VaHevelu 9 - Livulu lya Shukulu Kalunga

Kulemesa kwa mwilu na asi

¹ Cikumiiyo cakulivanga cakele na mashiko akulemeselamo, co vanu vapangele mwela wakulemesela.

² Co vatungile mbalaka ya anja vaitumbwile ngwavo Mwela Wakujela. Muje mwakele citumbikilo ca ndeya na mesa na likende lyakukombelela kuli Njambi.

³ Kunima ya nanga yamucivali kwakele mbalaka ije vatumbwile ngwavo Mwela Wakujela Manene.

⁴ Mukati kayo mwakele mutula wa ngolinde wakwenyekela insense na Cikasa ca Cikumiiyo, vyoshe vyakufwika na ngolinde, co muje mwakele njava ya ngolinde na Maana na mulamu wa Alone uje wamenene maputa, co na vitale vivali vya mamanya aje vasonekele majwi a lishiko.

⁵ Co akamwa ya Cikasa akele vakelumbi vaje vapwile vaka-kwimanena vumpau vwa ku mesho a Njambi, co na mambava avo akujangumuka akamwa ya mutambela wakusambesela vivi. Oloni ino kesi ikeyo simbu yakunungulula vyuma vyoshe cimo na cimo.

⁶ Eyi ikeyo ngila ivavwaesele vyuma voshe evi. Vaka-kukombelela vakele nakukovela mu Mbalaka ya anja a litangwa na litangwa nakupanga vipangi vyavo,

⁷ oloni kuvanga Muka-kukombelela Wakama lika ikeye akovela mu Mbalaka ya mukati, co akacilingi ngeci lumo a mwaka. Akambata maninga aje akalingi n̄ombelo kuli Njambi mukwimanena ikeye vavenya na vanu a vuvi vuje vanalingi vwakujeneka kuzivuka.

⁸ Munzinzime Wakujela alinakuvalongesa vyoshe evi muvanavivwaeselamo ngeci ngila yakuya mu Mwela Wakujela Manene kanda vaciishokolole omo simbu Mbalaka ya anja inemana.

⁹ Eci cisimo cinemanena simbu ya ololo. Eci cilinakulumbununa ngeci vwana na vin̄ombelo vya tusitu vyakwana kuli Njambi kuvyasele kujelesa vimbunge vya vaka-kulemesa,

¹⁰ omwo vikevyo vinemanena lika ku vyakulya nakunwa, na vilika vyakuliseza-seza vyakulijelesa. Evi vyoshe vinapu mashiko a anja, evi vikalingiwa noo a simbu ije Njambi akatengulula vyuma vyoshe.

¹¹ Oloni Kilistu naija laja Muka-kukombelela Wakama wa vyuma vyavivwa vije tulinavyo laja ano. Mbalaka muje alinakupangela yakama manene, co ikeyo yakujela, ikeyo kuvaitungile kuli vanu embwe, ikeyo kuyakundamene ku mutambela wakutanga wa kano kaye.

¹² Omo Kilistu wakovelele mu mbalaka, co wakovelelemo lumo ku myaka yoshe mu Mwela Wakujela Manene, kambatele maninga a vimembe na vana va vingombe mukukombelela ngwe n̄ombelo embwe, oloni wambatele maninga endi vavenya mukututambwila kwovoka kuje kwa myaka yoshe.

¹³ Maninga a vimembe na vingombe va nkomba na lito lyakwenyeka lya vana va vingombe vavishamwinine ali vanu vaje nakuvajelesa ku milonga yavo, co livajelesa nakutundisa kujwala kwavo.

¹⁴ Omwo eci capwa ca vushunga, maninga a Kilistu anapanga manene! Ali Munzinzime wa myaka yoshe walyanene ikeye vavenya kupwa n̄ombelo yakujela kuli Njambi. Maninga endi anatujelesa ku citaku-taku ca futisi yetu yangoco ngeci tupangele Njambi wakuyoya.

¹⁵ Omwo cuma eci Kilistu ikeye navwaesa cikumiiyo caliha, ngeci vaje vanasana Njambi vakatambule vivezikiso vya myaka yoshe vije vyanavakulaesa Njambi. Eci casa kulingiwa omwo a kutsa kuje vemikile kwakupatula vanu vatunde ku kupenga-penga kuje valingile omo vakele mu cikumiiyo cakulivanga.

¹⁶ Lizivasano lya mutsi lisholoka nga vavenya natsi,

¹⁷ omwo lizivasano kulikwasa cuma cimo nga uje vavenya acili nakuyoya, oloni vakalikolesa lika omo ikeye natsi.

¹⁸ Mukemwo vene cikumiiyo cakulivanga kucasele kukala kwakujeneka kupangesa maninga.

¹⁹ Akulivanga, Mosesa walekele vanu mashiko a Njambi oshe, ngwe muvaemikile. Co wambatele maninga a vana va vingombe va nkomba na vimembe nakwawakumbasana amo lika na mema, co waashamwinine a livulu lya Lishiko na a vanu voshe na kacishamo ka hisope, co na a a vimanga akuvenga.

²⁰ Co wendekele ngwendi, “Awa akewo maninga akusatesa cikumiiyo ca jambi canashiki ngeci mucononoke.”

²¹ Mu cifwa eci vene lalo, Mosesa wakele nakushamwina maninga a Mbalaka Mwakuliwanena na akamwa ya vyuma vyoshe vije vakele nakupangesa a simbu yakulemesa.

²² Mwa vushunga vene, ku Lishiko vyuma vimo vavijelesele na maninga, co kwakujeneka kwitila maninga, co kukwesi kusamba kwa vivi.

N̄ombelo ya Kilistu ikeyo inatundisa vuvi

²³ Vyuma evi vinapu kutembunwina kwa vyuma vya mu lifuti lya mwilu, co vanavijelesa mu ngila eyi vene. Oloni ku vyuma vya mwilu kuvanga vavijelese na n̄ombelo yaivwa.

²⁴ Omwo Kilistu kakovelele mu Mwela Wakujela wakutunga kuli vanu embwe, uje vatembunwinine ku uje wa vushunga. Ikeye waile mwilu, kuje nasholoka mukutwimanena ku mesho a Njambi.

²⁵ Muka-kukombelela Wakama wa vaYunda wakele nakukovela ku Mwela Wakujela Manene a mwaka na mwaka na maninga a tusitu. Oloni Kilistu kalikombelelele visimbu vyavingi embwe,

²⁶ nga ngoco ni, nga wapandele kuyanda visimbu vyavingi tunde aje vatangelele kaye. Oloni ku shongo ya myaka, washolokele lumolika kuli voshe, mukutundisa vuvi mukulikombelela ikeye vavenya.

²⁷ Munu woshe napande kutsa lumo, co asinoni vakamusompa kuli Njambi.

²⁸ Mu cifwa eci vene, Kilistu lalo walyanene mukulikombelela lumo mukutundisa vivi vya vavangi. Akajomboloka simbu yamucivali, kesi lalo akendeka a vuvi embwe, oloni mukwovola vaje vanamuvandamena.