Tito 3 - Livulu lya Shukulu Kalunga

Futisi ya vaka-Yesu

¹ Anukisa vanu vove vapwe vaka-kulikeesa kuli vaka-kushwana na vaje vali na moko yakushwana, ngeci vavononoke, nakulivwaesela mukulinga mwamuvwa mu vyuma vyoshe.

² Valeke kesi vakashaule munu naumo wai, oloni vapwe vaka-kwoloka nakulizema, co simbu yoshe vasholole vuvwa vunapandemo ku mesho a vanu voshe.

³ Omwo yetu lalo twapwile tu vilema, vaka-kujeneka kwononoka, nakulinga mwamuvi. Twapwile tu vindungo va mashungu na senga yakuliseza-seza. Twombilile simbu yetu mu vyuma vya muuka na nuna, vakwetu vatuzindile, co netu twavazindile.

⁴ Oloni omo ngozi na cizemo ca Njambi Muyoyesi wetu vyasholokele,

⁵ ikeye watwovwele. Kesi ngwe ku vilinga vyetu vavenya vyakushungama vitwalingile embwe, oloni omwo ku kutetela kwendi vavenya ngeci watwovwele, ali Munzinzime Wakujela uje natwana kusemuka kwakuhwa na mwonyo wauha akutukusha.

⁶ Njambi wetilile mu vungi Munzinzime Wakujela ali yetu ali Yesu Kilistu Muyoyesi wetu,

⁷ ngeci a kutetela kwendi vatupwise vaka-vushunga ku mesho a Njambi nakutwana mwonyo wa myaka yoshe uje tulinakukengezeka.

⁸ Oku kunapu kwendeka kwa vushunga. Njishaka wendeke manene vyuma evi, ngeci voshe vaje vaka-kukulaela kuli Njambi vakane simbu yavo mukulinga vipangi vyavivwa, vije vinapu vyavivwa, co vikwasa vanu.

⁹ Oloni yove tewa ku vimata vya vulema, na vya mikana ya mazina a vakukulwila nakujokota nakulizunga a Lishiko. Evi vinapu vyangoco-ngoco, kuvyesi na seo.

¹⁰ Nangula lumo nambe luvali munu uje anena kaangu, co anima kesi ulinge cuma ceka lalo nendi.

¹¹ Unazivuka ngeci munu wa cifwa cangacije wamuvi, co vivi vyendi vilinakumusholola ngeci naviisa.

Vilongesa vyakumanesela

¹² Omo njikatuma Aletemase nambe Taikikase kuli yove, co unapande kweseka kwija kuno kuli yange ku Nikopolise, omwo njayongola kukala kuje cisika coshe.

¹³ Unapande kukwasa Zenase muka-mashiko na Apolo kuvwaesa vya vungenzi vwavo, co lalo kenga mwamuvwa ngeci vakale na vyoshe vya a vungenzi vwavo vije vashaka.

¹⁴ Vanu vetu vanapande kulilongesa kukala na simbu yakulinga vipangi vyavivwa, ngeci kesi vajeneke cuma cimo, co kuvapandele kuyoya mu vyuma vyangoco-ngoco.

¹⁵ Voshe vaje njilinavo kuno vanatumu viindu kuli yove. Ana viindu vyetu kuli vasamba vetu voshe mukukulaela. Kutetela kwa Njambi kukale neni voshe.