Njelemiya 7 - Livulu lya Shukulu Kalunga

Njelemiya ambulula mu Njuvo ya Shukulu Kalunga

¹ Lijwi lya Shukulu Kalunga lyezile kuli Njelemiya ngwalyo,

² “Imana mu cikolo ca Njuvo ya Shukulu Kalunga, wambulule lijwi eli ku vanu va mu Yunda vaje vakele nakukovela mu Njuvo ya Shukulu Kalunga mukulemesa.

³ Valeke ngwove Shukulu Kalunga Muka-nzili yoshe, Njambi ya Isalele nendeka ngwendi, ‘Tengulukeni ku vingila vyeni na vilinga vyeni, co njikamitavesa kukala mu mwela uno.’

⁴ Kesi mukulaele ku majwi aje vendeka ngwavo, ‘Eyi ikeye Njuvo ya Shukulu Kalunga! Njuvo ya Shukulu Kalunga! Njuvo ya Shukulu Kalunga!’

⁵ “Tundeni mu ngila eyi mulinakuyoyelamo, likeleni kulinga vyuma vije mulinakulinga. Lingeni mwamuvwa kuli umo na mukwavo.

⁶ Kesi muyandese vangenzi, na visiwa, na vifwile. Kesi mutsiye vanu vakujeneka mulonga mu lifuti lino. Kesi mulemese vinjambi veka vakaminyongesa.

⁷ Nga mutenguluka, co njikamitavesa kukala muno mu lifuti lije linjanene kuli vakukulwila veni kupwa vufuko vwavo vwa ku myaka yoshe.

⁸ “Kengeni, mulinakukulaela majwi a makuli.

⁹ Mulinakwiva, mulinakutsiya, mulinakulinga vupangala, mulinakulisinga vya makuli, co mulinakukombelela kuli Mbale, nakulemesa vinjambi vaje kumwazivukile akulivanga.

¹⁰ Mulinakulinga vyuma vije vinjazinda, co mwija nakwimana ku mesho ange mu Njuvo yange, nakwendeka ngweni, ‘Tunovoka!’

¹¹ Kuma mwayongola ngweni Njuvo yange yapwa mwela mwakuvanda vezi ndi? Njinamono vimulinakulinga.

¹² Yeni ku Shilo, mwela wakulivanga uje njangwile kunjilemeselako, mukamone vinjalingileko omwo vuvi vwa vanu vange va Isalele.

¹³ Munalingi vuvi vwoshe ovu, nameme njendekele kuli yeni visimbu vyavingi, oloni kumwanjitolililile. Njamisanene, oloni kumwanjikumbulwile.

¹⁴ Ngecivene, vije njalingile ku Shilo, vikevyo vinjikalinga ku Njuvo yange ije mwakulaela. Ku mwela uno vene unjaanene kuli vakukulwila veni amo neni, njikalinga cuma cimo vene ngeci cije njalingile ku Shilo.

¹⁵ Yeni vanu va mu Yunda, njikamisheka mu lifuti lyange ngwe munjashekele vavushoko vweni vanu va Isalele. Yange Kalunga, njinendekamo.”

Vanu vakujeneka kwononoka

¹⁶ Shukulu Kalunga wendekele ngwendi, “Njelemiya, kesi ulombelele vanu ava. Kesi uvatambekeleko nambe kuvalombelelako akuvemanenako, kesi uvaakwile omwo kunjikakutolilila.

¹⁷ Kuma yove kuwesi nakumona vivalinakulinga vanu va mu Yunda mu vinganda vyavo, na mu vitapalo vya mu Yelusalema ndi?

¹⁸ Vanike vacava vitale, vanalume vavweka tuhya, co vanakazi vashinga vunga nakwoca makende a njambi wa munakazi uje ivatumbula ngwavo Lishano lya Mwilu. Co vetila lalo n̄ombelo ya vinyu kuli vinjambi veka, ngeci vanjizivise ku mbunge kuvavala.

¹⁹ Kuma yange valinakuzivisa ku mbunge kuvavala ndi? Embwe, vali na kulizivisa shwamwa vakevo vavenya.

²⁰ Ngecivene, yange Kalunga wa Akamwa ya Vyoshe njiketila vukalu vwange vwakukomokesa a Yunda. Njikavwitila ali vanu, na a tusitu, na a miti, na a vimbuto. Vukalu vwange vukafwa ngwe tuhya tuje naumo wai asa kutuzima.

²¹ “Vanu vange, vin̄ombelo vimo mukavyenyekela vyoshe a mutula, vikwavo vakamitavesa ngeci muvilye. Oloni yange Kalunga, njendeka ngwange munapande kuvilya vyoshe.

²² Vakukulwila veni kunjavashikile kunjikombelela vin̄ombelo vya kwenyeka, nambe vin̄ombelo vya miyati yeka omo njavatundisile mu Ingito.

²³ Oloni njavashikile lika ngwange nga vanjononoka, yange njikapwa nji Njambi yavo, na vakevo vapwe vanu vange, co vyuma vyoshe vikakala mwamuvwa kuli vakevo.

²⁴ Vakukulwila veni kuvononokele nambe kumbako mbunge, oloni valingile ngwe muvyavalekele vimbunge vyavo vyakukaluwa, co vaviile manene.

²⁵ Kutunda a litangwa lije vakukulwila veni vatundile mu Ingito noo ku litangwa lya lelo, njinakala nakumitumina vangamba vange vaka-kwimanena.

²⁶ Oloni nameme ngoco, naumo wai wavatolililile nambe kumbako mbunge. Oloni yeni mwakaluwisile manene vimbunge vyeni nakunjitengulukila kutuvakana vakukulwila veni.

²⁷ “Ngecivene, Njelemiya, ukendeka majwi awa oshe kuli vanu vange, oloni kuvakakutolilila, ukavasana, oloni kuvakakukumbulula.

²⁸ Ukavaleke ngwove muyati wavo kuvesi nakunjononoka yange Kalunga, Njambi yavo, nambe kulilongesa omo njavanyanyamesele. Vushunga vunahu kuvesi nakuvusimutwiya lalo.

Vilinga vya vuvi mu Cana ca Hinome

²⁹ “Yeni vanu va mu Yelusalema, lileni, teuleni vin̄ambu vyeni muvyumbile kuti. Imbeni myaso ya vusiwa akamwa ya malundu, omwo yange Kalunga njinaluvala, co njinamivyana.

³⁰ “Vanu va mu Yunda vanalingi cuma cacivi. Vanaaka tumponya twavo tuje tunjazinda mu Njuvo yange, co vanaijwalesa.

³¹ Vanatungila mutula mu Cana ca Hinome uvatumbula ngwavo Tofete, ngeci vakombelele vana vavo va vanalume na ava va vanakazi kupwa vin̄ombelo vya kwenyeka. Yange kunjavashikile kulinga ngeci embwe, nameme kuciyongola mu mbunge yange.

³² Ngecivene, litangwa likaija, omo mwela uje kuvakautumbula lalo ngwavo Tofete nambe Cana ca Hinome, oloni vakautumbula ngwavo Cana Cakutsiila. Vanu vakavatsinda muje, omwo kukukakala lalo mwela wakuvatsindila.

³³ Co tuzila na tusitu vakalya mivila yavo, co naumo wai akavashekao.

³⁴ Njikolwesa muyoyo wakujolela mu vinganda vya mu Yunda na mu vitapalo vya mu Yelusalema, co njikolwesa muyoyo wakujolela na muyoyo wakuvwaelela wa ciwano ca vulo omwo lifuti likapwa ngundu.