Tito 2 - Livulu lya Shukulu Kalunga

Vilongesa vya vushunga

¹ Oloni yove longesa vyuma vije vinalizivasana na vilongesa vya vushunga.

² Longesa vakulunu ngeci vapwe vaka-kulikongomeka, vaka-mana, vaka-kulinyunga vakevo vavenya, vaka-kushungama mukukulaela kwavo, mu cizemo, na mu lukakateya.

³ Na kuli vakulunu va vanakazi ngoco lalo vanapande kupwa vaka-kulisingimika ngwe muvakalingi vanakazi vaje vayoya yoyesi yakujela. Kuvapandele kupwa vaka-lufwe nambe vapwe vindungo va vinyu. Vanapande kulongesa vyavivwa

⁴ ngeci valongese vambanda kuzema vanalume vavo, na vana vavo,

⁵ vapwe vaka-kulinyunga, vajele, co vapwe vaka-kunyunga vinjuvo vyavo, vapwe vaka-kwononoka vanalume vavo, ngeci lijwi lya Njambi kesi valishaule kuli munu umo embwe.

⁶ Mu ngila eyi vene, sindiya vakwenje lalo ngeci valinyunge vakevo vavenya.

⁷ Mu vyuma vyoshe yove vavenya unapande kupwa cimweso mu vipangi vyavivwa. Mu kulongesa kwove mwesa kulikongomeka nakuyongola mwamuvwa.

⁸ Pangesa majwi akushungama aje kuwesi na kapenga, ngeci vitozi vove vakale na shwamwa,co vonwe kwendeka vyavivi ali yetu.

⁹ Vindungo vanapande kwononoka kuli vashukulu vavo nakuvavwaelelesa mu vyuma vyoshe. Kuvapandele kukumbulula na kaleulwizi,

¹⁰ nambe kuvevila embwe. Oloni vanapande kumwesa ngeci simbu yoshe vakevo vapwa vavavwa va kulongwa, ngeci vamwese vuvwa vwa vilongesa vya Njambi Muyoyesi wetu mu vyuma vyoshe vije valinakulinga.

¹¹ Omwo Njambi nasholola kutetela kwendi mukwamena vanu voshe.

¹² Kutetela oku kulinakutulongesa kuvyana yoyesi yakujeneka kulemesa Njambi na mashungu amavi, nakuyoya yoyesi yakulemesa Njambi ano a kaye mukulinyunga na mukushungama,

¹³ ngwe omo tulinakutumbamena Litangwa lyakuvezika lya cinyangavili cetu, omo vumpau vwa Njambi yetu wakama na Muyoyesi Yesu Kilistu vukasholoka.

¹⁴ Walyecelele ikeye vavenya ali yetu, mukututundisa ku vivi vyoshe nakutupwisa vanu vakujela vakukundama kuli ikeye lika vaje vali na cizango cakulinga vyavivwa.

¹⁵ Longesa vyuma evi, co pangesa moko yove omo utakamesa nakuvindika vaje vakakukutolilila. Kesi utave umo wavo akuyelwise.