Njwele 3 - Livulu lya Shukulu Kalunga

Njambi akasompa miyati

¹ Shukulu Kalunga alinakwendeka ngwendi, “A simbu ije njikelwisa vivezikiso vya Yunda na Yelusalema.

² Njikakungulula miyati yoshe nakuvanena mu Cana Cakusompela. Njikavasompesa a vyoshe vije vivalingile kuli vanu vange. Vanashandwela vaIsalele mu mafuti a vungenzi, co vanalipangezela Isalele lifuti lyange.

³ Vakevo vatele n̄ela mukuyongola iyajo umo akambata vaje vinzinda. Valandesele vakwenje na vambanda mu vunzinda, mukufweta ku vukwizi na vinyu.

⁴ “Vikajo mushaka kulinga kuli yange, yeni vaka-Tile na Sindone na mafuti oshe a Filisitiya? Yeni mushaka kunjiilwisila cuma cimo ndi? Nga mukemwo, co nange vwasi-vwasi njikamifweta!

⁵ Munambata siliva yange na ngolinde, co munatwala vufuko vwange mu vinjuvo vya vinjambi veni.

⁶ Munambata vanu va mu Yunda na vanu va mu Yelusalema nakuvatwala kulyala kuvatundisa ku lifuti lyavo nakuvalandesa kuli vaNgelengu.

⁷ Ngeconi njilinakuvelwisa kuvatundisa ku mitambela kuje kumwavalandeselele. Co njikalinga kuli yeni ngwe mumwalingile kuli vakevo.

⁸ Co njikakundika vana veni va vanalume na ava va vanakazi ku mavoko a vanu va mu Yunda, co vakevo vakavalandesela kulyala kuli vaSavene. Yange Kalunga, njinendekamo.

⁹ “Ambululeni akati ka mafuti ngweni, ‘Livwaeseleni cimweja kulwa nzita, saneni vaka-kulwa, kungululeni mashwalale voshe ngeci vaye!

¹⁰ Fuleni matemo eni kuwapwisa mikwale, co vimoko vyeni vyakunongesa minango vifuleni makunga. Nameme munu wakuzeya napande kulwa.

¹¹ Yeni miyati yoshe mwazengeleka kuno, ijeni vwasi-vwasi mukungulukile mu cana.’ ” Yove Shukulu Kalunga, tumako mashwalale vove ngeci vakavalwise.

¹² “Miyati yoshe valivwaesele cimweja kwija ku Cana Cakusompela. Kuje yange Kalunga, njikatumbama nakusompa miyati ije yazengelekako.

¹³ Vuvi vwavo vunatumu manene, vavatuleni ngwe vimbuto a simbu yakuviteja, vatseneni ngwe muvakatsene mikolovozi ya vushuka vwa vinyu mu likamwino lya vinyu noo vinyu vishumuka.”

¹⁴ Vanu vavangi-vangi vali mu Cana Cakusompela, omwo litangwa lya Shukulu Kalunga lili muyehi.

¹⁵ Litangwa na ngonde vikazivala, co vingongonosi kuvikatu ceke lalo.

Njambi akavezikisa vanu vendi

¹⁶ Shukulu Kalunga alinakwaana ngwe ndumba ku Munkinda wa Siyone, lijwi lyendi lilinakuluma ku Yelusalema, asi na lilu vilinakujaja. Oloni akaamena vanu vendi.

¹⁷ “Asinoni, Isalele mukazivuka ngeci yange njapwa Kalunga Njambi yeni. Yange njakala a Siyone, lilundu lyange lyakujela. Yelusalema ikapwa nganda yakujela, vaka-kwija kuvakaifungulula lalo.

¹⁸ “A simbu ije mikolovozi ya vushuka vwa vinyu ikafwika a minkinda, vingombe vakakala a malundu oshe, kukakala mema amangi ku vana va vindonga voshe va mu Yunda. Muna ndonga akaita kutunda ku Njuvo ya Shukulu Kalunga, nakutukumwina Cana ca Mingongo.

¹⁹ “Ingito ikapwa mambo, co Endome ikapwa ngundu, omwo valwisile lifuti lya Yunda nakutsiya vanu vamwo vakujeneka mulonga.

²⁰ Yunda na Yelusalema vikakala na vanu simbu yoshe.

²¹ Njikalingilako sambandinga vaje vavatsiile, nakuhisa vaka-vuvi. Yange Kalunga, njikakala a Munkinda wa Siyone.”