VaHevelu 13 - Livulu lya Shukulu Kalunga

Vati tuvwaelelesa Njambi

¹ Kakateyeni mukulizema umo na mukwavo ngwe vasamba muli Kilistu.

² Anukeni kutambula vangenzi mwamuvwa ku vinjuvo vyeni. Omwo kwakele vamo vacilingile, co vatambwile tungelo kujeneka kuzivuka.

³ Anukeni vaje vali mu kamenga, ngwe neni lalo muli mu kamenga amo navo. Anukeni vaje valinakuyanda, ngwe neni lalo mulinakuyanda amo navo.

⁴ Vulo vunapande kukala na kasingimiko kuli voshe, vanalume na vanakazi vanapande kupwa vaka-kulikulaela umo na mukwavo. Omwo Njambi akasompa vaka-kulinga vupangala na vukwizi.

⁵ Kesi mukakateye mu cizemo ca vimbongo, pweni vaka-kujauka na vyuma vije mulinavyo. Omwo Njambi nendeka ngwendi, “Kunjikamiseze nalumo lwai nambe kumivyana.”

⁶ Ngecivene, tupweni vaka-kusimpa nakwendeka ngwetu, “Shukulu Kalunga ikeye mukwasi wange, co kunjizivi lyova. Munu asa kunjilinga vikajo?”

⁷ Anukeni vantwama veni va ku san̄ulu, vaje vamilekele lijwi lya Njambi. Yongoleni vya kunima vati vakevo vayoyele na kutsa, co tembunwineni kukukulaela kwavo.

⁸ Yesu Kilistu ikeye umolika na izau na lelo na ku myaka yoshe.

⁹ Kesi mutave vilongesa vyakuliseza-seza vimitwamenene nakumitundisa mu ngila ya vushunga. Mwamuvwa vimbunge vikolese nakutetela kwa Njambi, kesi akwononoka mashiko a vyakulya, kuli vaje vononoka awa mashiko kuwavakwasa nacimo cai.

¹⁰ Kuli vaka-kukombelela vaje vapangelele mu mbalaka ya vaYunda kuvakele na moko yakulya vyakukombelela ku mutula.

¹¹ Muka-kukombelela Wakama wa kaYunda ikeye muka kutwala maninga a tusitu ku Mwela Wakujela Manene ngwe n̄ombelo yakukombelela a vuvi, oloni mivila ya tusitu yasalele anja ya cilombo nakuyenyekelao.

¹² Mu cifwa cije vene lalo Yesu watsililile anja ya cikolo ca nganda, mukusambesa vuvi vwa vanu na maninga endi.

¹³ Ngecivene, ijeni tuye kuli ikeye anja ya cilombo ngeci tukazivile shwamwa yendi amo.

¹⁴ Omwo kutwesi na nganda yakwishwala ano asi, oloni tulinakukengelela nganda ije ilinakwija.

¹⁵ Ngecivene, ijeni tushangazale Njambi simbu yoshe ngwe n̄ombelo yetu ali Yesu, ikeyo n̄ombelo ya tunwa twetu yakumutava ikeye Mwene.

¹⁶ Kesi mwivale kulinga mwamuvwa nakulikwasa umo na mukwavo, omwo evi vikevyo n̄ombelo vivwaelelesa Njambi.

¹⁷ Ononokeni vantwama veni nakukava mashiko avo. Vakevo valinakuminyungilako myonyo yeni kujeneka kuhwima, omwo vanapande kulyambulwila vipangi vyavo kuli Njambi. Nga yeni muvononoka, co vakalinga vipangi vyavo nakujolela, nga kesi ngoco, co vakavilinga nakuviilila, co nacimo cai cikamikwasa.

¹⁸ Kakateyeni nakutulombelela lalo. Mwa vushunga vene tuli na citaku-taku cacivwa, omwo tushaka kulinga cuma ca vushunga simbu yoshe.

¹⁹ Co njilinakumilomba yeni muvavoshe ngwange njilombeleleni lalo ngeci Njambi anjiilwise lalo kuli yeni vwasi-vwasi.

Lilombelo lyakumanesela

²⁰ Ololo Njambi wa kwoloka uje wasangwile Mwene yetu Yesu ku vatsi, uje napu kanyungi Wakama ka vimanga, a maninga endi a cikumiiyo ca myaka yoshe,

²¹ amyane vyuma vyoshe vyavivwa vije munajeneka ngeci mulinge cizango cendi, ngeci apange muli yeni vije vimuvwaelelesa ali Yesu Kilistu. Co kuli ikeye kukale vumpau ku myaka na myaka! Ewa.

Majwi akumanesela

²² Njilinakumilomba vakwetu, ngwange, tolilileni nakusimpa ku lijwi eli lyakumikolesa, ou mukanda njamisonekela kesi majwi amalaja embwe.

²³ Njishaka muzivuke ngeci ndolome yetu Timateo ololo vanamwecela kutunda mu kamenga. Nga naija vwasi, co njikaija nendi omo njiija nakumimona.

²⁴ Aneni ciindu kuli voshe vantwama veni na kuli vaka-kukulaela voshe. Vakwetu va ku Itali vanatumu ciindu kuli yeni.

²⁵ Kutetela kwa Njambi kukale neni voshe.