VaHevelu 7 - Livulu lya Shukulu Kalunga

Melekizendeki Muka-kukombelela

¹ Melekizendeki wapwile mwene wa ku Saleme muka-kukombelela kuli Njambi wa Akamwa ya Akamwa. Omo Avilahama welukile ku nzita kuje wakatsiile vimyene vawana, Melekizendeki waliwanene nendi, co wamuvezikisile,

² co Avilahama wamwanene cavulikumi ku vyuma vyoshe vije vyakele navyo. Co kulumbunuka kwakulivanga ya lizina lya Melekizendeki kwapwa “Mwene wa Vushunga,” co omwo ikeye wapwile mwene wa ku Saleme, co kulumbunuka kwa lizina lyendi lalo lyapwa “Mwene wa Kwoloka.”

³ Kuli ikeye kukwesi cimweso cakutumbula ishe nambe vaina, nambe vakuku yendi, nambe cimweso ca cisemwa cendi nambe ku kutsa kwendi. Ikeye walifwa ngwe Muna Njambi, ikeye wapwa vene muka-kukombelela wa ku myaka yoshe.

⁴ Kengeni vukama vwendi muvwafwa! Avilahama, kukulwila yetu, wamwaanene cavulikumi ku vyoshe vyawanene mu nzita.

⁵ Co na kuli vatekulwila vaLevi vaje vapwa vaka-kukombelela vavashikile ku Mashiko a Njambi kutambula cavulikumi kuli vanu vaIsalele, eci capwile ngeci, vakevo vakele nakutambula kuli vanu vavo, vakevo vapwile vaka-naanga ya Avilahama.

⁶ Melekizendeke kapwile wakutunda ku naanga ya vaLevi embwe, oloni ikeye watambwile cavulikumi kuli Avilahama, co wavezikisile uje watambwile cikulaeso ca Njambi.

⁷ Co kukwesi vimata a cuma eci uje avezikisa munu ikeye napu wakama kutuvakana uje atambula vivezikiso.

⁸ Co a vin̄anda vya Vaka-kukombelela, vaje vatambula cavulikumi vakevo vaka-kutsa, oloni ngwe ali Melekizendeke, uje atambula ca vulikumi muka-kuyoya ngwe muvinendeka visoneka.

⁹ Co omo Avilahama wafwetele ca mulikumi, calingile ngwe vatekulwila va Levi vakevo lalo vafweta.

¹⁰ Omwo Levi kanda asemuke, oloni wakeleko, wakele mu vinyonga vya kuku yendi Avilahama omo Melekizendeke waliwanene nendi.

¹¹ Mashiko a Njambi vawanene kuli vanu va Isalele! A futisi ya vaka-kukombelela vaLevi. Ololo, nga vipangi vya vaka-kukombelela vaLevi vyapwile vyavivwa, nga kukwasholokele lalo muka-kukombelela va muyati weka, uje ali mu mwela wa Melekizendeke, kesi wakulifwa na Alone.

¹² Omo vuka-kukombelela vakavutengulula, co kuvanga vatengulule lalo mashiko.

¹³ Co Mwene yetu, ali ikeye vyuma evi valinakuvyendeka, wakundama ku muyati weka, co munu naumo wai wa ku muyati wendi wapangele ngwe muka-kukombelela.

¹⁴ Omwo tunazivuka mwamuvwa ngwetu mwene yetu wasemukile ku muyati wa Yunda, co Mosesa kendekele a muyati uje omo wendekele vya vaka-kukombelela.

¹⁵ Vin̄anda vije vyasholokele mwamuvwa, muka-kukombelela wa muyati weka nasholoka, uje wakufwa ngwe Melekizendeke.

¹⁶ Vamupwisile muka-kukombelela kesi ngwe na mashiko nambe vutumbe vwa vanu, oloni a nzili ya mwonyo uje wa myaka yoshe.

¹⁷ Omo visoneka vyendeka ngwavyo, “Yove ukapwa muka-kukombelela wa myaka yoshe, ngwe ku cifwa ca Melekizendeke.”

¹⁸ Lishiko lyalaja vanalyaka kumukulo, omwo lyapwile lyakuzeya, nakujeneka seo.

¹⁹ Omwo Lishiko lya Mosesa kulyasele kupanga cuma cacivwa. Co ololo tuli na cinyangavili cacivwa cije vanatunenelaco a cikeco twasa kushwenya kuyehi na Njambi.

²⁰ Mukuwezelelako, kuli lalo cisingo ca Njambi. Kukwakele cisingo ca cifwa cangacije lalo omo vamo vavapwisile vaka-kukombelela.

²¹ Oloni Yesu vamupwisile Muka-kukombelela a ngila ya cisingo omo Njambi wendekele kuli ikeye ngwendi. “Shukulu Kalunga nalisingi, co kakatengulula viyongola vyendi, Yove ukapwa vene Muka-kukombelela ku myaka yoshe.”

²² Kwangunuka oku, kukekwo kunapwisa Yesu cikumiyo cacivwa.

²³ Co kuli kwangunuka kweka lalo, kukwakele vaka-kukombelela veka vavangi omwo vatsile, co kuvasele kupanga vipangi vyavo.

²⁴ Oloni Yesu wakala myaka yoshe, co vipangi vyendi vyakupwa muka-kukombelela kuvikasa kuya kuli munu weka lalo embwe.

²⁵ Co asa kwamena vaje vaija kuli ikeye, omwo ayoya ku myaka yoshe mukuvaakwila.

²⁶ Ngecivene, Yesu wapwa Muka-kukombelela wakama uje amona ngwe kujeneka kwetu. Wapwa wakujela, muli ikeye kumwesi mulonga nambe vuvi, vanamutundisa mukati ka vanu vaka vuvi, co vamusangwile nakumutwala mwilu.

²⁷ Kapwile ngwe vaka-kukombelela vamo vakama embwe, ikeye kapandele a litangwa na litangwa kukombelela vin̄ombelo akulivanga vya vuvi vwendi, co asinoni vya vuvi vwa vanu. Wakombelele n̄ombelo imo, lumo ku myaka yoshe, omo hwalikombelele ikeye vavenya.

²⁸ Lishiko lya Mosesa linemika vanu vaje vakuzeya kupwa vaka-kukombelela vakama, oloni cikulaeso ca Njambi cije valingile na cisingo, cezile munima ya Lishiko, cinemika Mwana, uje vanapwisa muka-vushunga ku myaka yoshe.