VaHevelu 11 - Livulu lya Shukulu Kalunga

Kukulaela

¹ Akukulaela tukala na vushunga vwakuzivuka ngeci tukatambula vyuma vije tulinakukengelela, nakutava vyuma vije kanda tumone.

² Akukulaela kwavo vanu va ku san̄ulu vatambwile vukaleo vwavuvwa kuli Njambi.

³ Akukulaela, tunazivuka ngeci vyuma vyoshe Njambi wavitangele na lijwi, ngecivene, vije twasa kumona vavitangele ku vyuma vije kutwasa kumona.

⁴ Akukulaela, Avele wakombelelele kuli Njambi n̄ombelo yakutuvakana ya Kaine. Akukulaela kwendi watambwile vukaleo vwavuvwa kuli Njambi ngeci ikeye munu muka-vushunga, omwo Njambi vavenya watavele vwana vwendi. Ngecivene, akukulaela kwa Avele, nambe watsa laja, oloni acili nakwandeka.

⁵ Akukulaela, Inoke kamwene kutsa. A ngila ije vene, vamutwalele kwilu kuli Njambi, co naumo wai wamuwanene, omwo Njambi wamutwalele kwilu. Omwo visoneka vyendeka ngwavyo omo Inoke kanda vamutwale mwilu wavwaelelesele Njambi.

⁶ Naumo wai asa kuvwaelelesa Njambi akujeneka kukulaela, omwo uje aija kuli Njambi napande kukulaela ngeci Njambi kwali na ikeye muka-kwana cikandelela kuli vaje valinakumushakezeka.

⁷ Akukulaela, Nowa wazivile kunangula kwa Njambi a vyuma vya kulutwe vije kasele kumona. Wononokele, ngeci washongele vwato muje ikeye na vana vendi vovokelele. Mu ngila ije, vahisile kaye koshe, co Nowa watambwile kuli Njambi vushunga vuje vwatundile akukulaela.

⁸ Akukulaela, Avilahama wononokele Njambi omo wamusanene, co watundile mu lifuti lyendi waile ku lifuti lije lyamukulaesele Njambi. Wasezele lifuti lyendi oloni kazivukile kuje kwaile.

⁹ Akukulaela wayoyele mu lifuti lije lyamukulaesele Njambi, nambe ngwe ikeye wakele mu lifuti lya vungenzi. Wakele mu vimbalaka, ngwe mwalingile Isake na Yakomba, ava na vakevo lalo vatambwile cikulaeso ca cifwa cimo kuli Njambi.

¹⁰ Omo Avilahama wavandamenene nganda ije Njambi yamwinikilile kumutungila, nganda ije ya luvula lwa myaka yoshe.

¹¹ Akukulaela, Avilahama wapwile cisemi nambe ikeye wakuluvalele manene, co na Sala lalo kasele kukala na vana. Wakulaelele kuli Njambi kunyunga cikulaeso cendi.

¹² Nambe ikeye wakuluvalele manene kuyehi na kutsa, kuli munalume ou umo, kwasemunwininine vatekulwila ngwe vingononosi vya mwilu naumo wai asa kuvilava ngwe vinona vya lishen̄avu lya ku ngenge ya mema a kalunga.

¹³ Vanu voshe ava vatsile mukukulaela, kuvatambwile vyuma vije vyavakulaesele Njambi, oloni vavimwenene kulyala, co vavitambwile mwamuvwa, vatavele mutanya mwelu ngeci vapwile vangenzi na vaka-kwendangana ano asi.

¹⁴ Ava vendeka vyuma evi vasholola mwamuvwa ngeci vashakezekele lifuti lyavo vavenya.

¹⁵ Mwa vushunga kuvayongwele lifuti lije livasezele, nga valiyongwele nga vamwene mwakwilukako.

¹⁶ Oloni vakele na sholovya ya lifuti lyalivwa, lifuti lya mwilu. Ngecivene, Njambi kesi na shwamwa omo vamutumbula ngwavo ikeye Njambi yavo, omwo navavwaesela nganda yavo.

¹⁷ Akukulaela, Avilahama waanene munendi Isake kupwa n̄ombelo, omo Njambi wamwesekele. Kuli Avilahama lika Njambi walingile cikulaeso, nameme ngoco, walivwaeselele cimweja kwana munendi umolika kupwa n̄ombelo.

¹⁸ Co Njambi wendekele kuli ikeye ngwendi, “Ali Isake vene akeo ukakala na vatekulwila.”

¹⁹ Omwo Avilahama wakulaelele ngeci Njambi asa kusangula Isake ku vatsi, mukemwo vene Avilahama watambwile Isake ku vatsi.

²⁰ Akukulaela, Isake waanene cikulaeso ca vivezikiso vya kulutwe kuli Yakomba na Isau.

²¹ Akukulaela, Yakomba wavezikisile vana va Yosefa voshe omo ikeye kanda atse. Ikeye wajendamenene a mukombo wendi nakulemesa Njambi.

²² Akukulaela, Yosefa, omo ikeye wakele kuyehi na kutsa, wendekele vyakutuuka kwa va Isalele mu Ingito, co wavalekele vati vanapande kulinga na vitsiya vyendi.

²³ Akukulaela, visemi va Mosesa vamushwekele vingonde vitatu kutunda akusemuka kwendi. Vamwene ngeci wapwile mwanike wamuvwa manene, co kuvazivile lyova, valeulwile mashiko a mwene.

²⁴ Akukulaela, Mosesa, omo ikeye wakolele, co wavyanene kumutumbula mutekulu wa Falo.

²⁵ Wayongwele ngeci mwamuvwa kumona tuyando amo na vanu va Njambi kutuvakana kuvwaelela kwa kasimbu lika mu vuvi.

²⁶ Wacimwene ngeci tuyando na kayengu ka ali uje Wakuvwavesa vili kulutwe manene kutuvakana vufuko vwa mu Ingito, omwo wakengele mesho endi a cikandelela cije ca kulutwe.

²⁷ Akukulaela, Mosesa watundile mu Ingito kakele na lyova lyakutewa vukalu vwa mwene. Nambe ngwe namono laja Njambi uje kutwasa kumona, co wavyanene kwilukilako.

²⁸ Akukulaela, washikile kunyunga Ciwano ca Pasovala, co washikile lishiko lyakushamwina maninga ku vikolo, ngeci uje Kangelo Muka-kutsiya kesi atsiye vana va vanalume va ntwatwa va vaIsalele.

²⁹ Akukulaela, vanu va Isalele kwavasesele kujavuka Lishali Lyakuvenga ngwe a nunda yangoco, omo vaka-Ingito vesekele kucilinga, co voshe vanyongele.

³⁰ Akukulaela, vivumbe vya Yeliko vyalundumukilile asi omo vaIsalele vavizengelekele matangwa atanu na avali.

³¹ Akukulaela, uje cikwizi Lahave kuvamutsiile amo na vaje vaka-kujeneka kwononoka Njambi, omwo ikeye watambwile mwamuvwa vaje vaka-kunenga ngwe vasamba.

³² Vikajo njinapande kwendeka lalo? Omwo kunjesi na simbu yakwendeka vya Ngilyoni na Mbalake na Samusoni na Njefeta na Ndaviti na Samwele na vaka-kwimanena.

³³ Akukulaela vakevo valwisilile mafuti, co vahyanene. Valingile vya vushunga, co vatambwile vije vyavakulaesele Njambi. Vashokele tunwa twa vindumba,

³⁴ vazimine tuhya twatukalu, co vaputumukile kukuvatapa na mukwale. Vapwile vaka-kuzeya oloni vemukile vaka-nzili, vapwile vaka-nzili mu nzita, co vahyanene mashwalale va vangenzi.

³⁵ Akukulaela vanakazi vatambwile vavushoko vwavo va kutsa vaje vasangukilile ku mwonyo. Vamo vamwene tuyando twakama, kuvatavele kutambula kupatuka ngeci vatambule cisangukilo lalo ca mwonyo wauvwa.

³⁶ Vamo vavashendumwine nakuvapupa, co veka lalo vavakutile mu malyenge nakuvaka mu kamenga.

³⁷ Vavashele mamanya, vavatetangele na visaa, vavatapele na mikwale. Vendanganene vanazala vilambu vya vimanga nambe vya vimembe, vapwile tuutu vavayandesele nakuvapangesa mwamuvi.

³⁸ Kaye kavemukilile! Vendanganene ngwe vaka-kwendangana mu mambo na mu malundu, vayoyelele mu manzenzengoma na mu viteke.

³⁹ Voshe vaje, nambe vamuvwaelelesele Njambi akukulaela kwavo, kuvatambwile cije cavakulaesele Njambi,

⁴⁰ omwo Njambi wayongweleo nakuwana vutumbe vwakuhyana ali yetu. Vutumbe vwendi vunapu omo akukala amo netu ngeci vapwe vakujela.