Njelemiya 8 - Livulu lya Shukulu Kalunga

¹ “A simbu ije vitsiya vya vimyene na vitsiya vya vamyata va mu Yunda, na vitsiya vya vaka-kukombelela, na vitsiya vya vaka-kwimanena, na vitsiya vya vanu veka vaje vakele mu Yelusalema, vakavitundisa mu vimbumbo vyavo.

² Kuvakavikungulula nakuvitsinda, oloni vitsiya vyavo vikafwa ngwe vwilo. Vakavishanda a litanya, na ngonde, na vingongonosi, vije vivazemene nakuvipangela, nakuvilemesa.

³ Co vanu va muyati ou wa vuvi vaje vanasalao njikavatwala ku mafuti eka, vakaangula kutsa kutuvakana kuyoya. Yange Kalunga Muka-nzili yoshe, njinendekamo.”

Vuvi na cihiso

⁴ Shukulu Kalunga wanjilekele kwendeka ku vanu vendi ngwendi, “Omo munu awila asi, kuma kasa kukatuka ndi? Nga munu nazimbalesa ngila, kuma kasa kwilukamo ndi?

⁵ Omwo vikajo vanu vange mulinakutunda kuli yange kujeneka kwiluka? Mukakateya ku tumponya tweni, co munavyana kwiluka kuli yange.

⁶ Njatolililile mwamuvwa, oloni kumwendekele vushunga. Naumo wai wa ali yeni ali na vusiwa vwa vuvi vwendi, co lalo naumo wai wa ali yeni wehwile ngwendi, ‘Vuvi mukajo njinalingi?’ Munu na munu alinakuya mu ngila yendi, ngwe kavalu ashatukila mu nzita.

⁷ Nameme tunyange-nyange, na mamenekela, na tutela, na tumbimbi-ndonga, na tumbovo vazivuka simbu yakujaluka. Oloni vanu vange kumuzivuka mashiko anjilinakumishika.

⁸ Vatijo mwendeka ngweni munapu vaka-mana, co lalo muzivuka mashiko ange? Oloni valongisi vanatengulula mashiko ange kuwapwisa a makuli.

⁹ Vanu veni vaka-mana vali mu citanga, co vakavakwata nakuvazivisa shwamwa. Vanavyana majwi ange, mana akajo valinawo?

¹⁰ Ngecivene, njikana mahya avo kuli vanu veka, na vanakazi vavo kuli vanalume veka. Omwo mwanike nambe mukulunu voshe vali na cipululu ca vimbongo. Nameme vaka-kwimanena na vaka-kukombelela valinakukwisa vanu.

¹¹ Vanapwisa vimbandu vya vanu vange ngwe vitunyu vitunyu, co vendeka ngwavo vinolo, oloni kuvyolele.

¹² Yeni vanu vange, kuma kumwazivile shwamwa, omwo mwalingile vyuma vije vya vunyengwe ndi? Embwe, Kumwazivile shwamwa, omwo kumwesi kuziva shwamwa. Omo njikaminyanyamesa mukawa ngwe muvanau vakweni, co mukanyonga. Yange Kalunga, njinendekamo.

¹³ “Njashakele kukungulula vanu vange, ngwe munu akungulula vimbuto vyendi, oloni vanafu ngwe mukolovozi wa vushuka vwa vinyu wa vushuka, nambe ngwe muti wa mukuyu wakujeneka mikuyu, na maputa awo anajujwama. Ngecivene, njinatavesa vanu veka kutambula lifuti.”

¹⁴ Vanu va mu Yunda vehwile ngwavo, “Omwo vikajo twatumbamene kuluu? Tuteweleni ku vinganda vya vimpaka vyakukola tukatsileko. Shukulu Kalunga Njambi yetu natuhisa natwana mwaze tunwe ngeci tutse, omwo tunalingi vuvi ku mesho endi.

¹⁵ Twakengelelele kukale kwoloka na simbu ya vukangule, oloni kuvyakeleko kwakele lika lyova.

¹⁶ Vitozi vetu lajoko vali mu nganda ya Ndane, tunazivi tuvalu twavo valinakulyembula, co lifuti lyoshe lilinakujaja omo vanazivi tuvalu twavo voya. Vitozi vetu vanaija nakunyongesa lifuti lyetu na vyuma vyoshe vilimo, vanaija nakunyongesa nganda yetu na vanu vamwo voshe.”

¹⁷ Shukulu Kalunga alinakwendeka ngwendi, “Nyanyameni njikatuma manyoka akati keni, manyoka va vushungu vwavuvi vakamishuma, oloni naumo wai akasa kuvavindika.”

Njelemiya azivila vusiwa vanu vendi

¹⁸ Naumo wai asa kunjizembeleka ku vusiwa vwange, vulinakunjivinjisa mu mbunge.

¹⁹ Tolilileni! Mu lifuti mwoshe njilinakuziva kulila kwa vanu vange ngwavo, “Kuma Shukulu Kalunga waimo mu Siyone ndi? Kuma mwene wa mu Siyone waimo ndi?” Shukulu Kalunga mwene yavo nakumbulula ngwendi, “Omwo vikajo munanjiluvalesa akulemesa tumponya tweni nakutsikamena vinjambi vakujeneka seo?”

²⁰ Co vanu vatambekele ngwavo, “Ndombo inahu, co simbu ya kuteja inahu, oloni kutwovokele.”

²¹ Mbunge yange inazeye omwo vanu vange vanazeye, njilinakulila, mwa vushunga vene njili na shwamwa.

²² Nga mu Ngilyande mwakele vyemba, nambe nga mwakele vimbanda, omwo vikajo vanu vange kuvakangukile?