VaHevelu 2 - Livulu lya Shukulu Kalunga

Kwovoka kwakama

¹ Ngecivene, twapande kukakateya mbe ku vushunga vutunazivi, kutewa tukongumuka nakutunda ku vyuma evi.

² Vin̄anda vije tungelo valekele vakukulwila vetu vyasholokele vya vushunga, co munu woshe kavikavangeyeye nambe kuvyononoka watambwile cihiso cije camupandele.

³ Ngecivene, vatijo tukaputumuka ku vyuma evi nga kutwakele vimbunge vyetu ku kwovoka kwakama kwa ngacije? Akulivanga Mwene ikeye wambulwile kwovoka oku, co vaje vazivileko vasholwele kuli yetu ngeci vukaleo ovu vunapu vwa vushunga.

⁴ Co a simbu ije vene Njambi wawezeleleleko vukaleo vwendi ku vukaleo vwavo mukulinga vizivukiso na vikomoweso vyakuliseza-seza namukupangezela vwana vwa Munzinzime Wakujela ngwe ku cizango cendi.

Uje muka-kututwamenena ku kwovoka

⁵ Njambi kaakele tungelo ngeci vakashwane kaye kakaha kaje kalinakwija, kaye kaje tulinakutumbula.

⁶ Oloni ngwe muje muvyendeka Visoneka ngwavo, “Yove Njambi, munu wapwa iyajo ngeci umuyongole? Nambe muna munu ngeci umwilule?

⁷ Yove wamwakele kasimbu kakandondo lika mwisi ya tungelo, wamuzikile cilongo ca vumpau na kasingimiko,

⁸ co wamupwisile muka-kushwana akamwa ya vyuma vyoshe.” Eci cinapu ngeci Njambi watangele munu ngeci “ashwane akamwa ya vyuma vyoshe.” Eci cimwesa ngeci kukumbasanako vyuma vyoshe. Oloni ololo kutwamwene munu ashwana vyuma vyoshe.

⁹ Oloni tunamono Yesu, uje ivanapwisa kasimbu kakandondo lika mwisi ya tungelo, ngecivene, mu kutetela kwa Njambi napande kutsila vanu voshe. Ololo tunamumono vanamuziki cilongo ca vumpau na kasingimiko omwo a kutsa kuje kwayandele.

¹⁰ Capwile ca vushunga ngeci Njambi, uje watangele nakunyunga vyuma vyoshe, apwise Yesu muka-vushunga a tuyando, mukunena vana vavangi ku vumpau vwendi. Omwo Yesu ikeye lika muka-kuvatwamenena ku kwovoka.

¹¹ Ikeye ajelesa vanu ku vuvi vwavo, co ikeye na vaje vanajelesa voshe vali na lshavo umolika. Ngeci Yesu kesi na shwamwa yakuvatumbula ngwendi vasamba vendi.

¹² Nendeka kuli Njambi ngwendi, “Njikaleka vanu vange vije viwunalingi, njikakushangazala mu vikungulukilo vyavo.”

¹³ Co lalo wendekele ngwendi, “Njikakukulaela Njambi.” Co nendeka lalo ngwendi, “Njili amo na vana vaje vananjana Njambi.”

¹⁴ Ngecivene, omo vana vanatambula ku situ na maninga, Yesu nendi lalo walipwisile ngwe vakevo watambwile cisemwa cavo ca vunu vwa ano asi. Ikeye walingile eci ngeci a kutsa anyongese uje wakele na nzili ya kutsa, ikeye vene Liyavola.

¹⁵ Co mu cifwa eci vene akapatule vaje voshe vapwile vindungo mukuyoya kwavo kwoshe omwo lyova lya kutsa.

¹⁶ Omwo cinasholoka ngeci kakwasele tungelo. Oloni ngwe muje muvyendeka visoneka ngwavyo, “Akwasa naanga ya Avilahama.”

¹⁷ Ngecivene, camupandele mu vyoshe alipwise mumolika na vakwavo, ngeci apwe Muka-kukombelela Wakama wa kulongwa na kutetela mu vipangi vyendi ku mesho a Njambi, ngecivene, vuvi vwa vanu vakavusambese.

¹⁸ Omwo wayandele, co wamwene vyeseko, ikeye lalo asa kukwasa vaje valinakumona vyeseko.