Njelemiya 6 - Livulu lya Shukulu Kalunga

Vitozi vanazengeleka Yelusalema

¹ Vanu va Mbenjemani, teweni ngeci mwovoke! Teweni mutunde mu Yelusalema! Imbeni vimbendo mu Tekowa, co imikeni cimweso ca tuhya mu Mbete Hakeleme. Tuyando twakama nakunyonga vilinakwija kutunda ku kunto.

² Nganda ya Siyone yapwa yaivwa oloni vakainyongesa,

³ tunyungi vakatungilako vilombo vyavo. Co vakashimbikako vimbalaka vyavo kuzengeleka nganda, co munu na munu akashimbika mbalaka yendi kuje kwoshe kwanashaka.

⁴ Vimyene vakendeka ngwavo, “Livwaeseleni cimweja mulwise Yelusalema! Nga tuketa ku Yelusalema mutondo, co tukailwisa akati ka litangwa! Oloni nga tukotokela manene omo litangwa lyatoko na minzinze ya cingwezi lajoko yatenguluka,

⁵ co tukailwisa vutsiki nakusiwula vimpaka vyayo.”

⁶ Shukulu Kalunga Muka-nzili yoshe nashiki vimyene ava kushinja miti nakuyilundika mitumbo ngeci vaijeke a vivumbe vya Yelusalema. Shukulu Kalunga nendeka ngwendi, “Njikanyanyamesa eyi nganda, omwo muli vanu vavangi vaje valinakuyandesa vakwavo.

⁷ Vuvi vwa Yelusalema vulinakuzinzuka ngwe mwakazinzuka mema mu lisima. Njilinakuziva lwozi nakunyongesa mu nganda, co lalo njilinakumona mishongo na vanu vaje vanavulumuka valinakutsa.

⁸ Eni vanu va mu Yelusalema, tuyando otu tupwe twakuminangula, kutewa njikamiseza, co nganda yeni njikaipwisa mambo, muje naumo wai akakalamo.”

VaIsalele vanatengulukila Shukulu Kalunga

⁹ Shukulu Kalunga Muka-nzili yoshe wendekele kuli yange ngwendi, “Isalele vakavakambula ngwe muvakakambula citungu ca mikolovozi ya vushuka vwa vinyu kuje kuvanapotola vushuka vwoshe. Ngecivene, unapande kwamena munu woshe omo kucili simbu.”

¹⁰ Njakumbulwile ngwange, “Iyajo akanjitolilila nga njendeka kuli vakevo nakuvanangula? Vakevo vapwa vakukaluwa vimbunge nakuvyana kutolilila ku lijwi lyove, vakajolo vije viwukendeka kuli yange.

¹¹ Shukulu Kalunga vukalu vwove ali vakevo nange lalo vulinakunjenyeka mu mbunge kunjasa kututumana.” Asinoni Shukulu Kalunga wendekele kuli yange ngwendi, “Itila vukalu vwange ali vanike vali mu vitapalo na ali vakwenje vaje vanalikungulula, na ali vanalume vakwambata, na ali vanakazi vakushomboka, naa tukulukazi voshe.

¹² Vinjuvo vyavo vakavyana kuli veka, amo na mahya avo na vanakazi vavo. Njikanyanyamesa vanu va mu lifuti eli.

¹³ Munu woshe, mwanike nameme mukulunu ali na cipululu ca vimbongo, nameme vaka-kwimanena na vaka-kukombelela voshe vanapu vaka-kukwisa vanu.

¹⁴ Vanapwisa vimbandu vya vanu vange ngwe vitunyu vitunyu, co vendeka ngwavo vinolo, oloni kuvyolele.

¹⁵ Kuma vazivile shwamwa omwo valingile vyuma vya vunyengwe ndi? Embwe, kuvazivile shwamwa omwo kuvesi kuziva shwamwa. Omo njikavanyanyamesa, co vakawa ngwe muvanau vakwavo, co vakanyonga. Yange Kalunga, njinendekamo.”

VaIsalele vavyana ngila ya Njambi

¹⁶ Shukulu Kalunga wendekele kuli vanu vendi ngwendi, “Imaneni a masambwa ngila mumone. Kaveni vingila vije vendele vakukulwila veni, co mukakala mu kwoloka.” Oloni vendekele ngwavo, “Embwe kutukaimo!”

¹⁷ Asinoni Shukulu Kalunga wemikile vaka-kwimanena kunangula vanu vya vushonde, oloni vendekele ngwavo, “Kutukatolililako.”

¹⁸ Ngecivene, Shukulu Kalunga wendekele ngwendi, “Tolilileni yeni muyati, lilongeseni ku vije vikalingiwa kuli vanu vange.

¹⁹ Tolilileni yeni vaka-asi! Njikanena cihiso ali vanu ava, omwo vanavyana vilongesa vyange, co kuvononokele majwi ange.

²⁰ Omwo vikajo vanjinenela insense yakutunda ku Shemba, nambe n̄undu yakutunda ku lifuti lya kulyala? Kunjikatambula vin̄ombelo vyavo nambe kuvwaelela navyo.

²¹ Ngecivene, njikatanukisa vanu ava ngeci vawe. Vaishavo na vana vavo vakatsa, vasamba na vandambo vakatsa lalo.”

Nzita yakutunda ku kunto

²² Shukulu Kalunga alinakwendeka ngwendi, “Vanu valinakwija kutunda ku lifuti lya ku kunto, muyati wa vanu va nzili wa kulyala ulinakulivwaesela kulwa nzita.

²³ Mashwalale vavo va muuka vakujeneka mema ku mbunge vanambata mata avo a lusipa na mikwale yavo, muyoyo wa tuvalu twavo omo vashatuka unalifu ngwe kungwanjanga kwa mema a kalunga, vanalivwaesela cimweja kulwisa Yelusalema.”

²⁴ Vanu va mu Yelusalema vanendeka ngwavo, “Tunauzivi muzimbu, co mavoko etu anazeye, vukalu vwa mushongo wakukemanga vunatuwana, co tulinakukemanga ngwe munakazi ashaka kukita.

²⁵ Kesi mutuuke nakuya ku mahya nambe kwenda mu vingila, omwo vitozi vali na vitwa, co vushonde vuli kwoshe-ikwoshe.”

²⁶ Shukulu Kalunga alinakwendeka kuli vanu vendi ngwendi, “Zaleni vikeleya, co livulungeni mu livu. Lileni manene ngwe munatsisa mwana umolika, omwo vwasi-vwasi vitozi vaija nakumilwisa kujeneka kumileka.

²⁷ Njelemiya, eseka vanu vange ngwe muukeseka vutale, uwane ngeci vanafu vati.

²⁸ Voshe vanapu vakukaluwa vimbunge nakutengulukila, vakukaluwa ngwe vunengu na cikuvo. Voshe vanaviya, vanapu vaka-lufwe.

²⁹ Lutengo lulinakwenyoka manene, oloni vinyanga vya vutale kuvyesi nakunyongolokota. Cinapu cangoco kujelesa vanu vange, omwo vanu vaje vaka-vuvi kuvavatundisilemo.

³⁰ Vakavatumbula vinyanya vyangoco, omwo yange Kalunga njinavavyana.”