vwa mushongo wa a cikonde wakulitambwisa.

⁴³ Co muka-kukombelela akamwilule, nga muli mbandu yakuvenguluka nakutokoloka,

⁴⁴ co muka-kukombelela akamutumbule ngwendi kajelele, omwo a mushongo wa a cikonde wakulitambwisa uli a mutwe wendi.

⁴⁵ “Munu uje ali na mushongo wa a cikonde wakulitambwisa, napande kuzala vuzalo vwakutavozoka, co kapandele kusakula vin̄ambu vyendi lalo, co afwike a kanwa kendi. Co napande kutambeka ngwendi, ‘Njaviya! Njaviya!’

⁴⁶ Co ikeye akakale ngacije vene wakujeneka kujela ngwe muje vene mwali na mushongo, co napande kukala anja ya cilombo, nakulitenga ku vakwavo.

Mashiko aa mbundu-mbundu

⁴⁷ “Omo a vuzalo ali mbundu-mbundu, nambe vwa ulu, nambe vwa linyu,

⁴⁸ nambe a nanga imo ya linyu, nambe a nanga ya ulu, nambe a cilambu, nambe a cuma cakutunga na cilambu,

⁴⁹ nga ikeyo yavushompo, nambe yakuvenguluka, inapu mbundu-mbundu vene. Co vanapande kusholola vuje vuzalo kuli muka-kukombelela.

⁵⁰ Co muka-kukombelela akavwilule, co akavwake kwavwo lika a matangwa atanu na avali.

⁵¹ Co akavwilule lalo a litangwa lyamucitanu na avali, nga ije mbundu-mbundu aicili, co vuje vuzalo kuvwajelele.

⁵² Nga uje muka-kukombelela akavwenyeka omwo mbundu-mbundu yatumu, cooni vanapande kuvwenyeka vwoshe.

⁵³ “Oloni omo akavwilula, co muka-kukombelela akawana ngeci ije mbundu-mbundu kuyaamene aje a vyuma,

⁵⁴ co akashike ngeci vavukushe nakuvwaka kwavwo lika a matangwa atanu na avali.

⁵⁵ Asinoni akavwilule, co nga ije mbundu-mbundu yao kuyafwile mweka, nambe ngoco ikeyo kuyaamene, anga vene vukevwo kuvwajelele. Vije vyuma vanapande kuvyenyeka, cipwe ku mutambela uje unaviya wa kulutwe nambe wa kunima.

⁵⁶ “Oloni, omo muka-kukombelela avwilula lalo, co awanao ije mbundu-mbundu inakushungukwa, co akatavuleko vuje vuli na mbundu-mbundu, nambe nanga, nambe cilambu.

⁵⁷ Asinoni nga ije mbundu-mbundu icili nakusholokao lalo, co icili nakutuma, cooni uje vavenya cije cuma akacenyeke.

⁵⁸ Nga akusha cije cuma, co lije livala lya mbundu-mbundu linatundu, akacikushe lalo, co cikapwa cakujela.

⁵⁹ “Ngecivene, eli likelyo lishiko lya mbundu-mbundu ije ili a vuzalo, nameme vwa ulu, nambe vwa linyu, nambe ya a nanga ya ulu, nambe ya a nanga ya linyu, nameme a cuma muka indi muka cakutunga na cilambu. Omu mukemwo mwakumanesela kulinga, nameme cinapu cakujela, nambe cakujeneka kujela.”