Njelemiya 51 - Livulu lya Shukulu Kalunga

Kusompa kwa Mbambilone kwa kulutwe

¹ Shukulu Kalunga alinakwendeka ngwendi, “Njinena lihunzi lyakama, lyakulwisa Mbambilone na vanu vamwo.

² Njikatuma vaka-kwija nakunyongesa Mbambilone, ngwe lihunzi lije likapekumwina vishati kulyala. Omo litangwa lya cihiso likaija, co vakalwisa ku mitambela yoshe nakuseza lifuti mupulungwa.

³ Kesi mwane simbu ku mashwalale vamwo kwasha mikili yavo, nambe kuzala vuzalo vwavo vwa nzita. Kesi musezeo mukwenje umo! Nyongeseni mbunga yoshe ya mashwalale.

⁴ Mashwalale vavo vakavetwa, co vakatsila mu vitapalo vya mu vinganda vyavo.

⁵ Yange Kalunga Njambi Muka-nzili yoshe, kunjasezele vanu va mu Isalele na vanu va mu Yunda, nameme vanalingi vuvi ku mesho ange muka-kujela wa Isalele.

⁶ Teweni mutunde mu Mbambilone! Teweseni myonyo yeni! Kesi vamitsiye omwo vuvi vwa vaka-Mbambilone. Yange ololo njilinakulinga shambandinga, nakuvahisa ngwe mucinavapande.

⁷ Mbambilone yapwile ngwe nganja ya ngolinde mu livoko lyange, kupendesa miyati yoshe. Miyati vanwile vinyu vyayo, co vapendele.

⁸ Vwasi-vwasi Mbambilone inau nakuyinyongesa! Yeni vaka-kwija lileni Mbambilone! Ishakezekeleni vumbanda vwa vimbandu vyayo amo yasa kukanguka.

⁹ Vaje vaka-kwija vakele muje vendekele ngwavo, ‘Tuneseka kusaka Mbambilone, oloni tunonwa. Tuyisezeni twilukeni ku membo etu. Njambi nahisa Mbambilone na nzili yendi yoshe, co nayinyongesa yoshe njwa.’ ”

¹⁰ Shukulu Kalunga alinakwendeka ngwendi, “Vanu vange vatambeka ngwavo, ‘Shukulu Kalunga natumwesa ngeci kuma tunalingi mwamuvwa. Ijeni tuye tukaleke vanu va mu Yelusalema vije vyanalingi Shukulu Kalunga Njambi yetu.’ ”

¹¹ Shukulu Kalunga nashiki vimyene va Mendiya kukalwisa Mbambilone, omwo nayongola kuyinyongesa. Omu mukemwo mwakalinga shambandinga vaMbambilone omwo vasiwile Njuvo ya Shukulu Kalunga. Vamyata va nzita valinakushika ngwavo, “Otoleni mikili yeni! Vwaeseleni cimweja vintelo vyeni!

¹² Mweseni cimweso cakulwisa vivumbe vya Mbambilone. Vaka-kunyunga vakolese! Akeni vaka-kunenga! Akeni vaka-kuvandamena!” Shukulu Kalunga nalingi vije vyendekele ngwendi akavilinga kuli vanu va Mbambilone.

¹³ Mbambilone lifuti lije lyakala manene na vindonga na vufuko vwavungi, oloni simbu ya lifuti eli yakuyoya ineti.

¹⁴ Shukulu Kalunga Muka-nzili yoshe, nalisingi ngwendi akanena mashwalale vavangi ngwe njame ya vambimba mukulwisa Mbambilone, co vakatambeka nakulisamba omwo vanahyana.

Mwaso wakushangazala Njambi

¹⁵ Shukulu Kalunga watangele kaye na nzili yendi, watangele kaye na mana endi, co wajangumwine melu.

¹⁶ Akushika kwendi mema a akamwa ya mwilu akuma, akungulula mashelwa kutunda ku mitambela ya kaye. Ikeye muka-kuyemwisa muhyato wa nyonzi, nakutuma lihunzi kutunda ku njuvo yalyo yavutulikilo.

¹⁷ Munu woshe wapwa cilema nakujeneka mana omo amona vyuma evi, vaje vakalingi tumponya vaziva shwamwa omwo tumponya twavo twapwa twa makuli, co kutwesi na mwonyo.

¹⁸ Tumponya twapwa twangoco, co vanapandele kutuyeluwisa, omo Shukulu Kalunga akaija, tumponya twoshe vakatunyongesa.

¹⁹ Njambi ya Yakomba kalifwile natwo embwe, ikeye watangele vyuma vyoshe, co waangwile Isalele kupwa vanu vendi. Lizina lyendi ikeye Shukulu Kalunga Muka-nzili yoshe.

Muveto wa Shukulu Kalunga

²⁰ Shukulu Kalunga alinakwendeka ngwendi, “Mbambilone, yove unapu muveto wange, citwa cange ca nzita. Njakupangesele mukutsenesa miyati ya vanu na vumwene,

²¹ mukusanyozola tuvalu na vaka-kulondao, mukusanyozola matemba na vaka-kuwendesa,

²² mukutsiya vanalume na vanakazi, mukutsiya vakulunu na vanike, mukutsiya vakwenje na vambanda,

²³ mukutsiya tunyungi na matanga avo a vimanga, mukutsiya vaka-kulima na vingombe vavo vakulimisa, mukutsena vaka-kushwana na vamyata vakama.”

Cihiso ca vaka-Mbambilone

²⁴ Shukulu Kalunga alinakwendeka ngwendi, “Mukanjimona omo njikalinga shambandinga Mbambilone na vanu vamwo, omwo a vuvi vwoshe vuvalingile kuli vaka-Yelusalema.

²⁵ Mbambilone, unapu ngwe munkinda uje unyongesa kaye koshe, oloni yange Kalunga njinapu citozi cove. Njikakukwata, nakukwandumwina asi upwe amolika na livu, nakukuseza mu lito.

²⁶ Kukwesi limanya limo likatunda kuli yove kupwa limanya lya mu mbango, nambe kupwa limanya lyakujalesa luvula, omwo ukapwa ngundu ku myaka yoshe. Yange Kalunga, njinendekamo.

²⁷ “Mweseni cimweso cakulwa! Co imbeni lupembo ngeci miyati yoshe ya vanu vazive! Kungululeni miyati vakalwise Mbambilone! Lekeni vumwene vwa Alalate, Mini, na Ashekenaze ngeci valwe. Anguleni mwata muka-kutwamenena nzita. Neneni tuvalu valwe ngwe vinjame vya vimbimba.

²⁸ Kungululeni miyati ya vanu ngeci valwise Mbambilone. Saneni vimyene va Mendiya, na vantwama vavo, na vamyata, na mbunga ya mashwalale ya mafuti oshe aje ali mu mavoko avo.

²⁹ Ano asi ali na lyova nakujaja omwo Shukulu Kalunga alinakutumba vutumbe vwakwimwisa Mbambilone mambo, muje mukajeneka kukala vanu.

³⁰ Mashwalale va Mbambilone vanalikela kulwa, co vanatumbama ngoco mu vimpaka vyavo. Kuvesi na nzili yakulwa, vanapu ngwe vanakazi. Vitozi valinakutavozola vikolo vya nganda nakwenyeka vinjuvo vyavo na tuhya.

³¹ Muluwa umo akava muluwa mukwavo mukushatuka nakukaleka mwene wa Mbambilone ngeci nganda yendi valinakuyifungulula.

³² Citozi nafungulula mitambela kwakujavukila, co nenyeka vimpaka. Co mashwalale va Mbambilone vanalishoshomwena.

³³ Vanu va Mbambilone vanavatete nakuvalyatangela ngwe vimbuto vije vivalyatangela ku lijungwilo. Yange Kalunga Muka-nzili yoshe, Njambi ya Isalele, njinendekamo.”

³⁴ Mwene Nevukaneza wa Mbambilone natete Yelusalema nakuyilya. Napwisa nganda ngwe njava yamupulungwa, naleula nganda ngwe cikashama. Wambatele vije vyashakele nakumbila kuti vije kashakele.

³⁵ Taveni vanu va Siyone vendeke ngwavo, “Mbambilone ikale na mulonga a muuka uje vatulingile yetu!” Taveni vanu va Yelusalema vendeke ngwavo, “Mbambilone ikale na mulonga, a vije twayandelele!”

Shukulu Kalunga akakwasa Isalele

³⁶ Co Shukulu Kalunga wendekele kuli vanu va mu Yelusalema ngwendi, “Njikamisompela n̄anda yeni, co njikalinga shambandinga ali vitozi veni, omwo a vije vivalingile kuli yeni. Njikomisa kavwelu-vwelu ka mema akwija ku Mbambilone, co njikomisa vindonga vyamwo.

³⁷ Lifuti lije likemuka ngundu, muje muvakakala tusitu. Likapwa lifuti lya vunyengwe, co naumo wai akakalamo, voshe vakalimona vakalikomokela.

³⁸ VaMbambilone voshe vakaana ngwe vindumba, co vakonena ngwe vana va vindumba.

³⁹ Vali na nuna ndi? Njikavavwaesela ciwano nakuvapendesa nakuvavwaelelesa. Vakalala, co kuvakenduka lalo.

⁴⁰ Njikavatwala mukuvatsiya, ngwe vana va vimanga, na vimembe, na majamba. Yange Kalunga, njinendekamo.”

Luvinda lwa Mbambilone

⁴¹ Shukulu Kalunga alinakwendeka ali vaka-Mbambilone ngwendi, “Nganda ije ivashangazalele kaye koshe vanaifungulula! Mbambilone inemuka cimweso ca vunyengwe ku miyati ya vanu!

⁴² Mema a kalunga anafwiki Mbambilone, nakuyifwika lalo na mankimba akucuma.

⁴³ Vinganda vinemuka cimweso ca vunyengwe, co vinapu ngwe mambo muje kumwesi mema, muje kumwesi kukala vanu, nambe kwendelamo.

⁴⁴ Njikanyanyamesa Mbele, njambi wa Mbambilone, nakumulingisa ngeci ecele vufuko vuje wevile, co miyati ya vanu nalumo lwai lalo vakamulemesa. “Vivumbe vya Mbambilone vinau.

⁴⁵ Vanu va Isalele, teweni mutundemo! Teweseni myonyo yeni kutunda ku vukalu vwange vwakama.

⁴⁶ Kesi mujujuke nambe kukala na lyova, omwo a lingwavo limulinakuziva. A mwaka na mwaka kuvanga kukale lingwavo lyakuliseza-seza, lingwavo lyakulitsiya mu lifuti, na lingwavo lya mwene umo kulwisa mwene mukwavo.

⁴⁷ Ngecivene, simbu ilinakwija omo njikanyanyamesa tumponya twa Mbambilone. Co lifuti lyoshe vakaziva shwamwa, na vanu vamwo voshe vakavatsiya.

⁴⁸ Asinoni lilu na asi na vyoshe vilimo vikatambeka nakujolela ngwe vanu, omo vanu vakatunda ku kunto vakawisa nakunyongesa Mbambilone.

⁴⁹ Mbambilone inatsii vanu muno mu kaye koshe, co ololo Mbambilone ikawa, omwo inatsii vaIsalele vavangi. Yange Kalunga, njinendekamo.”

Lijwi lya Njambi kuli vaIsalele mu Mbambilone

⁵⁰ Shukulu Kalunga alinakwendeka kuli vanu vendi vali mu Mbambilone ngwendi, “Munaputumuka ku kutsa! Ololo yeni! Kesi mutumbame! Nameme muli kulyala na kwimbo, anukeni yange Kalunga Njambi yeni, co anukeni Yelusalema.

⁵¹ Mwendeka ngweni, ‘Vanatuzivisa shwamwa nakutuviisa, mwa vushunga tunazivi shwamwa, omwo vaka-kwija vanambata mitambela yakujela ya mu Njuvo ya Shukulu Kalunga.’

⁵² Ngecivene, njendeka ngwange simbu ilinakwija omo njikanyanyamesa tumponya twa Mbambilone, co vaje vanavetwa vakakemanga mu lifuti mwoshe.

⁵³ Nameme nga Mbambilone yasa kulonda mwilu, nakutungamo vimpaka vyakukola, anga njasa kutumamo vanu nakukayinyongesa. Yange Kalunga, njinendekamo.”

Cihiso cakama ca Mbambilone

⁵⁴ Shukulu Kalunga alinakwendeka ngwendi, “Tolilileni mbimbi yakulila mu Mbambilone, kulila kwakunyongesa mu lifuti.

⁵⁵ Njilinakunyongesa Mbambilone, nakuyolwesa kuluu, mbunga ya mashwalale vazambula, ngwe mema a mankimba alinakucuma, co valinakutambeka omo valwa.

⁵⁶ Vanaija nakunyongesa Mbambilone, mashwalale vamwo vanavafungulula, mata avo a lusipa anapokozoka. Yange Njambi muka-kuhisa vuvi, co njikanyanyamesa Mbambilone ngwe ku vije viyalingile.

⁵⁷ Njikapendesa vaka-kushwana vamwo, na vanalume va mana, na vantwama, na mashwalale. Vakalala, co kuvakenduka lalo. Yange mwene, njinendekamo, yange Kalunga Muka-nzili yoshe.

⁵⁸ Vivumbe vya Mbambilone vyakukola, vakavisiwila asi, co vikolo vya tuposhi twayo vakavyenyeka njwa. Vipangi vya miyati ya vanu vyoshe vinapu vyangoco, vyoshe vije vanapangela, vikenya na tuhya. Yange Kalunga Muka-nzili yoshe, njinendekamo.”

Majwi a Njelemiya vawatuma ku Mbambilone

⁵⁹ Selaya, muna Neliya mutekulu wa Mahaseya, wapwile cikola ca mwene Zendekiya. Co mu mwaka wamuciwana wakushwana kwa Zendekiya mu Yunda, Selaya waile ku Mbambilone amolika na Zendekiya, co njamushikile vyuma vimo.

⁶⁰ Njasonekele mu livulu vyuma vyoshe vyavikalu vije vikaija ali vanu va Mbambilone, na vyuma vyeka lalo vije vikalingiwa ku Mbambilone.

⁶¹ Njalekele Selaya ngwange, “Omo uketa ku Mbambilone, unapande kukalavela vanu vyuma vyoshe vije vili omu mu livulu.

⁶² Asinoni lombela ngwove, ‘Shukulu Kalunga, yove wendekele ngwove ukanyongesa mwela uno, ngeci kesi mukakale cuma cimo cakuyoya, nambe munu, nambe kasitu, co mwela uno ukapwa mambo ku myaka yoshe.’

⁶³ Omo unamanesa kulavela vanu livulu eli, likutiiye ku limanya nakulyumbila mu Ndonga ya Yufuleti,

⁶⁴ co endeka ngwove, ‘Evi vikevyo vikalingiwa ku Mbambilone, ikavombela, co nalumo lwai lalo ikatumuka, omwo a cihiso cije cakanena Shukulu Kalunga a Mbambilone.’ ” Majwi a Njelemiya anahwila ano vene.