VaHevelu 8 - Livulu lya Shukulu Kalunga

Yesu ikeye Muka-kukombelela wetu Wakama

¹ Ku vyuma evi vitunendeka nsina ya lijwi, tuli naumo Muka-kukombelela Wakama uje natumbama ku livoko lya cilyo ku litanda lya Shukulu wa Akamwa ya Vyoshe mwilu.

² Alinakupanga ngwe Muka-kukombelela Wakama mu Mwela Wakujela Manene, muje munapu mu mbalaka vene ije yatungile Mwene, kesi vanu embwe.

³ Muka-kukombelela woshe wakama vanamwimika mukwana vwana nakukombelela n̄ombelo ya tusitu kuli Njambi, co lalo muka-kukombelela wetu wakama napande kukala na cuma cimo cakukombelela.

⁴ Ngeci nga wakele ano asi, nga kapandele lalo kupwa muka-kukombelela embwe, omwo kuli vakakukombelela vaje valinakukombelela vwana ngwe ku futisi ya Mashiko a vaYunda.

⁵ Vipangi vivalingile ngwe vaka-kukombelela vyapwile vene ngwe kutembunwina munzinze wa vije vili mwilu. Vije vinapu cifwa cimo vene ngwe mwalingile Mosesa. Omo washimbikile Mbalaka ya Cikumiiyo Njambi wamulekele ngwendi, “Kenga unapande kulinga vyoshe ngwe ku seteko vakumwesele ku munkinda.”

⁶ Oloni ololo, Yesu vamwanene vipangi vya muka-kukombelela vije vyakama manene kutuvakana vipangi vyavo, ngwe ku cikumiiyo cije cavwaesele mukati ka vanu na Njambi cacivwa manene, omwo cinemanena a cikulaeso ca vyuma vyavivwa.

⁷ Nga kukwakele cuma cimo cacivi ku cikumiiyo cakulivanga, nga kukwapandele lalo cikwavo camucivali.

⁸ Oloni Njambi wawanene mulonga muli vanu vendi omo wendekele ngwendi, “Shukulu Kalunga wendekele ngwendi, matangwa alinakwija omo njikalinga cikumiiyo caciha kuli vanu va Isalele, na ku muyati wa Yunda.

⁹ Co kunjikalingi lalo cikumiiyo ngwe muje njalingile kuli vakukulwila vavo a litangwa lije njavatundisile mu lifuti lya Ingito nakuvatwamenena na livoko lyange. Kuvapwile vaka-kulongwa ku cikumiiyo cije njalingile navo, ngeci kunjakeleko mbunge kuli vakevo lalo.

¹⁰ Co kengeni, eci cikeco cikumiiyo njikalinga ololo kuli vanu va Isalele munima ya matangwa aje. Njikaka mashiko ange mu mana avo, co njikawasoneka mu vimbunge vyavo. Ngeci njikapwe nji Njambi yavo, co vakevo vakapwe vanu vange.

¹¹ Co naumo wai lalo wavo akalongesa mukwavo wa mu lifuti lyendi, naumo wai lalo akaleka mukwavo ngwendi, ‘Muzivuke Shukulu Kalunga.’ Omwo voshe vakanjizivuka, kutunda kuli uje wamundondo nakweta kuli mukulunu.

¹² Njikavasambesa ku vivi vyavo, co kunjikanuka lalo vivulumuna vyavo.”

¹³ Akwendeka a cikumiiyo caciha, Njambi napwisa cije cakulivanga kupwa calaja, co cuma coshe calaja cikuluvala, co vwasi-vwasi cizimangana.