VaHevelu 6 - Livulu lya Shukulu Kalunga

¹ Ngecivene, tuyeni kulutwe ku vilongesa vyakulova, co tusezeni munima vilongesa vyakushangumuka lijwi lya vuka-Yesu. Co kutwapandele lalo kujala luvula lwakutunda mu ngila ya vipangi vyangoco neyi yakukulaela kuli Njambi,

² a vilongesa vyakumbwitika nakukambeka mavoko, na vya akusanguka kwa vatsi na vya cisompeselo ca myaka yoshe.

³ Tuyeni kulutwe! Omu mukemo mutukalinga, nga Njambi atava.

⁴ Vatijo vasa kwiluka vaje vatundile kukukulaela ngeci vatenguluke lalo nakulitavela? Vaje vakele na ceke ca Njambi, voshe vaje vamakelele ku vwana vwa mwilu, co vatambwile Munzinzime Wakujela,

⁵ vaje vazivukile laja lijwi lya Njambi ngwavo linapu lyalivwa, vaje vazivile nzili ya simbu ije ikaija.

⁶ Co nga vaje vombilile kukulaela kwavo! Kucitava kuvelwisa ngeci vatenguluke lalo, omwo vakevo valinakushukika Muna Njambi lalo nakumushawisa ku mesho a mbunga.

⁷ Njambi alinakuvezikisa livu lije lilinakutambula mema a nyonzi ije simbu yoshe ilinakunyokelao, co imenesa vimbuto vyavivwa kuli uje wavilimine.

⁸ Oloni nga kulinakwima mishwena na shaku, co kulyesi na seo yai, lili mu vushonde vyakusingiwa kuli Njambi, co vakalyenyeka na tuhya.

⁹ Oloni nambe nga twendeka ngeci, vasamba va cizemo, mwa vushunga vene, tunazivuka ngwetu muli na vivezikiso vyavivwa vije vinakundama kukwovoka kweni.

¹⁰ Omwo Njambi kesi kwonwa, ngeci evale vipangi vyeni vimwalingile, nambe cizemo cendi cimunamwesa omwo lizina lyendi, omo yeni mwakwasele vaka-kukulaela, na ololo mucili nakuvakwasa.

¹¹ Sholovya yetu inapu yakama ngeci munu na munu akati keni acitwaleo na lukakateya noo na ashongo, ngeci vyuma vyoshe vimulinavyo na cinyangavili vikapwe vya vushunga.

¹² Kutushaka mupwe volwa embwe, oloni mupwe ngwe vaje vaka-kukulaela nakusimpa, co mutambule vije vyanamikulaesa Njambi.

Vushunga vwa cikulaeso ca Njambi

¹³ Omo Njambi walingile cikulaeso cendi kuli Avilahama, walisingile kulinga cije cakulaesele. Omwo kukwakele lalo weka wakumuhyana, wapangesele lizina lyendi vavenya omo walisingile cisingo cendi.

¹⁴ Co wendekele ngwendi, “Njikukulaesa ngwange njikakuvezikisa, co mukatuma manene.”

¹⁵ Co Avilahama wasimpile, co watambwile vije vyamukulaesele Njambi.

¹⁶ Omo vanu vakalingi cisingo vakapangesa lizina lya munu umo uje navahyana, co eci cikeco cikamanesa vimata vyoshe akati ka vanu.

¹⁷ Njambi omo washakele kucisholola mwamuvwa kuli vaje vashakela kutambula cikulaeso cije, co wakulaesele ngeci kashaka lalo kutengulula vutumbe vwendi, ngecivene, wawezeleleleko lalo kulisinga ku cikulaeso cendi.

¹⁸ Ngecivene, kuli vyuma vivali vije kuvitava kuvitengulula nambe a vikevyo Njambi kasa kwendeka makuli. Ngecivene, kuli yetu vaje vanawana kwamena muli ikeye vanatutakamesa manene na lukakateya mbe ku cinyangavili cije vanatutulikila kulutwe.

¹⁹ Tuli na cinyangavili cije ngwe n̄ovo ya cikongo ca mbunge, ikeyo yakukola, yaivwa, ikeyo ipulyasana nanga ije ya mu Njuvo ya Shukulu Kalunga ya mwilu nakukovela ku mulili wakujela,

²⁰ kuje Yesu natutwamenako, co nakovelamo napu laja Muka-kukombelela Wakama wa ku myaka yoshe ngwe ku cifwa ca Melekizendeki.