VaHevelu 5 - Livulu lya Shukulu Kalunga

¹ Muka-kukombelela Wakama woshe wapwa wakwangula akati ka vanu nakumwimika ngeci apangele Njambi mukuvemanenako, kukombelela vin̄ombelo na milambu ya a vuvi.

² Omwo ikeye nendi wapwa wakuzeya mu vingila vyavingi, ngeci napu mukalyovwa-ovwa mukukwasa vaje vali ku vinzimba vaka-kuvulumuna milonga.

³ Omwo ikeye lalo wapwa wakuzeya, napande kukombelela n̄ombelo kesi ya vaje vanu vaka-vivi lika embwe oloni na vuvi vyendi vavenya lalo.

⁴ Naumo wai walyangwile ikeye vavenya kupwa Muka-kukombelela Wakama na kasingimiko kuvanga vamusane kuli Njambi ngeci munu apwe Muka-kukombelela Wakama ngwe muvasanene Alone.

⁵ A ngila eyi vene, Kilistu kalitondelele ikeye vavenya kasingimiko kakupwa Muka-kukombelela Wakama. Oloni Njambi wendekele kuli ikeye ngwendi, “Yove unapu u Munange, litangwa lya lelo njinapu nji Isho.”

⁶ Co ikeye wendekele lalo mu mitambela yeka ngwendi, “Yove ukapwa u muka-kukombelela ku myaka yoshe, ngwe vuka-kukombelela vwa Melekizendeki.”

⁷ Yesu Mukuyoya kwendi ano asi walombele nakwihula na kutambeka na lijwi lyakama na misozi kuli Njambi, uje wasele kumwamena ku kutsa. Omwo ikeye wapwile muka-kulikeesa na muka-kulyana, Njambi wamuzivile.

⁸ Oloni nameme ikeye wapwile Muna Njambi, walilongesele kupwa muka-kwononoka mu n̄avava yendi.

⁹ Omo vamupwisile muka-kujela, wemukile nsina yakwovoka kuje kwa myaka yoshe kuli voshe vaje vamwononoka,

¹⁰ co Njambi wamusholwele kupwa Muka-kukombelela Wakama, kwinga muli Melekizendeki.

Kunangula a kuseza kukulaela

¹¹ Kuli vyavingi vyakwendeka a vin̄anda evi, oloni vyavikalu kuvinungulula kuli yeni, omwo yeni kumwesikuzivisisa vwasi.

¹² Ololo yeni, omwo simbu yakama ineti, mwapandele kupwa muvalongisi, oloni mucijeneka umo amilongese vilongesa vyakulivanga vya lijwi lya Njambi. Mwapandele kulya vyakulya vyakukola, oloni mucili nakunwa mavele.

¹³ Omwo woshe uje muka-kunwa mavele acili mwanike, kazivuka mwamuvwa vin̄anda vya vushunga nambe vyavivi.

¹⁴ Oloni vyakulya vyakukola vyapwa vya vakulunu, vaje vanalilongesa nakwilula nakwangununa mukati ka vyuma vyavivwa nevi vyavivi.