VaHevelu 3 - Livulu lya Shukulu Kalunga

Yesu napu wakama kutuvakana Mosesa

¹ Vakwetu muli Yesu, vaje vasanene Njambi! Yongoleni ali Yesu, uje yatumine Njambi kupwa Muka-kukombelela Wakama kukukulaela kuje tunatava.

² Wapwile wa kulongwa kuli Njambi, uje yangwile kulinga vipangi evi, ngwe Mosesa lalo wapwile wa kulongwa mu vipangi vyendi vyoshe vya mu njuvo ya Njambi.

³ Muka-kutunga njuvo vamusingimika manene kutuvakana njuvo. Mu cifwa eci vene, Yesu nahyana kasingimiko kutuvakana Mosesa.

⁴ Mwa vushunga, njuvo yoshe vaitunga kuli munu, oloni Njambi ikeye muka-kutunga vyuma vyoshe.

⁵ Mosesa wapwile wa kulongwa mu njuvo ya Njambi ngwe ngamba, co wendekele vyuma vije vyakendeka Njambi kulutwe.

⁶ Oloni Kilistu wapwile wa kulongwa ngwe Mwana ashika vya mu njuvo ya Njambi. Yetu tunapu njuvo yendi nga tukakateya nakusimpa nakutakamesa kwetu mu vije tuli navyo na cinyangavili.

Vanu va Njambi vahwima

⁷ Ngecivene, ngwe mwanendeka Munzinzime Wakujela ngwendi, “Lelo vene nga muziva lijwi lya Njambi,

⁸ kesi mukaluwise vimbunge vyeni ngwe muvalingile vakukulwila veni omo vatengulukilile Njambi, ngwe muvalingile litangwa lije mu mambo omo vamwesekele.

⁹ Kuje vanjesekele mwanendeka Njambi ngwendi, nambe vamwene vije vinjalingile a myaka makumi awana.

¹⁰ Ngecivene, njaluvalele na vanu vaje, co njendekele ngwange, ‘Visimbu vyoshe kuvesi nakwononoka, valinakuvyana kwononoka mashiko ange.’

¹¹ Njaluvalele, co njalisingile ngwange, ‘Kumukakovela mu lifuti lije linjashakele kumyana ngeci vakahwiminemo!’ ”

¹² Vakwetu vaka-kukulaela, nyanyameni ngeci mukati keni kesi mukale umo ali na mbunge yaivi yakujeneka kukulaela ngeci atunde kuli Njambi wakuyoya.

¹³ Oloni umo weni kesi vuvi vumukwise nakukaluwisa mbunge yendi, munapande kulinangula umo na mukwavo a litangwa na litangwa, ngwe mulinendeka lijwi mu visoneka ngwalyo “Lelo” lilinakupanga kuli yetu.

¹⁴ Omwo tunatambula kuli Kilistu nga tukakateya na ku shongo kusimpa kuje twakele nakwo akulivanga.

¹⁵ Visoneka vinendeka ngwavyo, “Lelo vene nga muziva lijwi lya Njambi, kesi mukaluwise vimbunge vyeni ngwe muvalingile vakukulwila veni omo vatengulukilile Njambi.”

¹⁶ Veya vaje vazivile lijwi lya Njambi, co vamutengulukilile? Vaje voshe vatwamenenene Mosesa vene calingiwile akuvatundisa mu lifuti lya Ingito.

¹⁷ Njambi waluvalele na veya myaka makumi awana? Ikeye waluvalele na vanu vaje valingile vuvi, vaje vatsililile mu mambo.

¹⁸ Omo Njambi walisingile ngwendi, “Nalumo lwai vakakovela mu lifuti lije njinesi kuvana ngeci vahwiminemo.” Wendekele kuli veyajo? Wendekele kuli vaje vamutengulukilile.

¹⁹ Ngecivene, tumona ngeci kuvasele kukovela mu lifuti omwo kuvakulaelele.