Njwele 1 - Livulu lya Shukulu Kalunga

¹ Awa akewo majwi a Shukulu Kalunga kuli Njwele muna Petwele.

Vanu valinyenga akuviya kwa vimbuto

² Tolilileni, yeni vakulunu, munu woshe ali mu Yunda, atolilile. Kuma cuma cimo cakufwa ngwe eci calingiwile a simbu yeni nambe a simbu ya vakukulwila veni ndi?

³ Lekeniko vana veni cuma eci, na vakevo vakalekeko lalo vana vavo, co vana vavo lalo vakalekeko cisemwa cije cikaija kulutwe.

⁴ Vinjame na vinjame vya vimbimba vyalile vimbuto, co vimbuto vije viyasezele njame imo, njame ikwavo yavinyongesele.

⁵ Indukeni mulile, yeni vaka-kupenda, lileni, yeni vaka-kunwa vinyu, mikolovozi ya vushuka vwa vinyu vuje mukalingi vinyu vyaviha vanainyongesa.

⁶ Vungi vwa vimbimba mikumbi vanaviisa lifuti lyetu, vapwile vaka-nzili manene, co lalo vapwile vavangi, vaje naumo wai wasele kuvalava, mayo avo apwile akuvambuka ngwe a ndumba.

⁷ Vananyongesa mikolovozi yetu ya vushuka vwa vinyu, nakulenda miti yetu ya mikuyu yoshe njwa. Yoshe vanaikovonona vyula, nakuseza minango mwangoco too.

⁸ Lileni, yeni vanu, ngwe mumbanda alila kutsa kwa munalume uje nashakele kumwambata.

⁹ Kukwesi vimbuto nambe vinyu vyakulambula mu Njuvo ya Shukulu Kalunga, vaka-kukombelela valinakulila omwo kukwesi vin̄ombelo vyakukombelela kuli Shukulu Kalunga.

¹⁰ Mahya anaviya, lifuti lilinyenga, omwo vimbuto vinanyongo, na mikolovozi ya vushuka vwa vinyu inomu yoshe cau, na miti ya olive yajujwama.

¹¹ Linyengeni, yeni vandimi, lileni mbimbi-mitwe, yeni vaka-kunyunga vitungu vya mikolovozi ya vushuka vwa vinyu, omwo tiliku na mbale ya maumwa na vimbuto vyoshe vinanyongo.

¹² Mikolovozi ya vushuka vwa vinyu na miti ya mikuyu yajujwama, miti yoshe ya vushuka yajujwama, co inatsi. Kujolela kunahu muli vanu.

¹³ Yeni vaka-kukombelela mukapanga ku mutula, zaleni vikeleya, linyengeni nakulila mbimbi-mitwe! Yeni mu Njuvo ya Shukulu Kalunga nakulila vutsiki vwoshe, omwo kukwesi vimbuto nambe vinyu vyakukombelela kuli Njambi yeni.

¹⁴ Shikeni lishiko lyakulikela kulya, co saneni mbunga yoshe ya vanu! Kungulwileni vantwama na vanu voshe va mu Yunda mu Njuvo ya Shukulu Kalunga Njambi yeni nakulilila kuli ikeye!

¹⁵ Litangwa lya Shukulu Kalunga lili muyehi, litangwa lije omo Muka-nzili yoshe akanena kunyonga. Litangwa lije likapwa lyakujujwisa!

¹⁶ Tulinakukengelela kwakujeneka cinyangavili omwo vimbuto vyetu vilinakunyonga. Kukwesi lalo kujolela mu Njuvo ya Shukulu Kalunga Njambi yetu.

¹⁷ Vimbuto vyoshe vinatsila mu livu lyakuma. Kukwesi vimbuto vyakutulika vyai, ngecivene, vishete vinapu vyamupulungwa.

¹⁸ Vingombe vakumbuka manene omwo kukwesi noku kuvalila mwila wauvwa, co lalo matanga a vimanga alinakuyanda.

¹⁹ Njitambeka kuli yove Shukulu Kalunga, omwo mwila na miti yoshe vinomu cau, ngwe vije vivanenyeka na tuhya.

²⁰ Nameme tusitu valinakutambeka kuli yove, omwo vindonga vyoshe vinomu cau.