VaHevelu 12 - Livulu lya Shukulu Kalunga

Njambi Tatetu

¹ Ngecivene, omwo tuli na mbunga ya vakaleo vavangi vanatuzengeleka. Tutuleni vyuma vyoshe vije vinatulemena, na vuvi vuje vunakakateya ali yetu mbe, co tushatukeni lumbisi na lukakateya seteko ije vanaka kulutwe lwetu.

² Co tukengeni mesho etu ntoma ali Yesu, ali uje kukulaela kwetu cinemana kutunda kukushangumuka kwetu na ku shongo. Kajukile omwo cilindakano! Omwo kujolela cije camuvandamenene, kazivile shwamwa omwo kutsa a cilindakano, co ololo natumbama ku livoko lya cilyo lya litanda lya Njambi.

³ Yongoleni muje mwetile, omo wayandelele vizindo vya vaka-vuvi! Ngecivene, kesi mujuke kulinga mwamuvwa nambe kwenukwa.

⁴ Omwo akuundangana kweni kwakulwisa vuvi, kanda mucilwe nzita na ashongo yakumitsiya.

⁵ Kuma yeni munevala mwaya majwi akumikolesa aje Njambi wendekele kuli yeni akupwa mu vana vendi ndi? “Munage, tolilila omo Shukulu Kalunga akunyanyamesa, co kesi uviilile omo akuvindika.

⁶ Omwo Shukulu Kalunga akanyanyamesa woshe yazema, nakupupa woshe uje napu munendi.”

⁷ Kakateyeni mu tuyando ngwe munu atambula kunyanyamesa kwakutunda kuli ishe, omwo n̄avava yeni ilinakumwesa ngeci Njambi alinakumipangesa ngwe mu vana vendi. Kuma kwali mwana umo uje kuvanyanyamesele kuli ishe ndi?

⁸ Nga yeni kuvaminyanyamesa, ngwe muvakanyanyamesa vana, co eci cinalumbunuka ngeci yeni kesi mu vana vavavwa, oloni munapu mu vana va calu.

⁹ Mu cisemwa cetu ca ano asi, vatatetu valinakutunyanyamesa, co tulinakuvasimika. Ngecivene, cinatuvakana manene kwononoka kuli Tatetu mu munzinzime ngeci tuyoye!

¹⁰ Vatatetu va cisemwa ca ano asi vatunyanyamesa kasimbu kakandondo lika, ngwe mucinasholoka vushunga ku mesho avo, oloni Njambi alinakucilinga ngeci tupwe vakujela tukalipangele vumpau vwendi.

¹¹ Omo valinakutunyanyamesa, kuli yetu cilinakusholoka ngwe cuma cakutuviililisa, kesi cakutuvwaelelesa embwe. Oloni kulutwe kuli vaje valinakuviilila nakunyanyamesa eci vakatambula cikandelela ca kwoloka ca mwonyo wa vushunga.

Vilongesa nakunangula

¹² Ngecivene, junduleni mavoko eni aje anatepuka, co koleseni mavuli eni akuzeya!

¹³ Endeni mu vingila vyakushungama, ngeci lindi lije lya vulema kesi likatanuke.

¹⁴ Esekeni kukala mu kwoloka na vanu voshe, co lalo esekeni kuyoya na lyovwa-ovwa, omwo nga evi vyahi ku munu, co kakamono Mwene.

¹⁵ Nyanyameni kutewa umo akeluka munima kutunda ku mema ku mbunge ya Njambi. Nyanyameni akati keni kesi umo apwe ngwe muti wakulula uje umena nakunena tuyando twatungi na vushungu vwawo.

¹⁶ Nyanyameni ngeci naumo wai apwe muka-vupangala nambe muka-mbunge yaivi ngwe Isau, uje walandesele vukulunu vwendi kuli shongo yendi na tuvyakulya twatundondo lika.

¹⁷ Munima yevi, munazivuka ikeye washakele kutambula civezikiso kuli ishe, oloni vamuvyanene, omwo kasele kutengulula cije calingile, nambe walilile na misozi kaciwanene.

¹⁸ Yeni kumwezile ngwe vanu vaIsalele vezile ku vije mwasa kukwata ku Munkinda wa Sinai uje washukumine na tuhya nakuzivala vwii na lisusulungu na lihunzi lyakama,

¹⁹ kusika kwa lupembo, na cililimo ca lijwi. Omo vanu vazivile lijwi, co valombele ngwavo kesi vazive lijwi likwavo lalo embwe,

²⁰ omwo kuvasele kutambula vije vavashikile ngwavo, “Nambe nga kasitu umo aitila kuje ku minkinda vanapande kumwasha mamanya vamutsiye.”

²¹ Vije vamwene vyavazivisile lyova lyakukomokesa manene ngeci Mosesa wendekele ngwendi, “Yange njilinakujaja na lyova!”

²² Oloni, yeni munaija ku Munkinda wa Siyone na nganda ya Njambi wakuyoya, Yelusalema ya mwilu, na tungelo vamwo vavangi-vangi.

²³ Yeni munaija kukuvwaelela ku cikungulukilo ca vana va ntwatwa va Njambi, vaje mazina avo vanawasoneka mwilu. Yeni munaija kuli Njambi, uje muka-kusompa vanu voshe, na ku minzinzime ya vanu vaje vanapwisa vaka-vushunga.

²⁴ Yeni munaija kuli Yesu, uje navwaesa cikumiiyo caciha, nakukushamwina kwa maninga anatukulaesa vyuma kutuvakana maninga a Avele.

²⁵ Ngecivene, nyanyameni kesi mukanangane uje alinakwendeka kuli yeni. Vaje vavyanene kumutolilila uje wendekele majwi a Njambi ano asi kavasele kuputumuka, co yetu tukaputumuka vati, nga tukengesa nima kuli ou alinakwendeka mwilu?

²⁶ Lijwi lyendi lyajajesele kaye a simbu ije, oloni ololo ikeye natukulaesa ngwendi, “Njikajajesa lalo asi, oloni kesi asi lika na lilu lalo.”

²⁷ Lijwi eli, “lalo” litumwesa mwamuvwa ngeci vyuma vyakutanga vakavijajesa nakuvishandola, ngeci vyuma vije kuvikajaja vikevyo vikasalao.

²⁸ Ngecivene, tukandeleleni omwo tukatambula vumwene vuje kuvwesi kujaja. Tukandeleleni nakulemesa Njambi na ngila ije yasa kumuvwaelelesa na kalemeso na lyova,

²⁹ omwo Njambi yetu mwa vushunga wapwa tuhya twakunyongesa.