VaHevelu 10 - Livulu lya Shukulu Kalunga

¹ Lishiko lya vaYunda kulyapwile kutembunwina mwamuvwa vyuma vya vushunga, likelyo lyapwa ngwe munzinze wakulitalanganya wa vyuma vyavivwa vije vilinakwija. Vin̄ombelo vije vakele nakukombelela simbu yoshe a mwaka na mwaka. Vatijo Lishiko a vin̄ombelo evi lyasa kujelesa vanu vaje valinakwija kuli Njambi?

² Nga vanu vaje valemesa Njambi vanavajelesa ku vivi vyavo nga kuvasa kuziva cishota-mbunge lalo a mulonga wa vuvi, co nga vin̄ombelo vyoshe vanavimika.

³ Nameme ngoco, vin̄ombelo vyakele nakupanga a mwaka na mwaka mukwanukisa vanu vivi vyavo.

⁴ Omwo maninga a vingombe va nkomba na vimembe kuwasele kutundisa vivi vya vanu.

⁵ A cuma eci, omo Kilistu wezile a kaye, wendekele kuli Njambi ngwendi, “Yove kuushaka vin̄ombelo na milambu ya tusitu, oloni unanjivwaesela muvila.

⁶ Yove kuwesi kuvwaelela na tusitu vakwenyeka voshe vamutunu a mutula nambe na vin̄ombelo vyakutundisa vivi.

⁷ Asinoni njendekele ngwange, ‘Yange uno njilinge cizango cove, Yove Njambi, ngwe muvasoneka vene ali yange mu livulu lya Lishiko.’ ”

⁸ Akulivanga wendekele ngwendi, “Yove kuwashakele nambe kuvwaelela na vin̄ombelo na vwana milambu, nambe tusitu vakwenyekela a mutula na vin̄ombelo vyakutundisa vivi.” Wendekele evi nambe vin̄ombelo vyoshe evi vakavikombelela ngwe ku Lishiko.

⁹ Asinoni wendekele ngwendi, “Yange uno, Yove Njambi, mukulinga cizango cove.” Ngecivene, Njambi natundisa vin̄ombelo vyoshe vyalaja, co naaka n̄ombelo ya Kilistu mu mwela wavyo.

¹⁰ Omwo Yesu Kilistu walingile vije vyashakele Njambi ngeci avilinge, yetu voshe tunajele ku vuvi a n̄ombelo ije yalingile ya muvila wendi vavenya, wailingile lumo lika.

¹¹ Vaka-kukombelela voshe vakemana a litangwa na litangwa mukupanga nakukombelela vin̄ombelo vya cifwa cimo visimbu vyavingi, oloni vin̄ombelo evi kuvyasa kutundisa vivi nalumo lwai.

¹² Oloni Kilistu wakombelelele n̄ombelo imo a vivi, co yapwile n̄ombelo ya ku myaka yoshe, asinoni watumbamene ku livoko lya cilyo lya Njambi.

¹³ Kuje ikeye navandamena noo Njambi akaka vitozi vendi kupwa vilyatelo vya myanja yendi.

¹⁴ Ngecivene, a n̄ombelo imo, najelesa voshe vaje vanajele ku vuvi.

¹⁵ Co Munzinzime Wakujela alinakutumwesa lalo vukaleo vwendi. Omo wendekele akulivanga ngeci Shukulu Kalunga alinakwendeka ngwendi,

¹⁶ “Eci cikeco cikumiiyo cinjikalinga amo navo ku matangwa a kulutwe. Njikaka mashiko ange mu vimbunge vyavo nakuwasoneka mu viyongola vyavo.”

¹⁷ Co wendekele ngwendi, “Kunjikanuka lalo vivi vyavo na vilinga vyavo vyavivi.”

¹⁸ Ngecivene, omo evi vanavisambesa, co kukwesi n̄ombelo yeka yakutundisa vivi lalo.

Tushwenyeni kuyehi na Njambi

¹⁹ Ngecivene, vakwetu, twasa kukovela nakusimpa mu Mwela Wakujela Manene omo a kutsa kwa Yesu.

²⁰ Ikeye natushokolwela ngila yaiha yakuyoya, yakutuvakana livamba lije, likelyo muvila wendi.

²¹ Tuli na Muka-kukombelela Wakama ikeye ashika mu njuvo ya Njambi.

²² Ngecivene, tushwenyeni kuyehi na Njambi na vimbunge vya lyovwa-ovwa nakukulaela kwa vushunga, na vimbunge vije vanavijelesa ku citaku-taku ca milonga na mivila ije vanajwelesa na mema akujela.

²³ Co tukakateyeni mbe ku cinyangavili cije tunatava, omwo tunakulaela ngwetu Njambi nanyungu cikulaeso cendi.

²⁴ Ngecivene, tuliyongoleni umo na mukwavo nakulikwasa umo na umo nakumwesa cizemo nakulinga mwamuvwa.

²⁵ Kesi tulikele kulikungulula amolika, ngwe futisi ya vamo. Oloni tulikoleseni umo na mukwavo nakuhyana, omwo Litangwa lya Mwene lili muyehi.

²⁶ Omwo nga tulinga vuvi na cizango omo tunazivuka laja vushunga, co kukwesi lalo n̄ombelo yeka yakutundisa vivi.

²⁷ Oloni kunasala lika kuvandamena na lyova Kusompa kuje kuli nakwija, co na litende lya tuhya lije likanyongesa vaje vashaula Njambi!

²⁸ Munu woshe uje kononokele Lishiko lya Mosesa vanapande kumutsiya kujeneka kumuzivilako mema ku mbunge omo mulonga wendi vakausompa a vakaleo vavali nambe vatatu.

²⁹ Ngecivene, cikafwa vatijo kuli munu uje ashaula Muna Njambi? Nga apopolola maninga a cikumiiyo ca Njambi ngwe cuma cangoco aje anamujelesa ku vuvi? Co ashaula Munzinzime wa mema ku mbunge? Co cihiso ca munu wangacije cikapwa cakama manene!

³⁰ Omwo tunazivuka uje wendekele ngwendi, “Njikalinga shambandinga, co njikavelwisila fweto yavo,” nendeka lalo ngwendi, “Shukulu Kalunga akasompa vanu vendi.”

³¹ Cinapu cuma cakujajesa kuwila mu mavoko a Njambi wakuyoya!

³² Anukeni mumwafwile ku simbu ya laja. A matangwa aje, omo Njambi watwililile ceke ali yeni, mwayandele ku vyuma vyavingi, oloni kuvyamihyanene.

³³ Co vakele nakumishaula nakumiyandesa visimbu vyavingi mutanya mwelu ku mesho a vanu, co ku simbu ikwavo lalo mwashakele kulipandakana na vaje vavayandesele mu cifwa cije vene.

³⁴ Yeni mwalipangelele n̄avava ya vunzinda, co omo vevile vyeni vyoshe, co yeni mwakakateyeye nakujolela ku vyeni vije vyazimbalele, omwo mwazivukile ngeci muli na vyuma vyavivwa kutuvakana vije, vyuma vije vikakalako simbu yoshe.

³⁵ Ngecivene, kesi mumbile kuti kusimpa kweni kuje kuli na cikandelela cakama manene.

³⁶ Munapande kupwa vaka-kusimpa, ngeci mulinge cizango ca Njambi, co mukatambula vije vyanakulaesa.

³⁷ Ngwe muje muvyendeka visoneka ngwavyo, “Kucili kasimbu kakandondo lika co uje alinakwija akaija, co kakeshwala embwe.

³⁸ Oloni vanu vange vaka-vushunga vakakulaela, co vakayoya, oloni nga umo wavo eluka munima, co kunjikavwaelela nendi.”

³⁹ Yetu kesi tu vanu vaka-kwiluka munima nambe vaka-kuzimbala embwe. Oloni tunapu tu vaka-kukulaela nakwovoka.