Njelemiya 9 - Livulu lya Shukulu Kalunga

¹ Tawee, ngwe mutwe wange wapwile lisima lya mema, co na mesho ange ngwe lisima lya misozi, ngeci njase kulila mutanya na vutsiki omwo vanu vange vaje vavanatsii.

² Tawee, ngwe njakele na mutambela wakutumbama mu mambo kunjashondoloka kuli vanu vange. Omwo voshe vanapu vaka-vungungu.

³ Simbu yoshe vendeka makuli, makuli anatumu mu lifuti kumwesi vushunga embwe. Shukulu Kalunga nendeka ngwendi, “Vanu vange valinakulinga vuvi simbu yoshe, co kuvesi nakumba mbunge kuli yange Njambi yavo.”

⁴ Munu na munu napande kunyunga mukwavo, naumo wai akulaela ndolome yendi, omwo ndolome woshe napu muka-kukwisa ngwe Yakomba, co munu woshe ashaka kufweya musamba wendi.

⁵ Voshe vakalikwisa umo na mukwavo, co naumo wai endeka vushunga, valilongesa kwendeka makuli, kuvakecela vuvi vwavo.

⁶ Shukulu Kalunga nendeka ngwendi, “Mulinakukala akati ka vaka-makuli, ngeci a makuli avo vananjivyana.”

⁷ Omwo vyuma evi, Shukulu Kalunga Muka-nzili yoshe alinakwendeka ngwendi, “Njikajelesa vanu vange ngwe vutale, co njikaveseka. Vanu vange vanalingi vuvi, vikajo lalo vinjilinga navo?

⁸ Majwi avo anafu ngwe mikili yakutsiisa, visimbu vyoshe vendeka makuli. Munu na munu endeka majwi amavwa, kuli mundambo wendi, oloni mu mbunge namulalela vushonge.

⁹ Kuma kunjikavanyanyamesa a vyuma evi ndi? Kuma kunjikalingi shambandinga a muyati wa cifwa cangeci ndi? Yange Kalunga, njinendekamo.”

¹⁰ Njelemiya wendekele ngwendi, “Njikalilila minkinda, co lalo njikalinyenga mitambela kwakulila vimuna, omwo vinomu cau, co naumo wai alinakwendamo. Naumo wai aziva vingombe omo vatamuna, co tuzila na tusitu vanatewa vanai.”

¹¹ Shukulu Kalunga alinakwendeka ngwendi, “Njikapwisa Yelusalema mambo, na vinganda vya mu Yunda kupwa mambo muje mukayoyela vimbanje, ukapwa mutambela uje naumo wai akakalamo.”

¹² Njelemiya wehwile Shukulu Kalunga ngwendi, “Omwo vikajo lifuti lili mupulungwa nakuma cau ngwe mu mambo, ngeci naumo wai alinakwitamo? Iyajo muka-mana asa kuzivisisa evi? Kuli iyajo unavinungulwila ngeci alekeko vakwavo?”

¹³ Shukulu Kalunga wakumbulwile ngwendi, “Eci cinalingiwa omwo vanu vange vanavyana vilongesa vije vinjavanene. Kuvanjononokele, nambe kulinga vije njavalekele.

¹⁴ Oloni vanakaluwisa vimbunge vyavo nakulemesa kamponya Mbale ngeci muvalingile vakukulwila vavo.

¹⁵ Ngecivene, tolilileni cinjikalinga yange Kalunga Muka-nzili yoshe, Njambi ya Isalele, njikalisa vanu vange vyakulya vyakulula nakuvanwisa mwaze.

¹⁶ Co njikavashandwela akati ka miyati ya vanu vaje kuvazivile akulivanga nambe vakukulwila vavo kuvaizivile, co njikatuma mashwalale nakuvalwisa noo njinavanyongesa voshe njwa.”

Vanu va mu Yelusalema vatambeka ngeci vavakwase

¹⁷ Shukulu Kalunga Njambi Muka-nzili yoshe wendekele ngwendi, “Yongoleni evi vilinakulingiwa! Saneni vaka-kulila vaije, saneni vanakazi vaje vazivuka kwimba myaso ya vusiwa.”

¹⁸ Vanu vendekele ngwavo, “Valekeni vazambule, ngeci vakwimbe mwaso wa vusiwa, noo mesho etu anashulu na misozi, ngeci vin̄apeyo vyetu vijule na misozi.”

¹⁹ Tolilileni mutambi wakulila mu Siyone ngwawo, “Twaviya! Cili vene tuli na shwamwa yakama! Tunapande kutunda mu lifuti lyetu, membo etu vanawasiwula.”

²⁰ Njelemiya wendekele ngwendi, “Yeni vanakazi tolilileni lijwi lya Shukulu Kalunga. Longeseni vana veni va vanakazi kulila, nakulongesa vasamba veni kwimba myaso ya vusiwa.

²¹ Kutsa kunatukovelela mu vinjanena vyetu, co kunakovela na mu vinjuvo vyetu, nakutsiya vanike mu vitapalo, na vakwenje mu mitambela ya vulandeselo.

²² Vivimbi vinashandokela kwoshe-ikwoshe, ngwe vinumbo vya vwilo vwa mu mahya, nambe ngwe tiliku ivanateje, oloni vaka-kuteja vanaiseze, naumo wai asa kuyikungulula. Evi vikevyo vyananjileke Shukulu Kalunga ngeci njivyendeke.”

²³ Shukulu Kalunga alinakwendeka ngwendi, “Vaka-mana kesi valyalesele a mana avo, nambe vaka-nzili kesi valyalese a nzili yavo, nambe vaka-kufuka kulyalesela a vufuko vwavo,

²⁴ oloni uje alyalesa, napande kulyalesa ngeci anjizivuke nakunjizivisisa, omwo cizemo cange capwa ca myaka yoshe, co njikalingi vya vushunga nakushungama. Evi vikevyo vyuma vikanjivwaelelesa. Yange Kalunga, njinendekamo.”

²⁵ Shukulu Kalunga alinakwendeka ngwendi, “Matangwa alinakwija omo njikanyanyamesa voshe vaje vanatuuka lika ku situ, oloni kesi ku mbunge,

²⁶ ngwe vanu va mu Ingito, na Yunda, na Endome, na Amoni, na Mowavi, na vanu voshe vaje vakala mu mambo vaje vanaliteula vin̄ambu vyavo. Omwo miyati ya vanu voshe ava vanatuuka lika ku situ, oloni kuvanyungile cikumiiyo cije cilumbununa cuma eci. Naumo wai wa ava vanu nanyungu cikumiiyo cange, nameme vanu va Isalele kuvanyungile cikumiiyo cange.”