Njelemiya 52 - Livulu lya Shukulu Kalunga

Kuwa kwa Yelusalema

¹ Zendekiya wakele na myaka makumi avali na mwaka umo omo wapwile mwene wa mu Yunda, co washwanene mu Yelusalema myaka likumi na umo. Lizina lya vaina lyapwile Hamutale muna Njelemiya uje wakele mu nganda ya Limbena.

² Mwene Zendekiya walingile vuvi ku mesho a Shukulu Kalunga, ngwe muje mwalingile Mwene Yehoyakime.

³ Shukulu Kalunga waluvalele manene na vanu va mu Yelusalema na mu Yunda, ngeci wavazilwile kutunda ku mesho endi. Zendekiya watengulukilile Mwene Nevukaneza wa ku Mbambilone nakumulwisa,

⁴ co Nevukaneza wezile na mbunga ya mashwalale vendi voshe walwisile Yelusalema, a litangwa lyamulikumi ku ngonde yamulikumi mu mwaka wamucitanu na iwana wakushwana kwa Zendekiya. Co vatungile cilombo cavo anja ya nganda, co valingile mikinya noo vetele ku vivumbe vya nganda,

⁵ co vazengelekele nganda, noo mwaka wamulikumi na umo wakushwana kwa Zendekiya.

⁶ Co a litangwa lyamucitanu na awana ku ngonde yamuciwana mu mwaka uje vene, omo njala ya lyangengela yapwile yakama manene mu nganda, ngeci vanu kuvakele na vyakulya,

⁷ co vivumbe vya nganda vavituvile. Nameme vaMbambilone vazengelekele nganda, oloni mashwalale voshe vatewele ku simbu ya vutsiki. Vatuukilile ku cikolo ca ku lihya lya vumwene, co vetilile mu ngila ya ku cikolo ca mukati ka vivumbe vivali, co vatewelele ku mutambela wa ku Cana ca Yondau.

⁸ Oloni mashwalale va Mbambilone vashekele Mwene Zendekiya vakamukwatelele ku vyana vya Yeliko, co mashwalale vendi voshe vamusezele.

⁹ Zendekiya vamutwalele kuli Mwene Nevukaneza, uje wakele mu nganda ya Limbena mu lifuti lya Hamate, co Nevukaneza wamusompesele nakuwana ngeci ali na mulonga.

¹⁰ Kuje ku Limbena Nevukaneza watsiile vana va Zendekiya oku ishavo Zendekiya nakengeko, co lalo watsiile vamyata voshe va mu Yunda.

¹¹ Asinoni Nevukaneza wativile Zendekiya mesho, wamukutile malyenge, co wamutwalele ku Mbambilone. Zendekiya wakele mu kamenga ku Mbambilone noo litangwa lya kutsa kwendi.

Kunyonga kwa Njuvo ya Shukulu Kalunga

¹² A litangwa lyamulikumi, ku ngonde yamucitanu mu mwaka wamulikumi na itanu na iwana wakushwana kwa Mwene Nevukaneza wa Mbambilone, Nevuzalandane, muka-kunangula mwene, na muka-kushika mashwalale vendi, wakovelele mu Yelusalema.

¹³ Co wenyekele Njuvo ya Shukulu Kalunga, na lipela, na vinjuvo vyoshe vya vanu va vulemu va mu Yelusalema,

¹⁴ co mashwalale vendi vasiwile vivumbe vya nganda.

¹⁵ Asinoni Nevuzalandane watwalele vanu ku Mbambilone vaje vasalele mu nganda vaka-vipangi vya vutongwe, na vaje valiitile kuli vaMbambilone.

¹⁶ Oloni wasezele mu Yunda vanu vamo vaka-kuutwa, co wavapwisile vaka-kupanga mu mahya a mikolovozi ya vushuka vwa vinyu, na mu mahya.

¹⁷ Co vaMbambilone vapokwezele vimanda vya vunengu na vwimaneno vije vyakele mu Njuvo ya Shukulu Kalunga, amolika na lizau lyakama lya vunengu, co vatwalele vunengu vwoshe ku Mbambilone.

¹⁸ Co vatwalele lalo vifwosholo, na malonga akukwatela lito, aje vapangesele mukukomba ku mutula, co vambatele vivala vyakuzimisa vindeya, na malonga aje vapangesele mukukwatelao maninga a vin̄ombelo, na malonga aje vapangesele mukwenyeka insense, na vivala vyoshe vya vunengu vije vapangesele mu Njuvo ya Shukulu Kalunga.

¹⁹ Co vambatele tumalonga twatundondo, na vikango vyakwambatela manungu a tuhya, na malonga aje vapangesele mukukwatelao maninga a vin̄ombelo, na malonga akukwatela lito, na citumbikilo ca vindeya, na malonga akukunama akukwatela insense, na malonga akukunama akupangesa mukwitila vin̄ombelo vya vinyu, na vyuma vyoshe vije vavilingile na ngolinde na siliva.

²⁰ Vivala vya vunengu vije vyalingile Mwene Solomoni vya mu Njuvo ya Shukulu Kalunga, vimanda vivali, na matemba, na lizau lyakama, na vingombe likumi na vavali aje lyemanenene, vyapwile vyakulema manene kuvasele kuvipeselesa.

²¹ Vije vimanda vivali vyapwile vyakulifwa, imo na imo yapwile mamita 8 mu vulaja vwa akamwa, na mutwe wayo wa vunengu akamwa wapwile mamita 5.3 mu vulaja. Co yakele na mako mukati, co kuhima kwa vunengu kwapwile 75 milimita.

²² Ku mutwe ya manda imo na imo kwazengelekele vunengu vwa mamita akupwa 2.2 mu vulaja vwakushoveya na mapomingilanete akulinga lalo na vunengu, vulaja vwayo vwapwile mamita 2.2.

²³ A mesho a vwanda aa manda imo na imo, akele mapomingilanete akupwa 100, co mapomingilanete akupwa makumi atanu na awana na atanu na imo azengelekeleko.

Vanu va mu Yunda vavatwala ku Mbambilone

²⁴ Co Nevuzalandane, muka-kushika mashwalale, wakwatele Selaya Muka-kukombelela Wakama, na Zefaniya muka-kukombelela wakwata kuli Muka-kukombelela Wakama na vamyata vatatu va vulemu va mu Njuvo ya Shukulu Kalunga.

²⁵ Co mu nganda wakwatelemo mwata muka-kushika mashwalale, na vaka-kunangula mwene vatanu na vavali vaje vakele mu nganda, na muka-kwata kuli muka-kushika mashwalale, uje wapwile muka-kutulika livulu lya mazina a vanalume va vulemu makumi atanu na limo.

²⁶ Co Nevuzalandane wavatwalele kuli mwene wa Mbambilone, uje wakele mu nganda ya Limbela,

²⁷ mu lifuti lya Hamate. Co mwene wavapupile nakuvatsiya. Ngecivene, vanu va mu Yunda vavatundisile mu lifuti lyavo nakuvatwala ku vunzinda.

²⁸ Ovu vukevwo vungi vwa vanu va mu Yunda vaje vaatwalele Nevukaneza ku vunzinda ku Mbambilone. Omwo Nevukaneza washwanene myaka itanu na ivali wambatele vanu vakupwa 3,023,

²⁹ mu mwaka wamulikumi na itanu na itatu, wambatele lalo vanu ku Yelusalema vakupwa 832,

³⁰ co mu mwaka wendi wamumakumi avali na itatu, Nevuzalandane wambatele vanu vakupwa 745. Co voshe amolika vapwile 4,600, vanu vakutunda mu Yunda kuya ku Mbambilone.

³¹ Mu mwaka uje omo Evilemelondake wapwile mwene wa Mbambilone, wamwesele ngozi kuli Mwene Yehoyakine wa mu Yunda akumutundisa mu kamenga. Eci calingiwile a litangwa lyamumakumi avali na atanu, ku ngonde yamulikumi na vivali, mu mwaka wamumakumi atatu na itanu na ivali, kutunda aje vatwalelele Yehoyakine ku vunzinda.

³² Evilemelondake wakele na ngozi na Yehoyakine, co wamwanene mwela wakama wa kasingimiko, kutuvakana myela ije yaanene kuli vimyene vakwavo vaje vakele navo mu vunzinda mu Mbambilone.

³³ Ngecivene, Yehoyakine vamutavesele kuzala vuzalo vwendi kutuvakana kuzala vuzalo vwa mu kamenga, co vamutavesele lalo kulyalyalya amo na mwene matangwa oshe akuyoya kwendi kwoshe.

³⁴ A litangwa na litangwa mukuyoya kwendi kwoshe, Yehoyakine vakele nakumwana vimbongo ngeci alande vije vyashakele.