Tito 1 - Livulu lya Shukulu Kalunga

¹ Mukanda wakutunda kuli yange Paulu, ngamba ya Njambi na muluwa wa Yesu Kilistu. Vanjangwile nakunjituma mukukwasa kukulaela kwa vanu va Njambi vakwangula nakuvatwamenena ku vushunga vuje vuvavalongesele ku futisi yakulemesa Njambi,

² vuje vunemana a cinyangavili ca mwonyo uje wa myaka yoshe. Njambi uje kesi kukwisa, watukulaesele mwonyo ou simbu kanda vatange kaye,

³ co wausholwele a simbu yaivwa mu lijwi lyendi. Eci vanjikundikileco yange, co njicambulula akushika kwa Njambi Muyosesi wetu.

⁴ Njilinakusonekela kuli Tito, munange wa vushunga mukukulaela kuje tulinakwo yetu voshe. Njambi Tatetu na Kilistu Yesu Muyoyesi wetu vakwane kutetela na kwoloka.

Vipangi vya Tito mu Kelete

⁵ Evi vikevyo njakusezelele mu Kelete ngeci uvwaese vyuma vyasaleleko, nakwimika vakulunu va vikungulukilo ku nganda na nganda. Anuka vilongesa vyange,

⁶ mukulunu wa cikungulukilo napande kupwa wakujeneka mulonga, napande kupwa munalume wa munakazi umolika, co vana vendi vanapande kupwa vaka-kukulaela, kesi vipapoki nambe vaka-kujeneka kwononoka embwe.

⁷ Omwo ntwama wa cikungulukilo napu kanyungi ka vipangi vya Njambi, napande kupwa wakujeneka mulonga. Kapandele kupwa muka-kulyalesa nambe muka-kuluvala vwasi, nambe muka-kupenda, nambe muka-lwozi, nambe muka-cipululu ku vimbongo,

⁸ oloni apwe muka-kujumbula vangenzi na muka-kuzema vyavivwa. Napande kupwa muka-kulinyunga, muka-kushungama, muka-kujela na muka-kwononoka.

⁹ Napande kupwa muka-kukakateya mu lijwi mbe, lije vasa kukulaela, co lilitavasana nakulongesa kwetu. Mu ngila eyi vene akasa kutakamesa vakwavo na vilongesa vya vushunga, nakusholola lalo milonga ya vaje valinakushaula lijwi.

¹⁰ Omwo kuvali vavangi vaka-kuumukwa na vaka-kulwisa vakwavo na vyuma vyavo vyangoco, manene vaje vaka-futisi ya vaYunda.

¹¹ Cinapande vene kuvindika vyendeka vyavo, omwo vakevo valinakutanganesa naanga yoshe yamutunu nakulongesa vije kuvyavapandele, nevi vivalinakulinga a vutumbe vwavo vwa shwamwa vwakunganyala vimbongo.

¹² Co umo wavo, umo wa vaka-kwimanena wavo wendekele ngwendi, “Vaka-Kelete simbu yoshe vapwa vaka-makuli, vikashama vya vuvi, volwa vakulakama.”

¹³ Vije vyendekele vyapwile vya vushunga. Ngecivene, vendekele na majwi akuvambuka ngwe moko, ngeci vakele nakukulaela kwamutunu,

¹⁴ ngeci kesi vakatolilile ku visimo vya vaYunda na ku mashiko akutunda kuli vanu vaje vanavyana vushunga.

¹⁵ Vyuma vyoshe vinajele kuli vaje vanajele, oloni kukwesi cuma cakujela kuli vaje vanalijwalesa, co lalo kesi vaka-kukulaela, omwo mana avo na citaku-taku cavo vinajwala.

¹⁶ Vendeka ngwavo vazivuka Njambi, oloni ku vipangi vyavo vanamuvyana. Vakevo vanapu vaka-kumuzinda na vaka-kujeneka kumwononoka, co kuvapandelemo mukulinga vyuma vyavivwa.